అమృతమథనం

మచ్చ లేని మనుషులు- మహానుబావులు

2012-02-22T08:08:00.000+05:30

దేవుడా! నేనే పాపం చేశాను. కనిపించిన దేవుళ్లకు మొక్కాను. అన్ని గుళ్లు తిరిగాను. మా ఆడపడుచు నెలకోసారి కూడా గుడికెళ్లదు నేను వారం వారం వెళతాను కదా! నాకే ఇంత అన్యాయం జరగాలా? మా తోటికోడలికి మా పక్కింటి లక్ష్మికీ, ఎవరికీ లేని కష్టాలు నాకేనా? ఇప్పుడు వాళ్లకు నా ముఖం ఎలా చూపించను’’ విశాలాక్షి అలా ఏడుస్తూనే ఉంది.

ఏడుపు శృతి పెరగడంతో పరిగెత్తుకొచ్చిన శ్రీవారు ‘‘అలా ఏకపాత్రాభినయం చేయడమేనా? ఏం జరిగిందో చెబుతావా?’’అని చిరాగ్గా అడిగాడు. ‘‘మన వాడిపై ఎన్ని ఆశలు పెట్టుకున్నాం. ఐఐటిలో చేరేందుకే కదా మీ ఆఫీసుకు దూరమవుతుందని తెలిసినా, అద్దె ఎక్కువైనా నల్లకుంటలో ఉంటున్నాం’’ చెప్పుకుపోతూనే ఉంది. ‘‘అది సరేలే ఇంకా మనోడిని స్కూల్‌లో కూడా చేర్పించలేదు అప్పుడే ఐఐటి కోచింగ్‌కు పనికిరాడని ఐఐటి రామయ్య ఏమైనా చెప్పాడా? ఏమిటి?’’ అని అడిగాడు. ‘‘అది కాదండి మన వాడిని రేపు స్కూల్‌లో చేర్పిద్దామనుకున్నాం కదా? స్కూల్‌లో రాయించడానికి పుట్టుమచ్చలు ఎక్కడున్నాయో చూద్దామని ప్రయత్నిస్తే ఒక్కటి కూడా కనిపించలేదు. మచ్చలేని వాన్ని స్కూల్‌లో ఎలా చేర్చుకుంటారు. మన ఐఐటి కలలు కల్లలైనట్టేనా?’’ అంటూ మళ్లీ ఏడుపు మొదలు పెట్టింది. అప్పటి వరకు నింపాదిగా ఉన్న శ్రీవారు ఒక్కసారిగా కంగారు పడ్డాడు.‘‘ అదేంటే అసలు మచ్చలేని మనిషి ఉండటం అసాధ్యం. నువ్వు సరిగా చూశావా? అని గాబరాపడ్డాడు. ‘‘కావాలంటే రండి’’ అని ఆరుబయటకు తీసుకెళ్లింది. ‘‘బురద నీటిలో ఆడుతున్న ఆ పిల్లల గుంపులో మెరుస్తున్న కళ్లు చూశారా? వాడే మనవాడు’’ అని ఒక పిల్లాడిని పట్టుకుని చూపింది. కళ్లు తప్ప వాడు నడుస్తున్న బురదలా కనిపించాడు.

కొద్ది సేపు ఆలోచించిన శ్రీవారు పక పకా నవ్వాడు. ‘‘పిచ్చి విశాలక్షి మనవాడిలో మచ్చలేదని ఎవరు చెప్పారే నీకు. ఒక్కనిమిషం ఆగు అంటూ చిన్నాడిని లాక్కొచ్చి మంచినీటి నల్లాకింద నిలబెట్టి నల్లా తిప్పాడు. వాడిమీద నీళ్లు పడగానే బురద పోయింది. అటూ ఇటూ చూశాడు. వాడి చేయిమీద, పిర్ర మీద. కాళ్ల మీద, ముఖం మీద కనీసం అరడజను మచ్చలను చూపించి, ‘‘చాలా ఇంకా కావాలా? ’’ అని అడిగాడు. ‘‘బురదలో తడిసి ముద్దవడం వల్ల మచ్చకనిపించలేదు కానీ మచ్చలేని మనిషి ఉండడే పంకజాక్షి. కొందరు రాజకీయ నాయకులు కూడా అంతే బురదలో కూరుకుపోయి తమది మచ్చలేని జీవితం అంటారు. నువ్వు మనోడికి మచ్చలేదు అంటే రాజకీయాల్లోకి పనికొస్తాడేమో అనుకున్నాను’’ అంటూ నవ్వుతూ శ్రీవారు మళ్లీ పేపర్ చదువుకోవడానికి లోనికి వెళుతూ, ‘మాయా మశ్చింద్రా మచ్చను చూడా వచ్చావా?’ అంటూ ఊషారుగా పాటందుకున్నాడు.
***
వంశీ లేడీస్ టైలర్ సినిమాలో తొడమీద పుట్టుమచ్చ ఉన్న అమ్మాయి కోసం హీరో రాజేంద్ర ప్రసాద్ తెగ వెతుకుతుంటాడు. పుట్టుమచ్చ ఉన్న అమ్మాయిని చేసుకుంటే కలిసొస్తుందని ఊళ్లో పిచ్చిపిల్లను తప్ప అమ్మాయిలందరినీ ప్రేమించేస్తాడు. ఐతే తొడమీద మచ్చున్నది ఆ పిచ్చిపిల్లకే. నాది మచ్చలేని జీవితం అంటూ నాయకులు గొప్పగా చెప్పుకుంటారు కానీ మచ్చల్లోనే అదృష్టం దాగుందని మచ్చల శాస్త్రం చెబుతుంది. నుదురుకుడి బాగాన, ముక్కు కుడివైపున మచ్చ ఉంటే ఆకస్మిక ధనప్రాప్తి అట, కుడి తొడ మీద పుట్టుమచ్చ ఉంటే భార్య వల్ల ధన ప్రాప్తి అని పుట్టుమచ్చల శాస్త్రం చెబుతోంది. పెదవి మీద, ఎడమ కంటి రెప్పమీద ఎడమ తొడమీద మచ్చ ఉంటే చెడు ఫలితాలట! పుట్టుమచ్చల శాస్త్రంలో ఎక్కడ మచ్చ ఉంటే సంపద కలిసొస్తుందో, ఎక్కడ మచ్చలుంటే కష్టాలు తప్పవో చెబుతుంది. పుట్టుమచ్చల శాస్త్రానికి, రాజకీయ శాస్త్రానికి అస్సలు పొంతన కుదరదు! ఎక్కడ మచ్చలుంటే కలిసొస్తుందో పుట్టుమచ్చల శాస్త్రం చెబితే, అస్సలు మచ్చలు లేకపోతేనే ప్రజలు నమ్మి అధికారం అప్పగిస్తారని రాజకీయ శాస్త్రం చెబుతుంది.

మీలో పాపం చేయనివారు ఎవరో చెప్పండి అని పాడినట్టుగా మీలో మచ్చలేని నాయకుడెవరో చెప్పండి అంటే నాయకులంతా చేతులెత్తుతారు కానీ నిజానికి వారికున్నన్ని మచ్చలు మరెవరికీ ఉండవు. బహుశా ఇంకా పుట్టని నాయకులకు మచ్చలు లేకపోవచ్చు కానీ రాజకీయ జీవితం ఉన్న నాయకులందరికీ చిన్నదో పెద్దదో మచ్చలేకుండా ఉండదు. నా జీవితం తెరిచిన పుస్తకం అని చెప్పకపోయినా, నిజంగానే తెరిచిన పుస్తకంలా జీవితాన్ని గడిపిన మహాత్మాగాంధీ జీవితంలో సైతం మచ్చలున్నాయి. ఆయనే స్వయంగా తన ఆత్మకథలో ఆ మచ్చలను ప్రస్తావించారు. బాపూ జీవితంలోనే మచ్చలు తప్పనప్పుడు బాబుల జీవితం ఎంత? నాది మచ్చలేని జీవితం అని నాయకులు చెబుతున్నారు కానీ మా నాయకుడిది మచ్చలేని జీవితం అని ఒక్క అనుచరుడు కూడా చెప్పలేకపోతున్నాడంటే వారి జీవితంలో ఎన్ని మచ్చలున్నాయో అర్ధమవుతుంది.

***
‘‘నామాట వినురా ఆ అమ్మాయి అందంగా ఉంది. ఆమెది మచ్చలేని శరీరం పెళ్లి చేసుకో?’’
‘ఆమెను పెళ్లిచేసుకుందామనే అనుకున్నాను నువ్వా మాట చెప్పాక ఇంకెలా చేసుకుంటానురా? ’’
నీతి: మచ్చల రహస్యం చెప్పకపోవడమే మంచిది. ఏ పుట్టుమచ్చల శాస్త్రంలో ఏ ముందో ఎవరికి తెలుసు?

వెండితెర మాజీ హీరోయిన్లు బుల్లి తెర తాజా యాంకర్లు

2012-02-21T08:07:00.000+05:30

ఇప్పుడు పలువురు మాజీ హీరోయిన్లు బుల్లితెరపై యాంకర్లుగా ప్రత్యక్షమవుతున్నారు. రోజా, రజని తరువాత ఇప్పుడు ఆమని బుల్లితెరను నమ్ముకున్నారు. వృద్ధ హీరోలు ప్రజలకు సేవ చేయడానికి రాజకీయ ప్రవేశం చేసి తరిస్తున్నారు. కానీ హీరోయిన్లకు మాత్రం రాజకీయాల్లో అవకాశాలు దక్కడం లేదు. దాంతో బుల్లితెరను నమ్ముకుంటున్నారు. వీరు బుల్లితెరపై యాంకర్ల నుండి పోటీ ఎదుర్కొని ఎంత వరకు నిలబడతారో చూడాలి.

తెలుగునాట సినిమా వాళ్లకు చిన్నతెరపై మొదటి నుండి కొంత చిన్నచూపే. చిన్నతెరపై కనిపించే వారికి సినిమాల్లో అవకాశాలు ఉండవనే అభిప్రాయం ఉంది. హిందీలో ఇలాంటి చిన్నచూపు ఏమీ లేకపోయినా తెలుగులో మాత్రం ఇది బాగానే కనిపిస్తుంది. చిన్నతెరపై కనిపిస్తున్నారు అంటే సినిమాల్లో అవకాశాలు లేవు అని ప్రకటించినట్టు అనే అభిప్రాయం తెలుగులో బాగా ఉంది. దానికి తగ్గట్టుగానే హీరో, హీరోయిన్లు, క్యారక్టర్ యాక్టర్లు, కమెడియన్లు ఎవరైనా ఎక్కువగా సినిమాల్లో అవకాశాలు తగ్గినప్పుడే చిన్నతెరవైపు చూస్తున్నారు. రజని, రోజా, ఆమని వంటి వారు ఒకప్పుడు తెలుగు సినిమాల్లో హీరోయిన్లుగా ఒక వెలుగు వెలిగారు. ఇప్పుడు ఈ ముగ్గురు కూడా వివిధ తెలుగు చానల్స్‌లో యాంకర్లుగా కనిపిస్తున్నారు. హీరోయిన్లుగా గతంలో ఉన్న క్రేజీ వల్ల యాంకర్లుగా బాగానే రాణిస్తున్నారు. కానీ పాపులర్ యాంకర్లకు గట్టిపోటీ ఇవ్వలేకపోతున్నారు. రజని ప్రముఖ హీరోలందరితో నటించారు. బాగా అవకాశాలు ఉన్న సమయంలోనే ఆమె వివాహం చేసుకుని దశాబ్దకాలానికి పైగా సినిమా రంగానికి దూరంగానే ఉన్నారు. హఠాత్తుగా ఆమె వార్తల్లో కనిపించారు. తన కుటుంబ జీవితంలో తలెత్తిన వివాదాన్ని ప్రస్తావించి ఆసక్తి రేకెత్తించారు. చాలా మంది హీరోయిన్లుగా వెలుగుతున్న కాలంలోనే భవిష్యత్తు గురించి సరైన ప్రణాళిక రూపొందించు కోవడంలో విఫలమవుతున్నారు. తొలి తరం హీరోలు ఇదే విధంగా దెబ్బతింటే ఆ తరువాత వచ్చిన ఎన్టీరామారావు, అక్కినేని నాగేశ్వరరావు లాంటి వారు జాగ్రత్త పడ్డారు. కానీ అదేం దురదృష్టమో హీరోయిన్ల విషయంలో అలాంటి జాగ్రత్తలు సాధ్యం కావడం లేదు. రజని సైతం అలా దెబ్బతిన్నవారే. ఆటుపోట్లను విజయవంతంగా ఎదుర్కొన్న హెచ్‌ఎం టీవిలో కుటుంబ సమస్యలపై సలహాలు ఇచ్చారు. ఆ కార్యక్రమం పెద్దగా విజయం సాధించలేదు. ఇందిర పేరుతో డిడిలో కనిపించారు. అదీ అంతంత మాత్రమే. ఇప్పుడు ఈటీవి వారి డ్యాన్స్ పోటీల్లో జడ్జిగా కనిపిస్తున్నారు. అస్సలు ఏ మాత్రం మర్యాద పాటించకుండా పోటీ దార్లు ఒకరినొకరు తిట్టుకోవ డం, నువ్వెంత అంటే నువ్వెంత అనుకోవడం కొరియోగ్రాఫర్ల ఈ డ్యాన్స్ కార్యక్రమానికే పరిమితం. హీరోయిన్‌గా ఎంతో అందంగా కనిపించే రజని, ఇలాంటి కార్యక్రమంలో కనిపించడం ఇబ్బందికరమే. ఓడలు బళ్లు కావడం, బళ్లు ఓడలు కావడం అంటే ఇదేనేమో! హీరోయిన్లుగా ఎలాంటి పాత్రలు ఎంపిక చేసుకోవాలో ఒకటికి రెండు సార్లు ఆలోచించి నిర్ణయం తీసుకున్నట్టుగానే టీవి కార్యక్రమాల్లో సైతం తాము ఎలాంటి కార్యక్రమాల్లో అయితే రాణిస్తాం అని బాగా ఆలోచించి అలాంటి వాటికే అంగీకరించడం మంచిది. దాదాపు దశాబ్ద కాలం పాటు రజని తెలుగునాట అందార తారగా ఒక వెలుగు వెలిగారు. తమిళంలో తొలుత నటించి, ఆ తరువాత తెలుగులో స్థిరపడ్డారు. పలు తమిళ, కన్నడ, మళయాళం సినిమాల్లో నటించారు. బాలకృష్ణ, రాజేంద్ర ప్రసాద్, నాగార్జున వంటి టాప్ హీరోలందరితో రజని హీరోయిన్ గా నటించా రు. ప్రారం
భం లో వచ్చిన కార్యక్రమాలు అంతంత మాత్రంగానే ఉన్నా ఇప్పుడు బుల్లితెరపై నెట్టుకు రావడానికి తీవ్రంగానే ప్రయత్నిస్తున్నారు.
రోజా ఇలానే తొలుత తప్పటడుగులు వేసినా తరువాత నిలదొక్కుకున్నారు. హీరోయిన్‌గా అవకాశాలు తగ్గిపోగానే ఆమె ఒక వైపు రాజకీయ ప్రవేశంతో పాటు మరోవైపు టీవి కార్యక్రమాలను నమ్ముకున్నారు. మొగుడ్స్ పెళ్లామ్స్ అనే పాపులర్ కార్యక్రమంలో అప్పటి వరకు ఉన్న యాంకర్ స్థానంలో రోజా వచ్చింది. అయితే సురేఖ యాంకరింగ్‌కు అలవాటు పడిన ప్రేక్షకులు రోజాను స్వాగతించలేక పోయారు. తొందరగానే ఈ విషయం గ్రహించినట్టున్నారు. రోజా మరో కార్యక్రమానికి జంప్ అయి నిలదొక్కుకున్నారు. తాజా గా ఆమ ని ఇప్పుడు జీ తెలుగులో నేనే సత్యభామ కార్యక్రమం నిర్వహిస్తున్నారు. హీరోయిన్‌గా తెరమరుగైన తరువాత ఆమె బుల్లితెరపై కనిపిస్తున్న తొలి కార్యక్రమం ఇది. జీ తెలుగులో నేనే సత్యభామ అంటూ ఆమని హడావుడి చేస్తున్నారు. శుభలగ్నం, మావి చిగురు, మిస్టర్ పెళ్లాం సినిమాల్లో మంచి నటిగా పేరు పొందిన ఆమని బుల్లితెర జీవితం ఎలా ఉంటుందో మరి. సత్యభామ అంటే పొగరుకు ప్రతీక. ఈ కార్యక్రమంలో పాల్గొనే మహిళలు కాస్తంతా పొగరు తనంతో ఉంటారు.
పొగరు పాత్రలు హీరోయిన్‌గా ఆమనికి కొట్టిన పిండే.

కల్లా కపటం తెలియని నేతలు

2012-02-15T08:07:00.001+05:30

కల్లా కపటం తెలియని వాడా

లోకం పోకడ తెలియనివాడా

పాడేటప్పుడు శబ్దం నోటి నుండి కాదు హృదయం నుండి రావాలి అంటూ చంద్రబాబు ఎన్టీఆర్ భవన్‌లో పాడిస్తున్నాడు. ‘‘నేను నేర్పిన క్రమ శిక్షణ ఒక్కోసారి నాకే ముచ్చటేస్తుంది. ఇంతటి క్రమశిక్షణ గల మీ రుణం నేను ఏ జన్మలోనూ తీర్చుకోను’’ అని బాబు చెప్పగానే అంతా చప్పట్లు కొట్టారు. ఈ పాటల సిడిని రాష్టమ్రంతటా పంచండి. ఈసారి కల్లాకపటం తెలియని వారినే గెలిపించాలని కంత్రీలను ఇంటికి పంపించాలని జనం అనుకుంటున్నట్టు తెలిసింది. మనను మించిన అమాయకుడు మరొకడు లేడని నిరూపించాలి అని బాబు ఆదేశించారు.

ఇంతలో అక్కడికి సర్వే బృందం వచ్చింది. పాట రిహార్సల్స్ చూసి ఎన్టీఆర్ భవన్‌కు బదులు పక్కనున్న అన్నపూర్ణ స్టూడియోకు వచ్చామా? ఏమిటని కంగారు పడ్డారు. సరైన అడ్రస్‌కే వచ్చారు రండి అని చంద్రబాబు పిలిచారు. ‘‘నేనంటే మా వాళ్లకు పిచ్చి అభిమానం. నాకు కుట్రలు కుతంత్రాలు అస్సలు తెలియదు. ఏ విషయమైనా ముఖం మీదే ముక్కు సూటిగా చెబుతుంటాను, దానే్న మా వాళ్లు పాటగా మార్చి వద్దన్నా పాడుతున్నారు. సాధారణంగా నాకు ఇతరులు పొగడడం నచ్చదు. నా గురించి నేనే పొగుడుకుంటాను.’’ అని చంద్రబాబు బదులిచ్చారు.

రాష్ట్రంలో కుట్రలు కుతంత్రాలు, కల్లా కపటం తెలియని నాయకుల గురించి మేమో సర్వే నిర్వహిస్తున్నాం అని వారు చెప్పగానే, పాట విన్నాక కూడా ఈ విషయంలో నాతో పోటీ పడేవాళ్లు ఉన్నారని మీరనుకుంటున్నారా? అని అడిగారు. వారు కొన్ని ప్రశ్నలు అడిగి వెళ్లారు.

బాలకృష్ణ తొడలు కొట్టడంతో ఆ యువకులు బెదిరిపోయారు. పారిపోవడానికి ప్రయత్నిస్తుంటే అయ్యో అనవసరంగా భయపడుతున్నారు. దురదపెడితే గోక్కున్నట్టుగా మా సార్‌కు తొడగొట్టడం అలవాటైంది. అని సిబ్బంది వాళ్లకు నచ్చజెప్పారు. మీరు కొన్ని ప్రశ్నలకు సమాధానం చెప్పాలని అనగానే. మాది నందమూరి వంశం నేను చాలా తెలివైన వాడిని. ఐనా మా బావ చెప్పేంత వరకు మీ ప్రశ్నలకు సమాధానం చెప్పనంటూ బాలకృష్ణ బాబుకు ఫోన్ చేసి మాట్లాడారు. నేను చాలా తెలివైన వాడినని మా బావ కూడా చెప్పాడు. సర్వేలోని మీ ప్రశ్నలకు నా తరఫున మా బావే సమాధానాలు చెబుతాడు వెళ్లండి అంటూ బాలకృష్ణ తొడ గొట్టాడు.

మరేటి సేద్దాం అంటూ బొత్స ఎవరితోనో ఫోన్‌లో మాట్లాడుతున్నాడు. నాకు 31 వైన్‌షాపులున్నాయని ఓపెన్‌గా చెప్పిన వాడిని నా కన్నా కల్లాకపటం తెలియని వాడు ఈ రాష్ట్రంలో ఇంకొకరుంటారా? అని ప్రశ్నించారు.

మా నాన్న చనిపోవడాన్ని తట్టుకోలేక వందల మంది చనిపోయారు. వారిని ఓదార్చడానికి వెళతానంటే మేడం సోనియా వద్దే వద్దన్నారు. పార్టీ నుండి బయటకు పంపినా, అరెస్టు చేసినా ఓదార్పును ఆపనన్నాను. నాకన్నా కల్లాకపటం తెలియని వాడు ఇంకెవడుంటాడు అని జగన్ చెబుతుంటే, మరి లక్ష కోట్లు అంటూ ఏదో అడగబోతే, ప్రశ్న పూర్తి కాకముందే. మా నాన్న నాకు ఇంతపెద్ద కుటుంబాన్ని ఇచ్చారు. లక్ష కోట్ల కన్నా పది కోట్ల మంది ప్రజల హృదయాలే నాకు ఎక్కువబ్బా! మీ సర్వేలో నా కన్నా అమాయకుడు కనిపించాడా? అని జగన్ ఎదురు ప్రశ్నించారు.

అటు నుంచి బృందం నేరుగా కిరణ్‌కుమార్‌రెడ్డి దగ్గరకు వెళ్లింది. ‘‘మేడం మా ఇంట్లో సర్వెంట్లు సరిగా పని చేయడం లేదు. మా ఆవిడేమో సర్వెంట్‌ను మార్చాల్సిందే అంటున్నారు. మరి మార్చమంటరా? మేడం అంటూ కిరణ్ ఎవరితోనో ఫోన్‌లో మాట్లాడుతున్నాడు. తన అమాయకత్వం గురించి కిరణ్‌కుమార్ ఏదో చెప్పాడు. వారికి ఏదో అర్ధమైంది. సార్ సర్వే విషయం ఎలా ఉన్నా త్రి భాషా సూత్రాన్ని త్రికరణ శుద్ధిగా అమలు చేస్తున్నది మీరొక్కరే సార్ అని బృంద సభ్యుడు ముఖ్యమంత్రిని అభినందించాడు. దానికి ముఖ్యమంత్రి మూడు భాషల్లో కృతజ్ఞతలు తెలిపారు.

ఒకసారి ఫేస్ టర్నింగ్ ఇచ్చుకో అని చిరంజీవి అనగానే అంతా ఫేస్‌ను మరోవైపు టర్నింగ్ ఇచ్చుకున్నారు. ఇప్పుడే మేడం ఫోన్ చేశారు ఏంటీ విషయం అంటూ చిరంజీవి అడిగారు. నమ్మడం లేదా? మేడం అంటే ఎవరనుకున్నారు సోనియాగాంధీ అంటూ చిరంజీవి మురిపెంగా చెప్పారు. 10 జన్‌పథ్ దగ్గర రెండు మూడు రోజులు వేచి ఉన్నా మేడం అపాయింట్‌మెంట్ ఇవ్వదు, ఫోన్ చేస్తుందా? అనుకుంటున్నారా? అని ప్రశ్నించాడు. సర్వే బృందం ఏమీ చెప్పకుండా పాపం అమాయకుడు అని మనసులోనే అనుకున్నారు.

ఇంకా నేను కాంగ్రెస్‌ను నమ్ముతున్నానంటే నా కన్నా కల్లాకపటం తెలియని వాళ్లు ఇంకెవరుంటారు అని కెసిఆర్ ఎదురుప్రశ్నించారు. మాకంటూ సొంత అభిప్రాయాలు ఉండవు, బాబు మాటే మాకు వేదవాక్కు అని నారాయణ, రాఘవులు కోరస్‌గా పలికారు.
రాష్ట్రంలో రాజకీయ నాయకులంతా కల్లాకపటం తెలియని వారే. కుట్రలు కుతంత్రాలతో నిండని రాజకీయాలకు వీళ్లు పనికిరారు. పాల వ్యాపారం, వైన్‌షాపులు, సినిమా వ్యాపారం సాగించుకోవలసిందే అని బృందం తమ నివేదిక ఇచ్చింది.

మరి ప్రజలేమంటారో?

బూతును నమ్ముకొని బతుకుతున్న తెలుగు చానల్స్

2012-02-14T07:58:00.000+05:30

- కర్నాటకంలో ‘నీలి’ సంచలనం - తెలుగునాట బూతు విప్లవం

తెలుగునాట బుల్లితెరపై నీలి విప్లవం రోజు రోజుకు కొత్త పుంతలు తొక్కుతోంది. కర్నాటక అసెంబ్లీలో ముగ్గురు మంత్రులు సెల్‌ఫోన్‌లో అశ్లీల బొమ్మలు చూస్తూ టీవి చానల్ కెమెరాకు చిక్కారు. అయితే ఆ వార్తలను ప్రసారం చేసిన తెలుగు చానల్స్ అంతకు మించిన బూతును చూపిస్తున్నాయ. బూతు బొమ్మలు చూడాలనే ముచ్చట కాస్తా కర్నాటకలో ముగ్గురి మంత్రి పదవులను ఊడబెరికింది. కానీ తెలుగు నాట మాత్రం ఈ బూతు విప్లవం తమ వీవర్‌షిప్‌ను గణనీయంగా పెంచుతుందని చానల్స్ గట్టి నమ్మకంతో ఉన్నాయి. ఉదయం నుండి రాత్రి వరకు అందరి అవినీతిని ఎండగడుతూ ప్రపంచానికి నీతి పాఠాలు చెబుతున్న తెలుగు చానల్స్ రాత్రి పదకొండు అయిందంటే తమ అసలు స్వరూపాన్ని బయటపెడుతున్నాయి. అన్ని చానల్స్ కాకపోయినా నాలుగైదు తెలుగు చానల్స్ మాత్రం రాత్రి పదకొండు నుండి బూతు పంటను పండిస్తున్నాయి.

ముగ్గురు కర్నాటక మంత్రులు సెల్‌ఫోన్‌లో చూసిన బూతు బొమ్మలు ఏమిటో తెలుగు నాట బుల్లితెర ప్రేక్షకులందరికీ కనువిందు కలిగించేట్టుగా తెలుగు చానల్స్ చూపించాయి. అసెంబ్లీలో కూర్చొని బిల్లులపైనో, ప్రజల సమస్యలపైనో చర్చించాలి. అంత ఓపిక లేకపోతే అధికార పక్షం, ప్రతిపక్షం తిట్టుకుని, పరస్పరం ఆరోపణలు చేసుకోవాలి. అంత కన్నా ఇంకా ఎక్కువ ఓపిక ఉంటే మైకులు విరిచేసి, బాహాబాహికి దిగొచ్చు. ఇది ఆయా రాష్ట్రాల్లో ఆయా ప్రజా ప్రతినిధుల ఓపికను బట్టి జరిగే తంతు. కానీ కర్నాటకలో దీని కన్నా భిన్నంగా ముగ్గురు మంత్రులు సెల్‌ఫోన్‌లో బూతు బొమ్మలు చూస్తూ బ్లూ హ్యాండెడ్‌గా (రెడ్ హ్యాండెడ్ ) దొరికి పోయారు. ఒంటరిగా భోజనం చేయవద్దని, ఎదురుగా ఉన్నవారికి ఆఫర్ చేయాలనేది ఒక సంప్రదాయం. అలానే ఒంటరిగా బూతు బొమ్మలను ఆస్వాదించవద్దని, చుట్టు పక్కల వారికి సైతం ఆ ఆనందాన్ని పంచాలనే సంప్రదాయం ఏమైనా కర్నాటక మంత్రికి ఉన్నట్టుంది. ఆయన ఒక్కడే కాకుండా అటువైపు ఇటు వైపు ఉన్న ఇద్దరు మంత్రులను సైతం పిలిచి చూపించారు. ఇది చివరికి మీడియా కెమెరాలో చిక్కి, కర్నాటకలో సంచలనం సృష్టించింది. కానీ చిత్రంగా కర్నాటక చానల్స్‌లో కన్నా ఈ వ్యవహారాన్ని తెలుగు చానల్స్ ఎక్కువ సమయం చూపించాయి. ముగ్గురు మంత్రులు చూసిన బూతు దృశ్యాలను తెలుగు చానల్స్ పదే పదే చూపించాయి.

ఐ న్యూస్ ప్రత్యేక కథనాన్ని రూపొందించి, విలువలు పడిపోతున్నాయని ఆవేదన వ్యక్తం చేసింది. నైతిక విలువలు, భారతీయ సంప్రదాయాల గురించి ఎక్కువగా మాట్లాడే బిజెపికి చెందిన మంత్రులు అసెంబ్లీలో సెల్‌ఫోన్‌లో బూతు బొమ్మలు చూస్తూ దొరికిపోయారు. విలువలకు తిలోదకాలిచ్చి పవిత్రమైన అసెంబ్లీలో మంత్రులు బూతు బొమ్మలు చూశారని తెలుగు చానల్స్ విలువల గురించి ప్రత్యేక కథనాలు ప్రసారం చేశాయి. ఐ న్యూస్ ఈ అంశంపై విలువలు బోధిస్తూ సెల్‌ఫోన్‌లోని ఆ బూతు బొమ్మలను చాలా సేపు చూపిన తరువాత కొన్ని గంటలు గడవకముందే రాత్రి పదకొండు గంటలకు ష్ గప్‌చుప్ పేరుతో బూతు దృశ్యాలను చూపే కార్యక్రమాన్ని ప్రసారం చేసింది. మిగిలిన చానల్స్ రాత్రి 11.30, 12 నుండి బూతు దృశ్యాలతో తమ విశ్వరూపాన్ని ప్రదర్శిస్తుండగా, ఐ న్యూస్ మాత్రం వారి కన్నా అరగంట ముందే బూతు పరుగులు తీస్తోంది. సాధారణంగా క్రీడా వార్తలు, రాజకీయ వార్తలు, క్రైం అంటూ వార్తలు కవర్ చేసేవారు అంశాల వారీగా విడివిడిగా ఉంటారు. అలానే మన చానల్స్‌లో నీతులు బోధించే విభాగం, అర్ధరాత్రి బూతులు చూపించే విభాగం వేరువేరుగా ఉండొచ్చు కానీ, అంతగా నీతులు చెప్పేవారు మరీ ఇంత పచ్చిగా బూతులు చూపడం నైతికంగా ఎంత వరకు సమర్ధనీయం.
కుటుంబం మొత్తం వార్తలు చూసే పది గంటల సమయంలో సైతం ఐ న్యూస్ ష్ గప్ చుప్ గురించి ప్రోమోలు చూపిస్తోంది. బూతు కార్యక్రమాలు చానల్స్ బతుకు పోరాటమో ఏమో? స్టూడియో ఎన్‌లో ఏకంగా బూతు సినిమాలు వేస్తున్నారు. రతినిర్వేదం లాంటి సినిమాలను ప్రసారం చేస్తున్నారు. సరే వీటికి సెన్సార్ బోర్డు వారు ఏ సర్ట్ఫికెట్ ఇచ్చారు, వీటిని చూపించడంలో తప్పేమీ కాదని వాదిస్తారేమో! సినిమాలే కాకుండా స్టూడియో ఎన్‌లో అర్ధరాత్రి బూతు దృశ్యాలు చూపిస్తున్నారు. కర్నాటక అసెంబ్లీలో మంత్రులు చూసిన బూతు బొమ్మలకు మించిన అశ్లీల దృశ్యాలు అర్ధరాత్రి తెలుగు చానల్స్‌లో కనిపిస్తున్నాయి. కొన్ని చానల్స్ సెక్స్ జ్ఞానం ముసుగులో బూతు చూపిస్తున్నారు.
కొన్ని తెలుగు చానల్స్ చివరకు ఇలాంటి కార్యక్రమాల కోసం యాంకర్‌లను సైతం రెచ్చగొడుతూ మాట్లాడేందుకు ప్రోత్సహిస్తున్నారు. చివరకు వారి దుస్తులు సైతం అలానే ఉంటున్నాయి. ఆ విషయం అడిగితే ఏ దృష్టితో చూసే వారికి ఆ విధంగానే కనిపిస్తుందని చెబుతారేమో! తెలుగు న్యూస్ చానల్‌లో నంబర్ వన్ స్థానం తమదే అని చెప్పుకుంటున్న ఎన్ టీవి సైతం ఇలాంటివాటినే నమ్ముకుంటోంది. సినీ కలర్స్ పేరుతో అర్ధరాత్రి వేడివేడి దృశ్యాలను రస ప్రియుల కోసం సమర్పిస్తున్నారు. తెలుగుతో పాటు ఇతర భాషల్లో శృంగార నృత్యాలను, దృశ్యాలను చూపిస్తున్నారు. ఇవి రెచ్చగొట్టే విధంగా ఉంటాయి. కనీసం ఇవి సెన్సార్ సర్ట్ఫికెట్ పొందిన సినిమాలోవి. కానీ ఈ పాటలు, దృశ్యాల మధ్యలో రెచ్చగొట్టే విధంగా ఉన్న బూతు దృశ్యాలను చూపిస్తున్నారు. టీవి 5లో సైతం ఇదే విధంగా ఏదో ఒక పేరుతో బూతు దృశ్యాలు చూపుతున్నారు. సంపన్నుల కుటుంబాలకు చెందిన వారు సైతం వ్యబిచారం చేస్తున్నారని, సుప్రీంకోర్టు న్యాయమూర్తి ఇటీవల ఆవేదన వ్యక్తం చేశారు.
ఆ ఒక్క మాట చాలు మన టీవి వాళ్లకు ఆ పేరుతో పనికి మాలిన దృశ్యాలను చూపిస్తూ నీతి కథలు చెప్పారు.
శరీరంలోని భాగాలకు బీమా చేయిస్తున్నారనో, జీరో ప్యాక్ బాడీ అనో ఏదో ఒక చిన్నమాట చాలు మన వారికి ఆ పేరుతో అశ్లీల దృశ్యాలను జొప్పించేస్తున్నారు.
ఎమ్మెల్యేలు, మంత్రులు కొలువై ఉండే అసెంబ్లీ పవిత్రమైనదే. అసెంబ్లీలో ఉండి సెల్‌ఫోన్‌లో బూతు దృశ్యాలు చూడడం తప్పే! మరి ఇంట్లో ఉండి కొన్ని కోట్ల మంది చూసే చానల్స్‌లో అర్ధరాత్రి పచ్చి బూతు దృశ్యాలను చూపించడం సరైనదేనా? రాజకీయ నాయకులకు విలువల గురించి పాఠాలు చెప్పే చానల్స్ వాటిని తాము పాటించాల్సిన అవసరం లేదా? కొంత కాలం క్రితం ఇదే విధంగా అర్ధరాత్రి సమయంలో బూతు సినిమాలు, సినిమాల్లోని కొన్ని దృశ్యాలు చూపించడంతో చానల్స్‌పై ఫిర్యాదులు వెళ్లాయి. ఆ తరువాత కొంత కాలం వాటి జోలికి వెళ్లలేదు. ఈ మధ్య ఇలాంటి దృశ్యాలు మరీ పెరిగిపోయాయి.
రాజకీయ నాయకులకు నీతులు చెబుతున్న చానల్స్ బూతు దృశ్యాల విషయంలో స్వయం నియంత్రణ కోసం ప్రయత్నించాలి. ఒకరిని చూసి ఒకరు పోటీ పడుతూ అర్ధరాత్రి బూతు చూపాల్సిందే అనే నిర్ణయానికి వచ్చారు. ఈటీవి రాత్రి పాత సినిమాలు ప్రసారం చేస్తుండగా, కొన్ని చానల్స్ మాత్రం బూతునే నమ్ముకున్నాయి.

జ్ఞాన శిక్షలు!....హిరోను కుక్కను చేసి పిల్లిలా వెంట తిప్పుకున్న విఠలాచార్య..... అత్తవారింటి కాపురం తో అల్లుడికి తత్వం బోధపడుతుంది

2012-02-08T10:05:00.000+05:30

సినిమాకు హీరో ఊపిరి. మరి అలాంటి ఊపిరికి ఆగ్రహం వస్తే, సినిమా ఊపిరి ఆగిపోతుంది. అందుకే హీరోలకు కోపం రాకుండా వాళ్లను కంటికి రెప్పలా, ఇంటికి అల్లుడిలా జాగ్రత్తగా చూసుకుంటారు. ఇలానే పాత కాలంలో ఒక హీరోగారికి కోపం వచ్చింది. ఇంకేం ఆ సినిమా ఊపిరి ఆగిపోయినట్టే అనుకున్నారు. దర్శకుడు మాత్రం అదేమీ పట్టించుకోకుండా తన పని తాను చేసుకుపోతున్నాడు. ఇంటావిడ అలిగి బతిమిలాడడానికి ఇంకా మొగుడు రాలేదేమిటని ఎదురు చూసినట్టుగా ఆ హీరో తనను బుజ్జగించేందుకు దర్శకుడు, నిర్మాత, యూనిట్ మొత్తం కట్టకట్టుకుని వస్తారని అనుకున్నాడు.
చాలా సేపు గడిచిపోయినా హీరో గారి అలకను పట్టించుకున్న వారు లేరు. పైగా సినిమా షూటింగ్‌ను ఒక్క నిమిషం కూడా ఆపలేదు. ఇదెలా సాధ్యమబ్బా అని ఆశ్చర్యపోయిన హీరో విషయం తెలుసుకుని లబోదిబోమంటూ ఇకపై ఎప్పుడూ అలగనని దర్శకుడికి రాయబారం పంపాడట! ఇది నిజంగా జరిగిందే. ఆ దర్శకుడు విఠలాచార్య. హీరో అలిగాడని తెలిసి ఆయన ఏ మాత్రం కంగారు పడకుండా హీరోను కుక్కను చేసినట్టు కథ మార్చేసి షూటింగ్ జరిపించారు. ఆయనే విఠలాచార్య. దయ్యాలను హీరోయిన్లుగా, కుక్కలు, నక్కలు, పాములుగా చేశారాయన. హీరోను కుక్కగా మార్చి, అందమైన హీరోయిన్ ఒళ్ళో కుక్క ఒదిగిపోయి తెగ నటించేస్తుంటే హీరో దారికి రాకుండా ఉంటాడా? హీరోయిన్ ఒళ్లో కుక్క కన్నా తానే బాగా నటించేస్తానని బతిమిలాడి మరీ దారికి వచ్చాడట హీరో. అందుకే బాబోయ్ విఠలాచార్యవి ఇదేం వింత శిక్షలు అని సినిమా వాళ్లు భయపడి, ఆయన ముందు పిల్లుల్లా ఉండేవారు.

ఇల్లరికంలో ఉన్న మజా అది అనుభవించితే తెలియునులే అంటాడు రేలంగి ఓ సినిమాలో. వాడికేం వాడిని అల్లుడిలా చూసుకుంటారు అంటారు కానీ శిక్షల్లో అత్తగారింటికి వెళ్లడానికి మించిన శిక్ష ఉండదని చాటిచెప్పే పురాతన కథ ఒకటి ఉంది.
సంస్కృత మహాకవుల్లో భారవి ఒకరు. కిరాతార్జునీయం వంటి మహాకావ్యం రాసిన భారవికి సంబంధించి పలు కథలు ప్రచారంలో ఉన్నాయి. చిన్న వయసు నుండే అపారమైన పాండిత్యాన్ని ప్రదర్శించిన భారవిని అంతా మెచ్చుకుంటుంటే, తండ్రి మాత్రం వాడి మొఖం వాడికేం తెలుసు అనేవాడు. మహామహా పండితులను ఓడించాక, ఘన సన్మానం తర్వాత కూడా భారవికి తండ్రి నుండి అవే మాటలు వినిపించాయి. ఒకసారి భారవి కోపాన్ని అణచుకోలేక తనను అభినందించడానికి బదులు అవహేళన చేస్తున్నాడని తండ్రిని ఇక మట్టుపెట్టక తప్పదనుకుని అదే విషయం తల్లికి చెబుతాడు. తొందరపడకు విషయం తెలుసుకుంటానని చెప్పి తల్లి ఈ సంగతి భర్తకు చెబుతుంది. తండ్రి కుమారుడిని మెచ్చుకుంటే ఆయువు క్షీణమవుతుందని, ఆ కారణం చేతనే మెచ్చుకోవడం లేదని భార్యకు చెబుతాడు. అసలు విషయం తెలిసిన తరువాత భారవి తన పాపానికి ప్రాయశ్చిత్తం చేసుకోవాలి. ఏం చేయాలని తండ్రిని అడుగుతాడు. ఎందుకొచ్చాను, ఎన్ని రోజులు ఉంటాను అనేది చెప్పకుండా ఏడాది పాటు అత్తవారింటిలో ఉండి రమ్మని భారవిని పంపిస్తాడు.

అల్లుడిని వారం పాటు బాగా చూసుకున్న అత్తామామ, బావ మరుదులు ఎంతకూ పోడేమిటని రెండు వారాల తరువాత ఇంటి పనులు చెప్పడం మొదలు పెట్టారు. ఆ తర్వాత పొలం పనులు చెబుతారు. ఒక కూలీ మాదిరిగానే భారవి పొలంలో పని చేస్తే, వారి మాదిరిగానే అతనికి తిండి పెడాతారు. కలం పట్టుకోవలసిన ఆ చేతులు హలం దున్నుతాయి. భార్య కన్నీరు మున్నీరై ఏడుస్తుంది. అలా ఏడాది గడిచిన తరువాత అప్పుడు భారవి భార్యతో కలిసి ఇంటికి బయలు దేరుతాడు. తాను చదివిన ఎన్నో గ్రంధాలు నేర్పించని జీవిత పాఠాలను ఏడాది పాటు అత్తగారింటిలో గడిపిన కాలంలో నేర్చుకున్నాని భారవి చెబుతాడు. భారవి తండ్రి నిజంగానే జీవిత సత్యాలు భాగా తెలిసిన వాడు. తన కుమారుడికి చిత్రమైన శిక్ష వేసి, శిక్షతో అతను మరింత రాటుదేలిపోయేట్టు చేశాడు.

ఒక్కోసారి శిక్షలు అద్భుతమైన జీవిత సత్యాలను బోధిస్తాయి. మార్క్‌ట్వైన్ సైతం అంతే కదా జైలు శిక్ష పడిన తరువాతనే అతనిలో ఒక అద్భుతమైన రచయిత బయటకు వచ్చారు. మన దేశ నాయకులు జైల్లోనే మంచి గ్రంథాలు రచించారు.
రాజు తప్పు చేయడు అని ఇంగ్లీష్ వాడు నమ్మినట్టు స్వాతంత్య్రం వచ్చాక అదే సూక్తిని ఐఎఎస్ బాబులు తప్పు చేయరు అని అనువదించుకున్నారు. తప్పు చేసినా అది రాజు చేశాడు కాబట్టి అది తప్పు కాదన్నమాట అందుకే రాజు తప్పు చేయడు అన్నారు. మరి తప్పు చేశారు కదయ్యా! ఆధారాలున్నాయి కదా? అని ప్రశ్నిస్తే, మమ్మల్ని బెదిరించి తప్పు చేయించారు, లేకపోతే మేం తప్పు చేయడం ఏమిటంటూ ఎదురు ప్రశ్నిస్తున్నారు.

పాలించేది మంత్రులు మేమంతా నిమిత్తమాత్రులం అంటున్నారు. ఐఎఎస్‌లకే అన్నీ తెలుసు అని మొన్నటి వరకు గట్టిగా నమ్మిన వారు ఇద్దరు ముగ్గురు జైలుకెళ్లగానే మాకేం తెలుసు అంటున్నారు. ఏమీ తెలియదంటున్న ఐఎఎస్ బాబులు ఇప్పుడు జైలుకు వెళ్లి బోలెడు చదువుకుని, అన్నీ తెలుసుకుని వస్తే సరిపోతుంది. అధికారాంతమున చూడవలె అన్నట్టు శిక్షల భయంతో అటు నేతలు, ఇటు బాబులు మాకేమీ తెలియదంటే మాకేమీ తెలియదని అజ్ఞానంలో పోటీ పడుతున్నారు. బుద్ధుడికి బోధి వృక్షం కింద జ్ఞానోదయం అయినట్టు కొందరికి శిక్షలతో జ్ఞానోదయం అవుతుంది. జ్ఞానశిక్షలకు మించిన శిక్ష లేదు.

జయమాలినిని కలువ లేరా ? రమణారెడ్డి సమకాలీనులు లేరా ?

2012-02-07T08:38:00.000+05:30

సినిమాలో ఒక వెలుగు వెలుగుతున్న తారలు కావచ్చు, కాలం చేసి రెండు మూడు దశాబ్దాలు గడిచిపోయి ఉండొచ్చు. నటుల జన్మదినం అయితే ఘనంగా శుభాకాంక్షలు, జయంతి దినోత్సవం అయితే ఘనంగా నివాళి లభిస్తోంది. ఆ కాలం సినిమా వాళ్లు ఏదో ఒకనాడు తమను ఇంతగా గుర్తుంచుకుంటారని ఊహించి ఉండరు. తెలుగు చానల్స్ పుణ్యమా? అని నాటి తరం సినిమా వాళ్లను ఇప్పుడు మళ్లీ స్మరించుకునే అవకాశం లభిస్తోంది.

రమణారెడ్డి అంటే ఎవరు? అని ఈ తరం వాళ్లు ప్రశ్నార్థకంగా ముఖం పెట్టి అడగొచ్చు. ఇప్పటి వాడా? ఆయన మరణించి మూడు దశాబ్దాలు అవుతుంది. అంటే ఆయన పోయాక మూడు తరాలు వచ్చాయన్నమాట. ఇక నేటి తరానికి ఆయనేం గుర్తుంటారు. కానీ పాత తరం వాళ్లు, పాత సినిమాలను ఇష్టపడే నేటి తరం వారికి రమణారెడ్డి పేరు వినగానే ముఖం నవ్వులతో వికసిస్తుంది. హాస్యనటునిగా తెలుగు సినిమాల్లో ఆయన రూటే వేరు అన్నట్టుగా ఉంది. ఫేవరేట్ 5 పేరుతో టీవి5లో పాత తరం నటుల గురించి చక్కని కార్యక్రమాన్ని ప్రసారం చేస్తున్నారు. అద్భుతమైన పాత సినిమాల గురించి, దర్శకులు, నిర్మాతలు, హీరోలు, హీరోయిన్లు, హాస్యనటులు, గాయనీ గాయకులు అందరి గురించి ఈ కార్యక్రమంలో పాత సినిమాల క్లిప్పింగులతో ప్రసారం చేస్తున్నారు. రమణారెడ్డిపై ప్రత్యేక కార్యక్రమాన్ని ప్రసారం చేశారు. మరోసారి పాత సినిమాల్లో అతని నటన చూసే అవకాశం కల్పించారు. బాగానే ఉంది కానీ రమణారెడ్డి గురించి వీకీపిడియాలో ఏముందో అది చదివి వినిపించారు. పాత సినిమాల క్లిప్పింగులు, వీకీపిడియాలోని సమాచారం చదవడం అంతేనా? ఇంటర్‌నెట్‌లోని సమాచారాన్ని ఉపయోగించుకోవడం తప్పేమీ కాదు. ఈ రోజుల్లో ఉపయోగించుకోకపోతేనే తప్పేమో! ప్రాథమిక సమాచారం నెట్ నుంచి తీసుకున్నా టీవిలో ప్రత్యేక కార్యక్రమాన్ని రూపొందించేప్పుడు సొంతంగా కొంత సమాచారాన్ని సేకరించి కార్యక్రమాన్ని రూపొందిస్తే మరింత ఆకట్టుకునేది. చాలా సినిమా కార్యక్రమాలకు పెద్దగా శ్రమించకుండా ఇలా అరకొర సమాచారం, ఐదారు సినిమాల క్లిప్పింగులతో ముగించేస్తున్నారు. పాత సినిమాల గురించి, పాత తరం నటుల గురించి టీవిలో చూపిస్తున్నందుకు అభినందనలు.

అదే సమయంలో ఇలాంటి కార్యక్రమాలు కొంత శ్రమించి రూపొందిస్తే మరింత అద్భుతంగా ఉంటాయి.
‘ ఆ శరీరం రబ్బరు బొమ్మ తిరిగినట్టు, చేతులు కాళ్లు కావలసిన రీతిలో ఆడించేది. దబ్బున కూలిపోవడం, దబాలున పడిపోవడం రమణారెడ్డికే సాధ్యమైనట్టు తక్కిన వాళ్లకి సాధ్యమయ్యేది కాదు’ అని రమణారెడ్డి గురించిన అభిప్రాయాన్ని సైతం వికీపీడియా నుంచి మక్కీకి మక్కి తీసుకోవాలా?

రమణారెడ్డి ఆరు దశాబ్దాల క్రితం సినిమా రంగ ప్రవేశం చేశారు. మూడు దశాబ్దాల క్రితం మరణించారు. అయితే అతను సినిమాల్లో నటించేప్పుడు ఆయనతో పాటు నటించిన కొంత మంది నటీనటులు ఇప్పుడు లేకపోలేదు. వారితో రమణారెడ్డి గురించి మాట్లాడి కార్యక్రమాన్ని రూపొందిస్తే బాగుండేది. ఆనాటి హీరోయిన్ గీతాంజలి, రావికొండల రావు దంపతులతో పాటు చాలా మంది ఉన్నారు. రావి కొండల రావు ఆనాటి అద్భుతమైన సినిమాల గురించి, నటీనటుల గురించి చక్కని వ్యాసాలు రాస్తున్నారు. ఇలాంటి వారిని కలిసి రమణారెడ్డి నటన గురించి మాట్లాడితే, కార్యక్రమానికి నిండుదనం వచ్చేది. ఏదో మొక్కుబడిగా ఇంటర్‌నెట్‌లో లభించే సమాచారంతో వ్యాఖ్యానం, పాత సినిమాల సిడిల నుంచి కొన్ని క్లిప్పింగ్స్ తీసుకుంటే చాలు. కానీ ఇంత కన్నా బాగుండాలి అనుకుంటే సొంత శ్రమ కూడా కొంత చేస్తే బాగుంటుంది. బ్రహ్మానందం జన్మదినం రోజున తెలుగు చానల్స్ ఇలానే కొన్ని సినిమాల క్లిప్పింగ్స్‌తో చేతులు దులుపుకున్నాయి. బ్రహ్మానందం ఉండేది భాగ్యనగరంలోనే కదా ఆయనతో మాట్లాడించవచ్చు, ఆయన తోటి నటులతో మాట్లాడించవచ్చు.

జయమాలిని ఒకప్పుడు తెలుగు సినిమాలను తన ఒంపు సొంపులతో ఒక ఆట ఆడించిన నటి. ఆమె సినిమాల్లో వచ్చిన కొత్తలో అప్పటి చాలా మంది హీరోయిన్ల కన్నా అందంగా ఉండేది. కానీ మొదటి నుంచి వాంప్ పాత్రలకే పరిమితమయ్యారు. జయమాలిన తన ఆత్మకథ రాసుకుంటున్నారని నాలుగైదేళ్ల క్రితం ఇంటర్‌నెట్‌లో ఒక వార్త ప్రచారంలోకి వచ్చింది. ఆ వార్తను జయమాలిని ఖండించలేదు, నిజమే అని చెప్పలేదు. జయమాలిని జన్మదినం సందర్భంగా ప్రతి సారి ఆ వార్తనే అటూ ఇటూ తిప్పి కథనాలు ప్రసారం చేస్తున్నారు. జయమాలిని ఆత్మకథ అంటే ఆసక్తి ఉండడం సహజమే. సిల్క్‌స్మిత కన్నా జయమాలిని ఎక్కువ కాలం తెలుగు సినిమాలపై తన ప్రభావం చూపించారు. అలాంటి జయమాలిని ఇప్పుడు ఏం చేస్తోంది? ఎక్కడుంది అనే ఆసక్తి తెలుగు సినిమా అభిమానులకు తప్పకుండా ఉంటుంది. జయమాలిని ఆత్మకథ రాస్తున్నారనే వార్త ఇంటర్‌నెట్‌లో దర్శన మిస్తే, తెలుగు చానల్స్ స్వయంగా ఆమెను కలిసి మాట్లాడేందుకు ప్రయత్నించవచ్చు కదా. ఇంటర్‌నెట్ వార్తను పట్టుకుని ఎన్ని సార్లు నడిపిస్తారు. ఆమె ఉండేది చెన్నై నగరమే. అదేమీ చానల్స్ వాళ్లు వెళ్లకూడని మరో ఖండమేమీ కాదు. పొరుగు రాష్టమ్రే కదా? కానీ అంత ఓపిక చానల్స్‌కు ఎక్కడిది? పాత సినిమాల్లో జయమాలిని క్లిప్పింగులతో అరగంట కథ నడిపించేయగలరు. ఆది బాగానే ఉంటుంది. కానీ చెన్నై వెళ్లి ఆమెతో మాట్లాడి ప్రత్యేక కథనాన్ని రూపొందిస్తే అది మరింత ఆసక్తికరంగా ఉంటుంది.

ఏది విజయం

2012-02-05T18:09:00.003+05:30

జగన్ కు అయిదున్నర లక్షల వోట్ల మెజారిటీ వచ్చింది. ( ఆయన లక్ష కోట్లు అక్రమంగా సంపాదించాడనే ఆరోపణ ఉంది . ఇందులో పది శాతం అన్నా నిజం కావచ్చు) ఎప్పుడూ చూసిన ఒక ముతక బట్ట సంచితో కనిపించిన వావిలాల గోపాల క్రిష్నయ్య ఎన్నికల్లో వొడి పోయారు . ఎన్నో కళాత్మక సినిమాలు అట్టర్ ప్లాప్ అయ్యాయి. బూతు మాటలు,బూతు పాటల సినిమాలు హిట్టయ్యాయి. (పేరు గుర్తుకు రావడం లేదు విశ్వనాద్ కళాత్మక సినిమా ఒకటి విడుదలకే నోచుకోలేదు . రాజకీయాల్లోకి రాక ముందు తన జీవితం లో ఎప్పుడూ ఏ ఉద్యమం లో పాలు పంచుకొని చంద్రబాబు రాష్ట్రం లో అత్యదిక కాలం ముఖ్యమంత్రిగా ఉన్నారు( విద్యార్తి గా ఉన్నప్పుడు విద్యార్థి సంఘం లో కుల రాజకీయాలు నడపడం ఉద్యమం కాదు ) ఇక ఇప్పుడు కాబోయే సి యం రేస్లో జగన్ బాబు ఉన్నారు. వీరిద్దరిలో ఎవరితో పొత్తు పెట్టుకోవాలా ? అని కమ్యునిస్టులు ఎదురు చూస్తున్నారు .. ఒక వ్యక్తి అయినా , ఒక పార్టీ అయినా ...సిద్ధాంతం అయినా ? విజయం సాధిస్తేనే మంచిదని, గొప్పదని భావించాలా ? ఏది విజయమో నేను చెప్పడం లేదు . ఏది విజయమో తెలుసుకోవాలనుకుంటున్నాను . ఇంతకూ

మధురవాణి..చింతామణి..సామాజిక న్యాయం

2012-02-01T08:10:00.000+05:30

‘‘వా’నాకు అది కావాలి అని ఆరేళ్ల బాబిగాడు కాళ్లు నేలకేసి కొట్టుకుంటున్నాడు. కావాలంటే క్యాడ్‌బరీ తీసుకో అని తాత పరంధామయ్య వాడిని సముదాయించడానికి ప్రయత్నిస్తున్నాడు. వాడేమో ఏడుపు శృతి పెంచాడు. తినే వస్తువు కాకపోతే టీవిలో అంత మంది ప్రముఖులు అదే మాటను మళ్లీ మళ్లీ ఎందుకు చెబుతున్నారని ప్రశ్నించాడు. పదే పదే ఒకే మాట వినిపిస్తే అది కచ్చితంగా యాడ్ అని, యాడ్ అంటే తినే వస్తువే అనేది వాడు నమ్మిన సిద్ధాంతం. ‘‘నాన్నా వాడేదో అడుగుతున్నాడు ఇవ్వోచ్చు కదా?’’ అని లోపలి నుంచి కూతురు ఆదేశించింది. ‘‘అది కాదమ్మా వాడేమడుగుతున్నాడో మీకు తెలుసా?’’ అని తండ్రి మాటను పూర్తి చేయక ముందే, ‘‘తెలుసులే నాన్నా వాడేమన్నా నీ కొడుకు కొడుకు కాదు కదా! కూతురు కొడుకు కదా? ఇలానే ఉంటుందిలే’’ అని కూతురు ముక్కు చీదుకుంటూ వంట గది నుంచే నిష్టూరంగా పలికింది.

‘‘ఇదిగో మిమ్మల్నే.. రిటైర్ అయి పని పాటా లేకుండా ఇంట్లోనే ఉన్నారు కదా? మనవడు అడిగింది కొనివ్వలేరా?’’ అని అక్కడి నుంచే కూతురుకు మద్దతుగా భార్య గర్జించింది. పరిస్థితి చేయి దాటి పోయేట్టుగా ఉందని కంగారు పడ్డ పరంధామయ్య పదరా బుజ్జి నువ్వడిగింది ఇస్తాను అని బయటకు నడుస్తూ, వాడికి సామాజిక న్యాయం కావాలట! టీవిలో కనిపించిన ప్రతి ఒక్కరు, సామాజిక న్యాయం... సామాజిక న్యాయం అంటుంటే. వీడేమో అదేదో తినే వస్తువు అనుకుంటున్నాడు.అని పరంధామయ్య చెప్పాడు.

***
ఏమిచ్చినా బాబిగాడు ఊరుకోవడం లేదు. సామాజిక న్యాయమే కావాలంటున్నాడు. మిత్రులకు ఫోన్ చేసి పార్క్‌కు రమ్మన్నాడు పరంధామయ్య. సామాజిక న్యాయం కంటికి కనిపించేది కాదురా బుజ్జి అని బుజ్జగిస్తూ చెప్పాడు. కనిపించక పోతే ప్రతి ఒక్కరూ అదే ఎందుకు చెబుతారు? నాకు సామాజిక న్యాయం కావాలి అని మళ్లీ ఏడుపు అందుకున్నాడు. ఇంతలోనే మిత్రులు రావడంతో బుజ్జిగాడి సమక్షంలోనే మిత్రులంతా సామాజిక న్యాయంపై చర్చ మొదలు పెట్టారు. ‘‘నాకు తెలిసి ఎన్టీఆర్ చేసిన సామాజిక న్యాయం మరెవ్వరూ చేయలేదు. షష్టిపూర్తి + డజను సంవత్సరాల వయసులో తమ వర్గం శ్రీమతినే పెళ్లి చేసుకున్న దాన్ని మించిన సామాజిక న్యాయం ఏముంటుంది?’’ అని ఎన్టీఆర్ అభిమాని చెప్పుకొచ్చాడు. ‘‘అసలు సామాజిక న్యాయం అనే పదానికి గ్లామర్ తీసుకు వచ్చిందే మా చిరంజీవి, ఓట్లు మా వాళ్లే వేశారు, సీట్లు మా వాళ్లే గెలుచుకున్నారు, మంత్రి పదవులు మా వాళ్లకే ఇప్పించుకున్నాం ఇంతకు మించిన సామాజిక న్యాయం ఏముంటుంది’’ అని చిరు అభిమాని ప్రశ్నించాడు.

‘‘ వైఎస్‌ఆర్ హయాం ఆయన తన ప్రత్యర్థి సామాజిక వర్గాల వారిని సైతం తన కోటరీలో చేర్చుకున్నారు. ఇంతకు మించిన సామాజిక న్యాయం ఇంకేముంటుంది అదే దారిలో జగన్ పయనిస్తున్నారు. వారిని మించిన సామాజిక న్యాయం ఇంకెక్కడుంటుంది’’ అని ఆయన అభిమాని సూటిగా ప్రశ్నించారు. సామాజిక న్యాయం, బాబు ఒకరి కోసం ఒకరు పుట్టారు. అతుక్కొని పుట్టిన వీణావాణి కవలపిల్లల మాదిరిగా బాబు సామాజిక న్యాయం కలిసే పుట్టాయి. వాటిని విడదీయడం ఎవరికీ సాధ్యం కాదని పచ్చ చొక్కా ఆయన ఆవేశంగా పలికాడు. అల్లుడు, మేనల్లుడు, కూతురు వీరి కోసం తపించడాన్ని మించిన సామాజిక న్యాయం ఏముంటుంది సామాజిక న్యాయంలో కెసిఆర్‌ను మించిన వారు లేరని ఇంకొకాయన బల్లగుద్ది చెప్పాడు.

మీరంతా మీమీ సామాజిక వర్గాం వారి గొప్పలు చెప్పుకుంటూ అజ్ఞానంతో మాట్లాడుతున్నారు. గతి తార్కిక భౌతిక వాదం గురించి అవగాహన లేని బూర్జువా శక్తులు మాత్రమే ఇలా మాట్లాడగలవు. మీకు దధీచి తెలుసా? అని ఎర్రన్న సీరియస్‌గా అడిగాడు. వాడెవడు రష్యన్ కమ్యూనిస్టు నాయకుడా? అని ఓ పెద్దాయన ఎద్దేవా చేశాడు. ఒక రకంగా ఆయన పూర్వపు కమ్యూనిస్టు. దధీచి తన వెన్నుముకను ఇంద్రుడికి ఇస్తే, దాంతో ఇంద్రుడు వంద అంచులు గల వజ్రాయుధాన్ని చేసుకొన్నాడు. ఇంద్రుడి ఆయుధం కోసం దధీచి తన వెన్నుముకను ఇస్తే కమ్యూనిస్టు సోదరులు పువ్వాడ నుంచి రాఘవులు వరకు చంద్రుడి కోసం తమను తానే ఆర్పించుకున్నారు. సామాజిక వర్గ ప్రయోజనాల కోసం సొంత పార్టీని త్యాగం చేసి తెలుగు పార్టీ పల్లకీని మోసిన మా ఎర్రన్నలను మించిన సామాజిక న్యాయం ఎక్కడుంది ఎర్రాభిమాని ప్రశ్నించాడు.

ఏరా కపాలేశ్వర్ నువ్వేమంటావు. ప్రతి దానికి కన్యాశుల్కం గురించి చెబుతావు కదా? అని పరంధామయ్య సన్నిహిత మిత్రున్ని అడిగాడు. నాకు మాత్రం మధురవాణి, చింతామణిలు గుర్తుకొస్తున్నారు. గిరీశం మొదలు లుబ్దావధాన్లు వరకు అందరినీ సమానంగా ఆదరించిన మధురవాణి, భవానిశంకర్ నుంచి సుబ్బిశెట్టి వరకు అందరినీ సమానంగా ఆదరించిన చింతామణిని మించి సామాజిక న్యాయం చేసినవారు ఎవరున్నారని కపాలేశ్వర్ పకపకా నవ్వాడు.

ఏడవాలో, ఏడుపు నిలిపివేయాలో నిర్ణయించుకోలేక బుజ్జిగాడు ఆయోమయంలో పడిపోయాడు.

హిందీ చానల్స్ రియాల్టీ షో లో హీరోలు .. తెలుగు టీవిలో రాణిస్తున్న కమేడియన్లు

2012-01-31T08:36:00.002+05:30

హిందీ చానల్స్‌లో పలువురు హీరోలు పలు రియాల్టిషోలను విజయవంతంగా నిర్వహిస్తుంటే, తెలుగులో మాత్రం కమెడీయన్లు ఈ పాత్రను పోషిస్తూ, పలు తెలుగు చానల్స్‌లో సందడి చేస్తున్నారు. సినిమాల్లో అవకాశాలు లేని వారు టీవి వైపు చూడడం కాదు. సినిమా రంగంలో నంబర్ వన్‌గా నిలిచిన వారు సైతం హిందీలో టీవిల్లో కార్యక్రమాలు నిర్వహిస్తున్నారు. అమితాబ్ మొదలుకొని షారుఖ్ ఖాన్ వరకు చాలా మంది ప్రముఖ హీరోలు హిందీలో చిన్నతెరపై కనిపిస్తున్నారు. కనీసం టీవి రియాల్టీ షో లోనైనా భేషజాలు లేకుండా హీరోలు ఒకరి కార్యక్రమాల్లో ఒకరు పాల్గొంటున్నారు. కలిసి నృత్యం చేస్తున్నారు, హిందీ హీరోలు కామెడీ పండిస్తున్నారు.

తెలుగు చానల్స్‌కు విషయానికి వస్తే, ధర్మవరపు సుబ్రమణ్యం బాటలో మరి కొందరు కమెడియన్లు టీవిల్లో కార్యక్రమాల్లో బాగానే రాణిస్తున్నారు. ఎవిఎస్, అలీ, శివారెడ్డి టీవిల్లో హడావుడి చేస్తున్నారు. ధర్మవరపు సుబ్రమణ్యం కన్నా చాలా ముందే హాస్యనటి శ్రీలక్ష్మి టీవిలో కొద్ది రోజులు ఇలాంటి కార్యక్రమానే్న నిర్వహించారు. సినిమాల్లో అవకాశాలు తగ్గిన తరువాత ఆమె కొంత కాలం కనుమరుగై టీవిలో దర్శన మిచ్చారు. కార్యక్రమంలో కామెడీని బాగానే పండించారు. మళ్లీ ఎందుకో కనిపించకుండా పోయారు. ఆ తరువాత సాక్షిలో ధర్మవరపు సుబ్రమణ్యం డింగ్ డాంగ్ బాగానే ప్రేక్షకులను ఆకట్టుకుంటోంది. రాజకీయ ఉద్దేశాలు, లక్ష్యాలు చానల్‌కు ఉన్నా, తనకున్న పరిధిలో కార్యక్రమాన్ని బాగానే రూపొందిస్తున్నారు. ఐ న్యూస్‌లో హాస్యనటులు ఎవిఎస్ న్యూసెన్స్ అంటూ ఇంటర్వ్యూలు నిర్వహిస్తున్నారు. ఎవిఎస్ హాస్యనటునిగా సినిమా రంగం ప్రవేశానికి ముందు జర్నలిస్టు. సహజంగా ఒకసారి జర్నలిస్టు అయిన వారికి ఆ వాసనలు పొమ్మన్నా పోవు. ఆయన టీవిలో నిర్వహిస్తున్న న్యూసెన్స్‌లో సైతం ఆ లక్షణాలు కనిపిస్తున్నాయి. ఇంటర్వ్యూ తరహాలో కాకుండా ఒక హాస్యనటుడు నిర్వహించే కార్యక్రమంలో ప్రేక్షకులు మరింత వినోదాన్ని కోరుకుంటున్నారు. దాని కోసం ఎవిఎస్ ప్రయత్నిస్తే బాగుంటుంది.

శివారెడ్డి జీ తెలుగులో చిత్తం ప్రాయశ్చిత్తం అంటూ కొంత హడావుడి చేస్తున్నారు. ఒక సినిమాలో అలీ చెప్పిన కాట్రవెల్లి అనే చిత్రమైన మాట బాగా పాపులర్ అయింది. అదే పేరుతో అలీ కార్యక్రమం సాగుతోంది. తెలుగువారిలో హస్య ప్రియత్వం తక్కువ అనే అపవాదు ఉంది. కానీ తెలుగులో వచ్చినన్ని హాస్య ప్రధానమైన సినిమాలు మరే భాషలోనూ రాలేదు. నరేష్, రాజేంద్ర ప్రసాద్ దాదాపు రెండు దశాబ్దాల పాటు హాస్యనటులుగా ఒక వెలుగువెలిగారు. తరువాత ఆ వారసత్వాన్ని అల్లరి నరేష్ అందిపుచ్చుకున్నారు. చివరకు ఇప్పుడు మహేష్ లాంటి హీరో సైతం కామెడీ నటనతో హీరోయిజాన్ని పండించక తప్పని పరిస్థితి. సినిమాల్లో హాస్యం విషయంలో చాలా ముందున్న మనం టీవిలకు వచ్చే సరికి చాలా వెనకబడి ఉన్నాం. హిందీలో కెబిసి, బిగ్‌బాస్ తరహాలో హాస్య కార్యక్రమాలకు పాపులారిటీ ఉంది. హిందీలో కామెడీ ప్రొగ్రామ్‌ను చూసి ఒకటి రెండు తెలుగు చానల్స్ జోక్స్ చెప్పే కార్యక్రమాన్ని రూపొందించినా, జోక్స్ చదవడం వేరు కామెడీ ప్రొగ్రాం వేరు అని గ్రహించకుండా కార్యక్రమాలు రూపొందించడం వల్ల పెద్దగా ఆకట్టుకోలేదు.
ఇప్పుడిప్పుడే తెలుగు కమేడియన్లు టీవి కార్యక్రమాల్లో రాణిస్తున్నారు. హీరోల పరిస్థితి మాత్రం వేరుగా ఉంది.

మన తెలుగు హీరోలది మాత్రం ఎవరి సామ్రాజ్యం వారిదే, వారి సామ్రాజ్యంలో వారే రారాజులు, ఇంకో హీరో పొడ వారికి గిట్టదు. ఇటీవల ఇద్దరు మాజీ ప్రముఖ హీరోలు తిట్టుకుంటున్న మాటలను వింటుంటే మన హీరోల మధ్య సంబంధాలు ఎలా ఉంటాయో తెలుస్తుంది. చివరకు తెలుగు సినిమా పండగ నిర్వహించినా అక్కడ కీచులాట తప్పలేదు. కులాల వారీగా, కుటుంబాల వారీగా, పార్టీల వారీగా మన హీరోలు విడిపోయారు. ఒకరంటే ఒకరికి అస్సలు పడదు. కనీసం గతంలో ఫలానా హీరో అంటే నాకెంతో అభిమానం మా సినిమా వాళ్లం అంతా ఒక కుటుంబంలా కలిసిమెలిసి ఉంటాం అనే చిలకపలుకల ఇంటర్వ్యూలు పత్రికల్లో కనిపించేవి. ఇప్పుడు టీవిల పుణ్యమా అని వీరి అనుబంధం ఎంత మధురమైనదో, ఉమ్మడి కుటుంబం మాదిరిగా ఎలా కలిసిమెలిసి ఉంటారో చూసే భాగ్యం లభించింది. ఈ వారం బాలకృష్ణ చిరంజీవిల స్టార్ వార్‌కు టీవిలు ప్రాధాన్యత ఇచ్చాయి. బాలకృష్ణ తొడ గొడుతూ, వాడెవడో నన్ను చిన్నపిల్లాడు అన్నాడు... మా నాన్న కాలి గోటికి సరిపోడు అంటూ సినిమా డైలాగులు వినిపించారు. అబ్బే మా సినిమా వాళ్ల మధ్య ఎలాంటి గొడవలు లేవు, అదంతా మీడియా సృష్టి, బాలకృష్ణ, చిరంజీవి మంచి మిత్రులు అని సినిమా పెద్ద మురళీ మోహన్ చెప్పుకొచ్చారు. బాలకృష్ణ తిట్టినప్పుడు అన్ని చానల్స్ ఆ వార్తలకు ప్రాధాన్యత ఇచ్చాయ. ప్రాయోజిత కార్యక్రమమో, పెయిడ్ న్యూసో విషయం తెలియదు కానీ బాలకృష్ణ వీరాభిమాని రూపొందించిన ప్రత్యేక కార్యక్రమం తరహాలో ఉంది ఎన్ టీవిలో బాలకృష్ణపై శనివారం ప్రసారం చేసిన ప్రత్యేక వార్తా కథనం. ఆయన దూకుడుగా వెళుతున్నారు, ఆచితూచి వెళుతున్నారు, తెలంగాణలో సైతం తిరిగేందుకు సిద్ధం అని చెప్పడం ద్వారా తాను ఎంత దూకుడుగా ఉన్నది స్పష్టమవుతోంది అని పొగడ్తలతో ముంచెత్తారు. మా తండ్రి కాలి గోటికి సరిపోడు, వాడు వీడు అనడం ఆచితూచి మాట్లాడడమా? దూకుడంటే ఇదేనా? ఎన్‌టివి వారికే తెలియాలి. ఎవరేమన్నా అదే స్థాయిలో స్పందించే బాలకృష్ణ లక్ష్మీపార్వతి విషయంలో మాత్రం దూకుడుగా వ్యవహరించలేదు అభినందించారు. దూకుడుగా మాట్లాడినా వీరికి ముచ్చటేస్తుంది, మాట్లాడకపోయినా ముచ్చటేసిందన్నమాట! టిడిపి వర్గాలు సమాచారం ప్రకారమే బాలకృష్ట గురించి చిరంజీవి మామూలుగానే మాట్లాడుతూ చిన్నపిల్లల మనస్తత్వం అన్న దానికి బాలకృష్ణ అదే విధంగా సెటైర్‌గా మాట్లాడితే సరిపోయేది, వ్యక్తిగతంగా దూషణకు దిగాడనే అభిప్రాయం ఏర్పడింది అని టిడిపి నాయకులే చెబుతున్నారు. బహుశా ఇలాంటి అభిప్రాయం ఏర్పడడంతో పాజిటివ్ ప్రచారం కోసం ప్రయత్నాలు సాగించినట్టుగా ఉంది, దానిలో భాగంగానే ఈ ప్రత్యేక కథనం వచ్చిందేమో! అయితే సినిమా వాళ్లకు సంబంధించి ఏది స్పాన్సర్డ్ ప్రోగ్రామో, ఏది టీవి వాళ్లు రూపొందించిన కార్యక్రమమో తెలియదు. వారే చెబితే బాగుంటుంది. సిగరెట్ తాగడం ఆరోగ్యానికి హానికరం అంటూ సిగరెట్‌పై కనిపించీ కనిపించకుండా ముద్రించినట్టుగా కనీసం చిన్న అక్షరాలతో స్పాన్సర్డ్ ప్రోగ్రాం అని వేసే ప్రయత్నం చేయాలి
.

అధికారం లో ఉన్నప్పుడు బుర్ర పని చేయదు. కళ్ళు కనిపించవు . అందుకే ఉద్యమాల గోడు వినిపించదు ... వస్త్ర వ్యాపారుల9 రోజుల బంద్ .

2012-01-27T08:33:00.002+05:30

వారం రోజుల బంద్ అంటూ సాధారణంగా ఈశాన్య రాష్ట్రాల గురించి వింటుంటాం. ఢిల్లీలో చీమ చిటుక్కుమన్నా, ముంబాయిలో హీరోయిన్ గర్భవతి అయినా గంటల తరబడి జాతీయ చానల్స్ మొత్తం స్పందిస్తాయి. ఎక్కడో మూలపడేసినట్టు ఉండే ఈశాన్య రాష్ట్రాల్లో ఒకటి రెండు వారాలు కాదు ఏకంగా నెలల పాటు బంద్ జరిగినా మనకు పెద్దగా పట్టదు. కానీ ఇప్పుడు చివరకు మన రాష్ట్రంలో సైతం సరిగ్గా అలాంటి పరిస్థితులే కనిపిస్తున్నాయి. ఒకటి కాదు రెండు కాదు ఏకంగా తొమ్మిది రోజుల బంద్‌కు వస్త్ర వ్యాపారులు పిలుపు ఇచ్చారు. నాలుగు రోజుల నుండి బంద్ పాటిస్తున్నారు. వారి డిమాండ్లలో న్యాయం ఉందా? లేదా? డిమాండ్ ఆమోదిస్తే లాభమెంత? నష్టమెంత అనే చర్చ తరువాత విషయం. ముందు వారి బంద్‌పై స్పందించాల్సిన బాధ్యత ప్రభుత్వానికి లేదా?

బట్టలపై ఐదు శాతం వ్యాట్ విధించడాన్ని ఎత్తివేయాలని డిమాండ్ చేస్తూ గత కొన్ని నెలల నుండి వస్త్ర వ్యాపారులు ఆందోళన చేస్తున్నారు. ప్రభుత్వం నుండి కనీస స్పందన లేకపోవడంతో ఏకంగా తొమ్మిది రోజుల పాటు బంద్‌కు పిలుపు ఇచ్చారు. సోమవారం నుండి రాష్ట్రంలో వస్త్ర వ్యాపారుల బంద్ సాగుతోంది. ఏ ఒక్క మంత్రి స్పందించలేదు, ప్రభుత్వం నుండి కనీస స్పందన లేదు. రాజధాని నగరంతో పాటు రాష్ట్ర వ్యాప్తంగా అన్ని పట్టణాల్లో వస్త్ర వ్యాపారులు బంద్ పాటిస్తున్నారు. ఏకంగా రాజధానిలో భారీ ప్రదర్శన నిర్వహించారు. సోమవారం నుండి ఇందిరాపార్క్ ధర్నా చౌక్ వద్ద రిలే నిరాహార దీక్షలు జరుపుతున్నారు. దేశంలో మరే రాష్ట్రంలోనూ వస్త్రాలపై వ్యాట్ విధించడం లేదు. ఒక్క మన రాష్ట్రంలో మాత్రం ఐదు శాతం వ్యాట్ విధిస్తున్నారు. ఏ వస్తువుపై పన్ను ఉన్నా దాన్ని భరించాల్సింది చివరకు వినియోగదారుడే. మన కన్నా ముందు ఒరిస్సా, జార్ఖండ్, రాజస్థాన్, తమిళనాడు రాష్ట్రాల్లో వస్త్రాలపై వ్యాట్ విధించారు. అయితే వస్త్ర వ్యాపారులు వ్యతిరేకించడంతో వారి వాదనను మన్నించి ఆయా రాష్ట్ర ప్రభుత్వాలు వ్యాట్‌ను రద్దు చేశాయి. కానీ మన రాష్ట్రంలో మాత్రం ఎంత తీవ్ర స్థాయిలో వస్త్ర వ్యాపారులు ఉద్యమిస్తున్నా ప్రభుత్వం కనీసం స్పందించడం లేదు.

తొలుత జివో ఎంఎస్ నంబర్ 932 ద్వారా వస్త్రాలపై రాష్ట్రంలో 8.7.2011న నాలుగు శాతం వ్యాట్ పన్ను విధించారు. దీన్ని వస్త్ర వ్యాపారులు వ్యతిరేకించారు. అనంతరం ప్రభుత్వం 14.9.2011 నుంచి ఐదు శాతానికి పెంచింది. ఐదు శాతం వ్యాట్ వల్ల ఏటా కనీసం ప్రజలపై 14వందల కోట్ల రూపాయల వరకు భారం పడుతుందని వస్త్ర వ్యాపారులు చెబుతున్నారు. దేశంలో ఎక్కడా వస్త్రాలపై వ్యాట్ లేనప్పుడు ఒక్క మన రాష్ట్రంలో మాత్రమే విధించడం వల్ల రాష్ట్రంలోని వస్త్ర వ్యాపారంపై తీవ్ర ప్రభావం పడుతుందనేది వీరి ఆందోళన. వ్యాట్‌ను వ్యతిరేకిస్తూ వస్త్ర వ్యాపారులు చేస్తున్న వాదన కూడా సహేతుకంగానే ఉంది. దేశంలో ఎక్కడా లేనప్పుడు ఒక్క మన రాష్ట్రంలోనే వ్యాట్ విధిస్తే, మన వస్త్ర వ్యాపారం పొరుగు రాష్ట్రాలకు తరలి వెళుతుంది. మన రాష్ట్రానికి సరిహద్దుల్లో తమిళనాడు, ఒరిస్సా, చత్తీస్‌ఘడ్, కర్నాటక, మహారాష్ట్ర రాష్ట్రాలు ఉన్నాయి. ఈ రాష్ట్రాల్లో వ్యాట్‌పై పన్ను లేదు. సమీపాన ఉన్న వారు మన రాష్ట్రంలో కన్నా ఈ రాష్ట్రాల్లో వస్త్రాలు కొనుగోలు చేయడం మంచిదనుకుంటారు. ఇప్పటికే ప్రధాన నగరాలైన మద్రాసు, బెంగళూరు, భువనేశ్వర్‌లలో మన వారు వస్త్రాలు కొనుగోలు చేస్తారు. వ్యాట్ వల్ల ఇది మరింతగా పెరగవచ్చు. అంతే కాకుండా వస్త్రాల వ్యాపారం అనేది ప్రధానంగా అరువుపై సాగుతుంది. వస్త్రాలు ఉత్పత్తి చేసే వారి నుండి వినియోగదారునికి చేరే వరకు అనేక దశలు ఉన్నాయి. అరువుపై కొనుగోలు జరిగినప్పుడు అక్కడ నగదు అనేది లేకపోయినా మేం ముందు వ్యాట్ చెల్లించాలి ఇదెక్కడి చోద్యం? అనేది వస్త్ర వ్యాపారుల వాదన. ఉత్పత్తి అయిన వస్త్రాల్లో 70 శాతం వరకు రెడిమేడ్ వస్త్రాల తయారీకి ఉపయోగిస్తున్నారు. రెడీమేడ్ వస్త్రాలపై వ్యాట్ ఎలాగూ ఉంది. ఇక 30 శాతం మాత్రమే బట్టలు కుట్టించుకోవడానికి ఉపయోగిస్తున్నారు. ఇప్పుడు వ్యాట్ విధించేది వీటిపైనే. పెద్దగా చదువు లేని సంప్రదాయ వ్యాపార కుటుంబాల వారే వస్త్ర వ్యాపారంలో ఉంటున్నారు, వీరికి ఈ మాత్రం ఉపాధి కూడా లేకుండా చేస్తారా? అని వస్త్ర వ్యాపారులు ప్రశ్నిస్తున్నారు. ఒక్క మన రాష్ట్రంలోనే రెండు లక్షల మంది వస్త్ర వ్యాపారులు ఉన్నారు. ప్రత్యక్షంగా, పరోక్షంగా వస్త్ర వ్యాపారం ద్వారా 20లక్షల కుటుంబాలకు ఉపాధి లభిస్తోందని వీరు చెబుతున్నారు. వ్యాట్ ద్వారా ఇలాంటి వస్త్ర వ్యాపారుల జీవితాలను ప్రమాదంలో పడేశారని ఆంధ్రప్రదేశ్ ఫెడరేషన్ ఆఫ్ టెక్స్‌టైల్స్ ఆసోసియేషన్ ప్రధాన కార్యదర్శి సోమ దయానంద్ చెబుతున్నారు.

అనేక రూపాల్లో ఆందోళన కార్యక్రమాలను నిర్వహించారు. ప్రతి రాజకీయ పార్టీ నాయకుడిని కలిశారు. వీరి ఉద్యమానికి టిడిపి, టిఆర్‌ఎస్, బిజెపి, సిపిఎం, సిపిఐ పార్టీల నాయకులంతా మద్దతు ప్రకటించారు. వస్త్ర వ్యాపారులకు మద్దతుగా వైఎస్‌ఆర్ కాంగ్రెస్ అధ్యక్షుడు జగన్ గుంటూరు జిల్లా నరసరావుపేటలో శుక్రవారం ధర్నా చేయనున్నారు. ప్రభుత్వం చివరకు శవం మీద కప్పే బట్టల నుండి కూడా పన్నులు వసూలు చేయాలనుకుంటోంది అని సిపిఐ కార్యదర్శి నారాయణ ఘాటుగానే స్పందించారు. అసెంబ్లీ సమావేశాల నాటికి ప్రభుత్వం తన నిర్ణయాన్ని ఉపసంహరించుకోకపోతే అసెంబ్లీలో నిలదీస్తామని టిఆర్‌ఎస్ ప్రకటించింది. వీరి బంద్‌కు టిడిపి మద్దతు ప్రకటించింది. వ్యాట్ ద్వారా ప్రజలపై 14 వందల కోట్ల రూపాయల భారం పడుతుందని సిపిఎం కార్యదర్శి బివి రాఘవులు ఆందోళన వ్యక్తం చేశారు. అనేక రూపాల్లో ఆందోళన సాగించిన తరువాత కూడా ప్రభుత్వంలో స్పందన లేకపోవడంతో చివరకు వస్త్ర వ్యాపారులు తొమ్మిది రోజుల బంద్‌కు పిలుపు ఇచ్చారు.
వరుసగా నాలుగు రోజుల నుండి బంద్ పాటిస్తూ, మరో ఐదు రోజుల పాటు బంద్ నిర్వహించాలని ప్రకటించినా ప్రభుత్వంలో స్పందన లేకపోవడం గమనార్హం.
ఒకవైపు అడగకపోయినా ప్రభుత్వం ఉచిత పథకాలు ప్రకటిస్తోంది. ఉచిత పథకాలు నిజంగా అవసరమా? అనే ఆలోచన కన్నా వాటి ద్వారా ఏ మేరకు రాజకీయ ప్రయోజనం ఉంటుంది అనేదే పాలకుల ఆలోచన. అడక్కపోయినా ఉచిత పథకాలు ఒకవైపు.. నడ్డివిరిచే పన్నులు మరోవైపు. కిరణ్‌కుమార్‌రెడ్డి ముఖ్యమంత్రి పదవి చేపట్టిన తరువాత తన మార్కు పథకం కోసం కిలో రూపాయి బియ్యం ప్రకటించారు. మరోవైపు ఏడాది కాలంలోనే అదనంగా దాదాపు పదివేల కోట్ల రూపాయల వరకు పన్నులు విధించారు.

తొమ్మిది రోజులు కాదు రెండు నెలల పాటు బంద్ జరిపినా వస్త్ర వ్యాపారులు ప్రభుత్వాన్ని ఏమీ చేయలేకపోవచ్చు. ప్రభుత్వాన్ని పడగొట్టేందుకు వీళ్లకేం అసెంబ్లీలో ఓటు ఉండదు. అధిష్ఠాన వర్గం వద్ద పలుకుబడి ఉండదు. వస్త్ర వ్యాపారులే కాదు, సమాజంలో ఎవరిలోనైనా ఏర్పడే తీవ్రమైన నిస్పృహ,ప్రభుత్వం పట్ల వ్యతిరేక భావం ఫలితం ఏ విధంగా ఉంటుంది అనేది అధికారంలో ఉన్నప్పుడు తెలియదు, ఎవరికైనా అధికారం పోయాక తెలుస్తుంది. టిడిపి అధికారంలో ఉన్నప్పుడు ఆర్టీసి కార్మికులు ఆరువారాల పాటు సమ్మె జరిపారు. జీతంపై బతికే కార్మికులు ప్రభుత్వంతో ఎంత కాలం పోరాడుతారు? మేమూ చూస్తాం, వాళ్లే తోక ముడిచి తిరిగి ఉద్యోగంలో చేరుతారు అని అప్పటి పాలకులు ధీమాగా ఉన్నారు. వారి ఉద్యమాన్ని అస్సలు పట్టించుకోలేదు. ప్రభుత్వం ఊహించినట్టుగానే చివరకు ఎలాంటి డిమాండ్లను ఆమోదించకపోయినా వారు ఉద్యోగంలో చేరారు. కానీ ఎన్నికలు వచ్చే సరికి దాదాపు లక్షమందికి పైగా ఆర్టీసి కార్మికులు కాంగ్రెస్ పార్టీకి ఆయాచిత వరంగా లభించారు. అప్పటి ప్రభుత్వం ఓటమి కోసం చిత్తశుద్ధితో కృషి చేశారు. అసెంబ్లీలో ఓటింగ్‌తో ఫలితం అప్పటికప్పుడు తేలిపోతుంది, కానీ ప్రజల్లో వచ్చే తీవ్ర వ్యతిరేకత ఫలితం చూడాలంటే ఎన్నికల వరకు వేచి చూడాల్సిందే.
డిమాండ్లతో ఉద్యమించే వారు ఏం చేస్తారు అనే అహంకారం ప్రభుత్వానికి పనికి రాదు. ప్రభుత్వం మరీ మొద్దుబారిపోతోంది. ఎవరు ఆందోళన చేసినా, ఎవరు ఉద్యమించినా పట్టించుకునే స్థితిలో లేదు. వ్యాపారం చేసుకుని బతికే వారు, ఉద్యోగం చేసుకుని బతికే కార్మికులు, ప్రజలు ఎంత కాలం ఉద్యమిస్తారు? అనే ధీమా ప్రభుత్వానిది. ప్రభుత్వాన్ని ఢీ కొనేంత బలం ఒక కార్మిక సంఘానికో, వ్యాపారులకో, విడివిడిగా ఉండే ప్రజలకో ఉండకపోవచ్చు. కానీ అసంతృప్తి చిన్నచిన్నగా మొదలై చివరకు అది పాలకులను గద్దె దించి అడ్రస్ లేకుండా చేసేంతగా బలపడుతుందనే విషయం పాలకులు గ్రహించాలి. అలా గ్రహించని వారు ఏమయ్యారో గుర్తుకు తెచ్చుకోనైనా మారాలి. ఎట్టి పరిస్థితిలోను వ్యాట్‌ను రద్దు చేసేది లేదంటూ ఆర్థిక మంత్రి ఆనం రాంనారాయణరెడ్డి ప్రకటించడం సరికాదు. కనీసం వారిని చర్చలకైనా పిలిస్తే వారికున్న ఇబ్బందులు ఏమిటి, ప్రభుత్వానికి ఉన్న సమస్యలు ఏమిటి అన్నది పరస్పరం తెలుసుకునే అవకాశమైనా లభిస్తుంది .

ఔను బాలకృష్ణ, చిరంజీవి రియల్ హీరోస్

2012-01-25T08:07:00.001+05:30

‘‘నేను మాట్లాడేప్పుడు భారత దేశం మాట్లాడుతుందని అనుకుంటాను, నేడు నడిస్తే భారత దేశం నడుస్తుందనుకుంటాను, నన్ను నేను భారత దేశంగా భావిస్తాను ’’ అని ఏదో సందర్భంలో స్వామి రామానంద తీర్థ తన గురించి తాను చెప్పుకున్నారు. ఆనాటి హైదరాబాద్ రాష్ట్రంలో కాంగ్రెస్‌లో ఎదురులేని నాయకుడు, సన్యాసం స్వీకరించి తన శేష జీవితం అంతా సన్యాసిగానే గడిపారు. ఒక తీవ్రవాది సన్యాసిగా మారితే ఎలా ఉంటుందో,అరవింద్ ఘోష్‌ను చూస్తే తెలుస్తుంది. స్వాతంత్య్ర పోరాట కాలంలో నిప్పులు చెరిగిన తీవ్రవాది, అనంతరం ఒక యోగిగా మారిపోయారు. స్వాతంత్య్రం కోసం ఆయుధం చేపట్టినప్పుడు ఇతనిలో ఒక యోగి ఉన్నాడని ఎవరైనా ఊహించారా? ఎవరో ఎందుకు స్వయంగా ఆయనే ఊహించి ఉండరు. చలం రాతలు చదివిన వారు ఈయన ఏదో ఒక రోజు అరుణాచలం వెళతారని అనుకున్నారా? ఇదంతా దైవలీలనేమో! ఇలాంటి మహనీయుల సంగతి వదిలేస్తే, కొంత మంది గురించి మనం అసలు ఊహించలేం.

బాలకృష్ణను ఒకవైపే చూశారు, రెండో బాలకృష్ణను చూస్తే జడుసుకుంటారు అంటూ సినీనటుడు బాలకృష్ణ పంచ్ డైలాగులు వినిపిస్తున్నారు. రెండో బాలకృష్ణ మాకెందుకు తెలియదు ఆయన ఒక హంతకుడు కదా? అని చిరంజీవి వర్గీయులు చమత్కరిస్తున్నారు. రెండో కోణంలో కూడా బాలకృష్ణలో నిజమైన హీరో కనిపిస్తాడు. సినిమాల్లో హీరోలు గన్ను చేతిలో పట్టుకుని కనిపించిన వారిని పిట్టల్ని కాల్చినట్టు కాల్చేస్తుంటాడు. అలా కాల్చినందుకు ఏ సినిమాలోనూ హీరోపై పోలీసులు కేసు పెట్టరు, విచారణ జరిపించరు. సినిమాల్లోని ఈ దృశ్యాన్ని ఆయన నిజ జీవితంలో సైతం చేసి చూపించారు.

హీరో బాలయ్య షూటింగ్ ముగించుకుని ఇంటికొచ్చి పుల్లుగా మందు కొట్టారు. కాల్పులు జరిగాయి. ఇద్దరు నెలకొరిగారు. చావు బతుకుల మధ్య ఇద్దరు ఆస్పత్రిలో చేరారు. మరి బాలయ్య పోలీస్ స్టేషన్‌కెళ్లారా? వెళితే ఆయన హీరో ఎలా అవుతారు. కనీసం పోలీస్ స్టేషన్‌కు కూడా వెళ్లకుండా కాంగ్రెస్ బావ, టిడిపి బావ నైతిక మద్దతుతో బావమరిది బాలయ్య హీరోలా బయటపడ్డారు. సినిమాల్లోని సీన్ నిజ జీవితంలో చూపించిన వ్యక్తి హీరో కాకుంటే మరేమవుతారు. విమానాలు, ఓడలను మాయం చేసే బర్ముడా ట్రయాంగిల్ మాయాజాలం కొంత వరకైనా అంతు చిక్కిందేమో కానీ బాలకృష్ణ ఇంట్లో ఆ రాత్రి తూటలు ఆకాశం నుండి ఎలా వచ్చి పడ్డాయో ఇప్పటికీ అర్ధం కాలేదు. ఎంత హిచ్ కాక్ సినిమా అయినా ముగింపులో సస్పెన్స్ తేలిపోతుంది. ఆ తూటాల సస్పెన్స్ ఇంకా అలానే ఉందంటే బాలయ్య నిజ జీవితంలోనూ హీరోనే కదా?

అలాంటి హీరోను పట్టుకుని పసి పిల్లాడు అంటే కోపం రాదా? అందుకే నా అంతటి వాడిని నేను నన్ను పసి పిల్లాడివంటారా? రెండో బాలయ్యను చూపిస్తానని సవాల్ విసిరారు. చండ శాసనుడని అంతా భయపడే తండ్రి ముందే వెన్ను పోటు సమయంలో మాతో పెట్టుకోకు అని పోస్టర్లు ప్రదర్శించిన ధైర్యం ఆయనది. సోదరి ఇంటి ముందు తొడగొట్టిన ధైర్య శాలి.
మహాభారత యుద్ధాన్ని నడిపించిన శ్రీకృష్ణుడు, గోపికలతో సరసాలాడిన శ్రీకృష్ణుడు, అలకమానవే అంటూ సత్యభామ కాళ్లు పట్టుకున్న శ్రీకృష్ణుడు ఒక్కరే. ఆయన దేవుడు కాబట్టి శ్రీకృష్ణ లీలలు అన్నాం. దేవుళ్లే కాదు దేవుడు సృష్టించిన మనుషులు సైతం ఒక్కో సందర్భంలో ఒక్కోలా కనిపిస్తారు. మా ఆయన బుద్ధిమంతుడు అని ముచ్చటపడే ఇల్లాలు ఆయన ఇంట్లో రామయ్య, వీధిలో కృష్ణయ్య అని తెలిసి ఛీ నీ అసలు రూపం ఇదా? అని తిడుతుంది.

మనమేంటో మనకే అర్ధం కానప్పుడు ఎదుటి వాళ్లను అర్ధం చేసుకోడం సాధ్యమా? తత్వవేత్తలంతా నిన్ను నువ్వు తెలుసుకో అనే కదా చెప్పింది. రారా తేల్చుకుందా అనే డైలాగు ఇప్పటి వరకు వీధిరౌడీలకు మాత్రమే హక్కుగా ఉండేది. మన సూపర్ హీరోలు వారి నుండి ఆ హక్కును లాక్కోని తేల్చుకుందా రా అని వీధిన పడ్డారు. సినిమాల్లో హీరోల రెండో రూపం ఇదా అని సినీ అభిమానులు విస్తుపోతున్నారు. స్టాలిన్ అనుకున్న తమ హీరో కాంగ్రెస్ గూటి పక్షి కాగానే మా హీరో రెండో రూపం ఇదా? అని అభిమానులు లోలోనే కుమిలిపోతున్నారు.
***
పౌరాణికం, జానపదం, సాంఘికం అదీ ఇదీ అని కాదు. బహుశా ప్రపంచ సినిమా చరిత్రలో అత్యధిక పాత్రలు నటించిన రికార్డు ఎన్టీరామారావుది. ఆయన దేవుడి పాత్రలతో పాటు రాక్షస పాత్రల్లో సమానంగా మెప్పించారు. అందగాడిగా నటించాడు. కుంటివాడిగా మెప్పించారు. రాముడిగా పూజలందుకున్నాడు, రావణుడిగా వీరవిహారం చేశారు. కర్ణుడిలో లీనమయ్యారు, దుర్యోధనుడిగా చెలరేగిపోయారు. చివరకు రాజకీయాల్లోకి వచ్చాక సైతం వివేకానందుడిగా, సన్యాసిగా బహు వేషధారణలో కనిపించారు. ఎన్ని వేషాలనైనా సహిస్తాం కానీ కొత్త పెళ్లి కొడుకు వేశాన్ని ఒప్పుకునేది లేదని కుటుంబ సభ్యులు వెన్ను విరిచారు. ఎన్టీఆర్ తన కుడిభుజం అనుకున్న అల్లుడిలోని రెండో రూపాన్ని ఊహించలేకపోయారు. ఆ విషయాన్ని చివరి రోజుల్లో ఆయనే ప్రకటించారు. విధేయునిగా కనిపించే వాడు అత్యంత వ్యతిరేకిగా కూడా మారగలడు. దీనికి ప్రతి రాజకీయ నాయకుడి జీవితం ఉదాహరణే.

మనపొగడ్తలంటే హీరోలకూ విసుగేస్తోంది -

2012-01-24T08:40:00.001+05:30

ఈ హీరో అలాంటిలాంటి వాడు కాదు. బాక్సాఫీసు బద్దలు కొడతాడు, కొత్త చరిత్ర సృష్టిస్తాడు. ఎనిమిది దశాబ్దాల తెలుగు సినిమా చరిత్రలో సరికొత్త రికార్డులు సృష్టించాడు అంటూ ఎవరినీ వదలకుండా హీరోలందరినీ పొగడడం మన టీవిల ఆనవాయితీ. చివరకు ఈ పొగడ్తలు సినిమా వాళ్లకు సైతం విసుగు తెప్పిస్తోంది. ఒక హీరోను మాత్రమే ఇలా పొగడ్తలతో ముంచెత్తితే నన్ను ఒక్కరినే ఇలా అంటున్నారను కోవచ్చు కానీ కొద్ది పాటి డైలాగులను మార్చి అందరినీ అలానే పొగడ్తలతో ముంచెత్తుతున్నారాయె. అందుకే ఈ మధ్య అక్కినేని నాగార్జున సినిమా ప్రమోషన్ పేరుతో సాగుతున్న పొగడ్తల పట్ల విసుగు ప్రదర్శించారు. ఏముంటుంది అక్కడ ఒకరినొకరు పొగుడు కోవడం తప్ప అంటూ పెదవి విరిచారు. అందుకే సాధ్యమైనంత వరకు అలాంటి వాటికి దూరంగానే ఉంటున్నానన్నాడు.

ఆడియో విడుదల, అభినందన సభ అంటూ పేర్లు ఏవైతేనేం అక్కడ హీరోలను ఆకాశానికి ఎత్తడం, దర్శకుని ప్రతిభను పొగడ్డం తప్ప ఏమీ ఉండడం లేదు. కానీ తెలుగు చానల్స్ మాత్రం సినిమా ప్రమోషన్ వ్యవహారాల్లో ఏ మాత్రం మార్పు లేకుండా ఇలానే సాగిస్తున్నారు. అట్టర్ ఫ్లాప్ సినిమా అయినా హిట్టయిన సినిమా అయినా ప్రమోషన్ కార్యక్రమాల్లో మాత్రం తేడా ఉండదు. ఒక సినిమా విడుదల కాగానే ఆ సినిమా హీరోతో కొద్ది మంది ముచ్చట్లు ఇంత అద్భుతమైన సినిమాలో నటించేప్పుడు మీ ఫీలింగ్, హీరోయిన్ గురించి ఏమనుకుంటున్నారు? దర్శకుని ప్రతిభ గురించి నాలుగు పొగడ్తలు పొగడండి అంటూ ప్రశ్నిస్తున్నట్టుగా ఉంటున్నాయి. నాతో సినిమా తీసిన దర్శకుడు మహామేధావి అనుకుంటే ఏ హీరో అయినా ఇంకేమంటాడు.

అదే హిందీ సినిమాల ప్రమోషన్ మాత్రం చాలా భిన్నంగా సాగుతోంది. ఒకే దెబ్బకు రెండు పిట్టలు అన్నట్టు అటు సీరియల్ ప్రమోషన్, ఇటు సినిమా ప్రమోషన్ ఒకేసారి సాగిస్తున్నారు. సోనీ చానల్‌లో ‘బడే అచ్చే లగితే హే’ అంటూ పాపులర్ సీరియల్ వస్తోంది. ‘డర్టీ పిక్చర్’ సినిమా విడుదల సమయంలో ఈ సీరియల్‌ను సినిమా కోసం వాడుకున్నారు. అదే విధంగా సీరియల్ ప్రచారానికి ‘డర్డీ పిక్చర్’ హీరోయిన్ విద్యా బాలన్‌ను ఉపయోగించుకున్నారు. సీరియల్‌ని కథలో భాగంగా దంపతులు హనీమూన్ కోసం ఫ్రాన్స్ వెళతారు. వీరు బస చేసిన హోటల్‌లోనే ‘డర్టీ పిక్చర్’ యూనిట్ బస చేస్తుంది. హీరోయిన్ విద్యా బాలన్, సీరియల్ కథానాయికను పరిచయం చేసుకుంటుంది. హోటల్‌లో ఇద్దరు కలిసి డ్యాన్స్ చేస్తారు. సినిమాలోని హీరో సీరియల్‌లోని హీరోతో మాట్లాడతాడు. ఇదంతా కథలో భాగంగానే సాగుతుంది. దీని వల్ల ఆ సీరియల్‌ను రెగ్యులర్‌గా చూసే వారికి కొత్తదనంగా ఉంటుంది. అదే సమయంలో సినిమాకు, సీరియల్‌కు ప్రచారం లభిస్తుంది. సోనీలోనే వచ్చే ‘సిఐడి ’ సీరియల్ విషయంలో సైతం ఇదే విధంగా ప్రచారానికి ఉపయోగించుకున్నారు. ఇలాంటి ప్రయత్నం తెలుగు సీరియల్స్, తెలుగు సినిమా విషయంలో కనిపించ లేదు. తెలుగు చానల్స్‌లో వచ్చే సీరియల్స్ అన్నీ తమిళం నుండి అనువాదం అవుతున్నవే కాబట్టి అది సాధ్యం కావడం లేదేమో! అనువాదం కాకుండా ఒకటి రెండు సీరియల్స్ డైరెక్ట్‌గా వస్తున్నాయి వాటి విషయంలోనైనా హిందీలో మాదిరిగా కొత్తదనంతో ప్రయత్నించవచ్చు.

ప్రయత్నం బాగుంది...

శ్యామల మంచి అందగత్తె. ఎంత అందగత్తె అంటే ఈ మధ్య ఆమె ఒక తెలుగు సినిమాలో నటించింది. చివరకు సినిమా రంగంలో ఎంతో మంది అందగత్తెలను చూసిన పోసాని కృష్ణ మురళి సైతం శ్యామల అందాన్ని ప్రస్తావించకుండా ఉండలేకపోయారు. జోగిని వంటి ఒక విష సంస్కృతికి బలైన జీవితం ఆమెది. తెలుగు చానల్స్ వాళ్లే ఆమెకు కొత్త జీవితాన్ని ప్రసాదించారు. జోగిని జీవితం నుంచి బయటకు వచ్చి ఒక సంస్థను స్థాపించి తనలాంటి వారి కోసం ఆమె ప్రయత్నిస్తున్న సమయంలో చానల్స్ దృష్టిలో పడ్డారు. ఆమె జీవితాన్ని వీక్షకులకు పరిచయం చేయడంతో పాటు ఆమెతో కొన్ని కార్యక్రమాలు రూపొందించారు. అనంతరం ఎన్‌టీవి శ్యామలా డైరీ పేరుతో కార్యక్రమం రూపొందించారు. ఇందులో శ్యామల వివిధ రంగాలకు చెందిన ప్రముఖులతో మాట్లాడుతోంది. మీరు ముక్కు సూటిగా మాట్లాడతారు అని శ్యామల అన్నప్పుడు పోసాని సమాధానం బాగుంది.

ప్రపంచంలో ఎవరూ ముక్కు సూటిగా మాట్లాడరు. నా మనసులో అనేక ఆలోచనలు ఉంటాయి, నాకు ప్రమాదం లేనివి, నాకు నష్టం కలిగించనివి మాత్రమే చెబుతాను కానీ ప్రతిదీ చెబుతానా? అని ప్రశ్నించారు. శ్యామల అందం నచ్చింది, శ్యామలపై నాకున్న అభిప్రాయం పైకి చెబుతానా? అని పోసాని అనగానే ఆమె ఏ మాత్రం తడుముకోకుండా శ్యామలపై మీ మనసులో ఏముంది అని అడిగింది. అందగత్తె అంతే మనసులో ఉన్నది అంతా చెప్పకపోవడం సభా మర్యాద అంటూ తప్పించుకున్నారు. ఇంటర్వ్యూలు చేయడం ఆమె వృత్తి కాదు. జోగిని వ్యవస్థ వంటి ఒక దురాగతానికి బలైన జీవితం ఆమెది. అలాంటిది ప్రొఫెషనల్స్ మాదిరిగా తడబడకుండా ప్రముఖుల ఇంటర్వ్యూలు నిర్వహించడం అభినందనీయం. కొన్ని జాతీయ పత్రికలు ప్రణబ్ ముఖర్జీ, చిదంబరం లాంటి వారికి ఒక రోజు పూర్తిగా పత్రిక బాధ్యతలు అప్పగిస్తుంటారు. ఆ రోజు వారే సంపాదకీయం రాస్తారు. అదే విధంగా శ్యామల లాంటి ప్రయోగాలు చేయడానికి చానల్స్‌కు అవకాశం ఉంది. అయితే ఒక చానల్ శ్యామలను పరిచయం చేస్తే మిగిలిన చానల్స్ ఆమె కోసం కార్యక్రమాలు రూపొందిస్తున్నాయి. ఎవరికి వారు ఇలాంటి ప్రయోగాలు చేస్తే బాగానే ఉంటుంది. తెలుగు చానల్స్‌కు కొత్త ముఖాలు లభించవచ్చు.

ఒక జర్నలిస్టు ఆక్రోశం...నేను జర్నలిస్టునేనా? సమీక్ష

2012-01-22T11:06:00.000+05:30

ఒక జర్నలిస్టు ఆక్రోశం

-మురళి, January 22nd, 2012

ఒక హిందువు నేను హిందువును ఎట్లయితా? అని ప్రశ్నిస్తూ పుస్తకం రాసినప్పుడు సహజంగా ఆ పుస్తకం ఆసక్తి రేపుతుంది. అదే మార్గంలో ఇప్పుడో జర్నలిస్టు నేను జర్నలిస్టునేనా? అంటూ పుస్తకం ప్రచురించారు. ఒక పాఠకుడిగా పుస్తకం చదివినప్పుడు జర్నలిస్టుల్లో నైతిక విలువల కోసం రచయిత తపిస్తున్న తీరు ఆకట్టుకుంటుంది. మీడియా సంస్థలు, జర్నలిస్టులు వ్యక్తిగతంగా తమతమ ఖాతాల్లో విశ్వసనీయత బ్యాలెన్స్ ఏ మేరకు ఉందో బేరీజు వేసుకోవాలని రచయిత సూచించారు. మంచిదే మరి జర్నలిస్టుల నైతిక విలువల గురించి ప్రశ్నలు లేవనెత్తిన రచయిత విశ్వసనీయత బ్యాలెన్స్ గురించి ఆలోచించారా? ఈ రచనలో సందర్భాను సారం నేను అక్కడక్కడా చేసిన కొన్ని వ్యాఖ్యలు, విమర్శలు మీడియాతో ప్రత్యక్ష పరోక్ష, సంబంధాలున్న వ్యక్తులు, సంస్థలు, సంఘాలు వ్యవస్థలు, అధికారులను బాధిస్తాయని తెలిసినా, రోగి క్షేమం దృష్ట్యా ధైర్యం చేసినట్టు రచయిత ముందుమాటలోనే చెప్పారు.

జర్నలిజంలోనే కాదు ఏ రంగంలోనైనా విలువలు ముఖ్యం. అన్ని రంగాల్లోనూ విలువలు పడిపోతున్నాయి. స్వాతంత్య్ర పోరాటం కాలం నాటి పత్రికల్లోని విలువలను ఇప్పుడు ఆశించడం అత్యాశే అవుతుంది. అప్పుడు పత్రికలు స్థాపించే వారు, అందులో పని చేసే వారు ఒక ఉన్నత లక్ష్యంతో ఆ పని చేశారు. మీడియా ఇప్పుడు లాభసాటి వ్యాపారం. మారిన పరిస్థితులను అర్థం చేసుకున్న వారు మార్కెట్‌లో నిలబడతారు లేదంటే కాలగర్భంలో కలిసిపోతారు. కోట్లాది రూపాయల పెట్టుబడి పెట్టిన వారు దేశం కోసం మీడియాను నడుపుతారని, నడుపుతున్నారని అనుకుంటే అమాయకత్వం అవుతుంది.

జర్నలిస్టులకు నైతిక విలువ గురించి ఒక పుస్తకాన్ని ప్రచురించిన జర్నలిస్టు రచయిత వ్యాపార కోణంతో ఆలోచించినప్పుడు కోట్ల రూపాయల పెట్టుబడి పెట్టే యజమాని ఆలోచన ఏ రీతిలో ఉంటుంది. నైతిక విలువల ఆవశ్యకత వివరించిన 130 పేజీల పుస్తకంలో 10 నిండు పేజీల వ్యాపార ప్రకటనలు ఉన్నాయి. వీటిలో ఎనిమిది ప్రకటనలు ప్రభుత్వ సంస్థలవి, రెండు ప్రైవేటు వారివి. బ్యాక్ కవర్ కలర్ ప్రకటన ప్రభుత్వానిదే. ఒక దిన పత్రిక ఇంత పెద్ద సంఖ్యలో ప్రకటనలు సాధిస్తుందేమో కానీ ఒక పుస్తకానికి ఇన్ని ప్రకటనలు సంపాదించడం సామాన్యం కాదు. అందుకే ఈ రచయత సామాన్య జర్నలిస్టు కాదు. 12వ పేజీలో ప్రకటనల గురించి రచయిత ఒక చక్కని మాట రాశారు..ప్రజల నుండి పన్నులు, ఇతరత్రా వివిధ రూపాల్లో వసూలు చేసే డబ్బుతో ప్రభుత్వ బొక్కసం నిండుతుంది. మీడియాకు, జర్నలిస్టులకూ సబ్సిడీలు, రాయితీలు, ప్రోత్సాహకాల పేరిట, ప్రకటనల రూపంలో అవసరానికి మించి కూడా రాజకీయ ఒత్తిడులు, వ్యూహాల కారణంగా కోట్లాది రూపాయలను ప్రభుత్వం బొక్కసం నుండి తీసి ఖర్చు పెడుతున్నది’ అని రచయిత ఆవేదన వ్యక్తం చేశారు. ఈ పుస్తకంలోని ప్రకటనలకు సైతం ప్రభుత్వం ఆ బొక్కసం నుండే ఖర్చు చేసింది. ఒక పేజీ బ్లాక్ అండ్ వైట్ ప్రకటనతో పుస్తక ప్రచురణ ఖర్చు సరిపోతుంది. సీనియర్ జర్నలిస్టులను కాదని, వారి అనుభవాన్ని తోసిపుచ్చి పూచిక పుల్ల కింద జమకట్టి కొత్తవాళ్ల మీద ఆధారపడుతున్నారని చానల్స్‌పై ఆవేదన వ్యక్తం చేశారు. సీనియర్‌ను అని మడికట్టుకుని కూర్చుంటే బొట్టుపెట్టి పిలిచేదెవరు? దూసుకెళ్లిన వారికే అవకాశాలు. జర్నలిస్టుల జీవితాలు అద్భుతంగా ఉన్నాయంటే రచయిత పలు సందర్భాల్లో ఈర్ష్య ప్రకటించారు. కానీ ఒకరిద్దరి జీవితాలను చూసి అంతా అలానే ఉన్నారని జర్నలిజంతో సంబంధం లేని వారు అనుకోవచ్చు కానీ జర్నలిజంతో సంబంధం ఉన్నవారు అనుకోలేరు.

నేను జర్నలిస్టునేనా?
రచయిత - ములుగు రాజేశ్వరరావు
వెల రూ.100

లాజిక్ లేని లాజిక్... బిజినెస్ మేన్ సినిమాలోని లాజిక్ .. రామారావును దించడానికి బాబు చెప్పినలాజిక్‌ ఇదే .... రాజకీయ వ్యంగ్యం

2012-01-18T08:36:00.003+05:30

మా దూరపు బంధువు ఉన్నాడు కదా! పాపం వాడికి ఇంకా పెళ్లి సంబంధం కుదరలేదోయ్ అని హాస్యరచయిత మునిమాణిక్యం వాళ్లవిడ కాంతంతో అంటే సిలోన్ వెళ్లొచ్చిన వాడికి పెళ్లి కాదని నేను ముందే అనుకున్నాను అంటూ కాంతం చెబుతుంది. మునిమాణిక్యానికి ఆశ్చర్యం వేస్తుంది. పెళ్లి కాకపోవడానికి, సిలోన్ వెళ్లి రావడానికి సంబంధం ఏమిటో అస్సలు అర్ధం కాదు. అదే విషయం అడిగితే ఆమె అంతే లేండి నేను చెప్పిన మాట మీకు ఎప్పుడు నచ్చిందని, నా మాట మీరు ఎప్పుడు విన్నారని సాగదీస్తుంది. ఆ గొడవ అలా సాగుతూనే ఉంటుంది. అంతే తప్ప సిలోన్ వెళ్లి రావడానికి పెళ్లి కాకపోవడానికి సంబంధం ఏమిటో మాత్రం ఆమె చెప్పదు. కొన్ని వాదనలు అంతే తెలుగు సినిమాల్లో మాదిరిగానే అస్సలు లాజిక్‌కు చిక్కవు. వాళ్ల తండ్రిని చంపిన వానిపై పగ తీర్చుకోవడానికి హీరో మహేష్ బాబు బిజినెన్ మ్యాన్ అంటూ ముంబై వెళ్లి ఉచ్చపోయిస్తానంటూ మాఫియా అవతారం ఎత్తుతాడు. పగ తీర్చుకోవడానికి బిజినెస్‌కు మాఫియాకు, హత్యలకు సంబంధం ఏమిటయ్యా అంటే లాజిక్‌లతో తెలుగు సినిమాలు చూస్తే మడికట్టుకుని ఇరానీ హోటల్‌కు వెళ్లినట్టే అంటాడు మహేష్ అభిమాని. రెండువేల థియేటర్లలో సినిమా విడుదల చేశారు. రెండు రోజులు నడిస్తే చాలదా.. నిర్మాతకు రెట్టింపు లాభాలు సంపాదించిపెట్టడానికి. సినిమా వ్యాపారానికి ఇంతకు మించిన లాజిక్ ఏముంటుంది. అసలే సినిమా పేరు బిజినెస్ మేన్. చూసే ప్రేక్షకుడికి, రివ్యూ రాసే సమీక్షకుడికి లాజిక్కుతో పని. సినిమా తీసే నిర్మాతకు పెట్టిన పెట్టుబడికి రెట్టింపు లాభం రావడమే లాజిక్ కదా? నిర్మాత కోణంలో ఆలోచిస్తే బిజినెస్ మేన్‌లో బోలెడు లాజిక్ ఉంది. అనుమానం ఉంటే నిర్మాత ఇంటికి ఆదాయం పన్ను శాఖవారిని పంపి అడిగించండి. ఇదొక్కటే కాదు ఈ మధ్య వచ్చే సినిమాలు ఎక్కువ థియేటర్లలో విడుదలయ్యే లాజిక్‌కు కారణం ఇదే.

లాజిక్ లేదు అని వాదించే దానిలో సైతం లాజిక్కు ఉంటుంది. ముంతాజ్ పెద్ద అందగెత్త కాదంటారు. ముంతాజ్‌ను షాజహాన్ కళ్లతో చూస్తే ఆమె ఎంత అందగత్తెనో తెలుస్తుంది. సినిమా ప్రేమలో మాత్రం లాజిక్ అస్సలు అర్ధం కాదు. ప్రేమించిన అమ్మాయి కోసం రాజ్యాలను వదలుకోవడం ఏమిటో? రాజకుమారి తోటరాముడ్ని ప్రేమించడం ఏమిటో ? ప్రేమ, లెక్కలకు అస్సలు చిక్కదు.

కొందరు మనుషులను ప్రాంతీయ పార్టీ, జాతీయ పార్టీ అని రెండుగా విభజించేస్తారు. నువ్వు ప్రాంతీయ పార్టీని విమర్శించావు కాబట్టి జాతీయ పార్టీ తొత్తువు అనేస్తారు. జాతీయ పార్టీని విమర్శిస్తే, ప్రాంతీయ చెంచా అంటారు. ఇదే లాజిక్‌తో ప్రపంచంలో మనుషులను రెండుగా విభజించే కాంట్రాక్టు మీకెవడిచ్చాడురా! బాబు అని ప్రశ్నిస్తే, వారి సమాధానంలో లాజిక్కు ఉండదు. భారీ వర్షానికి చెరువు నుండి వచ్చి బావిలో పడిన కప్ప, అప్పటి వరకు బావిలో తిష్టవేసుకున్న కప్పతో సంభాషణ జరుపుతూ ఎక్కడి నుండి వచ్చావు అంటే చెరువు నుండి అని చెప్పిందట! మీ చెరువు ఎంత పెద్దగా ఉంటుంది అని రెండు చేతులు చాపి చూపితే అంత కన్నా పెద్దగా ఉంటుందని చెప్పిందట! చివరకు బావిలో ఒకవైపు నుండి ఇంకో వైపుకు దూకి ఇంత పెద్దగా ఉంటుందా?అని విజయగర్వంతో అడిగిందట బావిలోని కప్ప. బాబోయ్ దీనికి చెప్పడం నా వల్ల కాదు దీని జీవితంలో చూసిన అత్యంత పెద్దది బావి మాత్రమే..! చెరువు అంత కన్నా పెద్దగా ఉంటుందని దీనికి నేను ఎలా చెప్పను? అని చెరువు నుండి వచ్చిన కప్ప తల పట్టుకొంది. వీళ్ల ప్రపంచం రెండు పార్టీల లోపే కుదించుకుపోతుంది. ప్రపంచం అంత కన్నా విశాలమైంది అంటే బావి కన్నా పెద్దది ఉండడానికి వీలే లేదని వాదనకు వస్తారు. వీరి లాజిక్కు అంతే.

ఆ మధ్య ఒక యువకుడు కేంద్ర మంత్రి శరద్‌పవార్‌ను చెంప దెబ్బ కొట్టాడు. కొన్ని వందల మంది అతనికి భారత రత్న ఇవ్వాలని సామాజిక సైట్స్‌లో యువత డిమాండ్ చేశారు. చివరకు ఆ యువకుడు తనకు మతి భ్రమించిందని, ఏం చేస్తున్నానో తనకు తెలియకుండా చేశానని పోలీసు విచారణలో చెప్పాడు. చెంపదెబ్బ కొడితే భారత రత్న కోసం డిమాండ్ చేయడం ఏమిటో? అస్సలు అంతు చిక్కని లాజిక్ .
బిఎస్‌పి గుర్తు ఏనుగు కాబట్టి అది కనిపించకుండా ఎలక్షన్ కమిషన్ వాళ్లు గుడ్డ కప్పమన్నారు. మరి చేయి గుర్తు కనిపించకుండా ఏం చేస్తారు. కొన్ని ఆదేశాలకు లాజిక్ ఉండదు..అంతే! రాందేవ్ బాబాపై సిద్దిఖీ అనే ఒకాయన కోపం వచ్చి ఇంకు చల్లాడు. ఎందుకయ్యా ఇంకు చల్లావు అంటే ఎన్‌కౌంటర్‌పై ప్రశ్నిస్తే ఆయన సమాధానం చెప్పలేదు. అందుకనే ఇంకు చల్లానని చెప్పుకొచ్చాడు. అంటే నువ్వు జర్నలిస్టువా? అని ప్రశ్నిస్తే రాజకీయ నాయకులను ప్రశ్నించే అధికారం
జర్నలిస్టులకేనా? మా లాంటి వాళ్లు ప్రశ్నించవద్దా? అంటూ వాదనకు దిగాడు.

ఎండా కాలం గాలిలో తేమ శాతం మాదిరిగా బాబు మాటల్లో లాజిక్కు శాతం తక్కువగానే ఉంటుంది. కానీ ఎన్టీఆర్‌ను దించేయడానికి ఆయన చెప్పిన మాటల్లోని లాజిక్ ఎప్పటికీ గుర్తుండిపోతుంది. ఎన్టీఆర్‌ను ఎందుకు దించేశారు? అంటే విధానాలు అమలు చేయడంలో, ఎన్టీఆర్ విఫలమయ్యారు. ఎన్టీఆర్ విధానాలు అమలు చేయడానికే, ఎన్టీఆర్‌ను అధికారం నుంచి దించేశామని బాబు చక్కని లాజిక్ తో మాట్లాడారు.

వార్తలు లేనప్పుడు ఏం చేస్తున్నారు ? కోడిగుడ్డు ఈకలు పీకుతున్న హిందీ ,ఇంగ్లిష్ చానల్స్ ... సినిమాలను నమ్ముకుంటున్న తెలుగు న్యూస్ చానల్స్

2012-01-17T15:36:00.000+05:30

దాదాపు దశాబ్దం క్రితం తెలుగు వార్తా పత్రికల్లో ప్రత్యేకంగా ప్రతి రోజు సినిమా వార్తల కోసం ఒక పేజీని కేటాయించినప్పుడు వింతగా అనిపించింది. ప్రతిరోజు ప్రచురించడానికి సినిమా వార్తలు ఏముంటాయనిపించింది. ప్రైవేటు చానల్స్ ప్రారంభం అయిన కొత్తలో ఆ రోజు జరిగిన సంఘటనలు ఒకటి రెండు రోజుల తరువాత రోజుకు గంట పాటు ప్రసారం చేసేవారు. 24 గంటల న్యూస్ చానల్స్ ప్రారంభం అయినప్పుడు కూడా అదే తరహాలో 24 గంటల పాటు చూపించడానికి వార్తలు ఏముంటాయనే సందేహం వచ్చింది. ఒకటికాదు రెండు కాదు దాదాపు 24 గంటల వార్తలు చూపడానికి తెలుగులోనే 24 చానల్స్ వచ్చేశాయి. వీటిలో కొన్ని చానల్స్ ఉనికి ప్రజలకు తెలియదు, కొన్ని ఎలాగోలా నెట్టుకొస్తున్నాయి. చానల్స్ నెట్టుకురావడానికి ఆర్థిక వ్యవహారాలు ఒక సమస్య అయితే వార్తలు మరో సమస్యగా మారుతున్నాయి. చూపిన వార్తలే, జరిగిన గొడవలే ఎంత సేపని చూపిస్తారు. మరి వార్తలు లేనప్పుడు ఏం చేస్తారు.

మీడియాకు సెలవు రోజు, ప్రజలు పండుగ వాతావరణంలో ఉంటారు. రాజకీయాలను పట్టించుకునేంత తీరిక ఉండదు. సొంత ఊళ్లకు వెళుతుంటారు. మరి ఇలాంటి సమయంలో చానల్స్‌కు వార్తలు ఎలా? వార్తలు లేకపోతే ఏం చేస్తారు. సంక్రాంతి సమయంలో తెలుగు చానల్స్‌తో పాటు జాతీయ చానల్స్ సైతం ఇదే విధంగా వార్తల కొరతను ఎదుర్కొన్నాయి. తరుచుగా ఇలాంటి సందర్భాలు ఎదురవుతూనే ఉంటాయి. వార్తల కొరత ఏర్పడినప్పుడు తెలుగు చానల్స్, జాతీయ చానల్స్ స్పందిస్తున్న తీరు వేరువేరుగా ఉంటోంది. హిందీ, ఇంగ్లీష్ జాతీయ చానల్స్ కోడిగుడ్డుమీద ఈకలు పీకినట్టు ఒక చిన్న అంశాన్ని పట్టుకుని సాగదీస్తూ వార్తలను సృష్టించుకుంటున్నాయి. తెలుగు చానల్స్ ఎక్కువగా సినిమా కథనాలపై ఆధారపడుతున్నాయి. సంక్రాంతి రోజున తెలుగు, హిందీ, ఇంగ్లీష్ చానల్స్‌లో కనిపించిన తేడా ఇది.
సంక్రాంతి రోజున పెద్దగా ముఖ్యమైన వార్తలేమీ లేకపోవడంతో తెలుగు చానల్స్ పూర్తిగా సినిమా అంశాలపైనే ఆధారపడ్డాయి. 1965 నుండి ఇప్పటి వరకు సినిమాల్లో ఐటెంసాంగ్స్‌పై టీవి5 ప్రత్యేక కథనాన్ని ప్రసారం చేసింది. విజయలలిత, జ్యోతిలక్ష్మి, జయమాలిని, హలం, సిల్క్‌స్మిత, అనురాధల తరం నుండి నేటి తరం ఐటెం గర్ల్స్ వరకు కొన్ని పాటలతో చూపించారు. టైం మిషన్ అంటూ ఒక్కసారిగా ఆనాటి రోజుల్లోకి తీసుకు వెళ్లారు. ఎంపిక చేసుకున్న అంశానికి నిజానికి సమయం సరిపోదు. కానీ సాధ్యమైనంత వరకు ఎక్కువ మందిని గుర్తు చేయడానికి ప్రయత్నించారు. ఇంత మందిలో ఇంద్రుడు చంద్రుడులో తన అందాలతో సంచలనం సృష్టించి వాంపు పాత్రల్లో విజృంభించిన జయలలితను ఎందుకో మరిచిపోయారు. తన పాత్రల పట్ల తనకే విసుగేసి విరామం ప్రకటించి అమ్మమ్మ డాట్‌కాం సీరియల్‌లో ఒక మంచి పాత్రలో నటించి ఆమె ప్రేక్షకులకు దగ్గరయ్యారు.
hm టీవిలో శోభన్‌బాబు జయంతి సందర్భంగా ఆయనపై ప్రత్యేక కార్యక్రమాన్ని ప్రసారం చేశారు.అదే రోజు భాను
ప్రియ జన్మదినం సందర్భంగా కొన్ని తెలుగు చానల్స్ ఆమెపై ప్రత్యేక కార్యక్రమం ప్రసారం చేశాయి. ప్రముఖ నటుని కొత్త సినిమా విడుదలైతే తెలుగు చానల్స్ చాలా ఎక్కువగానే స్పందిస్తున్నాయి. బిజినెస్ మేన్ సినిమా విడుదల రోజున అన్ని చానల్స్‌లో వివిధ జిల్లాల్లో థియేటర్ల వద్ద రద్దీ ఎలా ఉంది? ప్రేక్షకుల సందడి ఎలా ఉంది అంటూ తెగ హడావుడి చేశారు. గతంలో ఇలాంటి హడావుడి అభిమాన సంఘాల వారు చేసేవారు, ఇప్పుడా పాత్రను తెలుగు చానల్స్ పోషిస్తున్నాయి. ఎక్స్‌ట్రా చానల్ పేరుతో గుట్టు చప్పుడు కాకుండా ఒక చానల్ ప్రసారాలు ప్రారంభమ య్యాయి. ఇది పూర్తిగా 24 గంటల సినిమా న్యూస్ చానల్.

ఇక వార్తలు లేని రోజున హిందీ, ఇంగ్లీష్ చానల్స్ విషయానికి వస్తే...
రాందేవ్‌బాబాపై ఒక ఎన్‌జివో సంస్థకు చెందిన వ్యక్తి ఇంకు చల్లాడు. ఈ మధ్య ఇదో ఫ్యాషన్ అయిపోయింది. ఆ మధ్య శరద్‌పవార్‌ను ఒక సిక్కు యువకుడు చెంపదెబ్బకొడితే దేశ వ్యాప్తంగా ఇంటర్‌నెట్ సోషల్‌సైట్స్‌లో అతనికి మద్దతు లభించింది. ఈ వార్తను యాహూలో పోస్టు చేసిన కొద్ది గంటల్లోనే వందలాది మంది స్పందించారు. చెంపదెబ్బకొట్టిన వ్యక్తికి భారత రత్న ఇవ్వాలని సూచించారు. తీరా పోలీసు విచారణలో ఆ వ్యక్తి తనకు మతి స్థిమితం సరిగా లేదని, అందుకే అలా వ్యవహరిస్తున్నానని చెప్పుకున్నాడు. ఇలాంటి వాటికి జాతీయ మీడియాలో విస్తృతంగా ప్రచారం లభిస్తుండడంతో కొంత మంది ఇలాంటి దుందుడుకు చర్యలకు పూనుకుంటున్నారు. అయితే వీరు చేసే చిల్లర పనుల కన్నా ఈ సంఘటనలపై జాతీయ నాయకులు స్పందిస్తున్న తీరు మరింత సిల్లీగా ఉంది. ఎవరో రాందేవ్ బాబాపై ఇంకు చల్లగానే ఇది ఆర్‌ఎస్‌ఎస్ పనే అంటూ దిగ్విజయ్ సింగ్ తేల్చి చెప్పారు. ఆయన ఆర్‌ఎస్‌ఎస్ అధికార ప్రతినిధి అన్నట్టుగా మాట్లాడేస్తుంటారు. ఎక్కడేం జరిగినా అందులో ఆర్‌ఎస్‌ఎస్ పాత్ర కనిపిస్తుంటుంది. పార్లమెంటుపై దాడి జరిగినా, తాజ్‌మహల్ హోటల్‌పై దాడి సంఘటన అన్నింటిలో ఆయనకు ఆర్‌ఎస్‌ఎస్ పాత్ర కనిపిస్తుంది. దీనికి ఆయనో ఆధారం కూడా చూపారో ఎన్‌డిఏ అధికారంలో ఉన్నప్పుడు బిజెపి కేంద్ర మంత్రి ఒకరికి బాబారాందేవ్‌పై ఇంకు పోసిన వ్యక్తి నమస్కారం చేస్తున్నప్పటి ఫోటో విడుదల చేసి ఇంత కన్నా ఇంకేం ఆధారం కావాలని ప్రకటించారు. దానికి కాంగ్రెస్ ప్రత్యర్థులు అంత కన్నా గొప్ప ఫోటో విడుదల చేశారు. ఢిల్లీ ముఖ్యమంత్రిగా షీలాదీక్షిత్ పాల్గొన్న ఒక సభలో బాబాపై ఇంకు చల్లిన వ్యక్తి దగ్గరగా ఉన్నప్పటి ఫోటో వాళ్లు విడుదల చేశారు. ఈ రెండు ఫోటోలను పదే పదే చూపుతూ హిందీ, ఇంగ్లీష్ చానల్స్ గంటల తరబడి కోడిగుడ్డుపై ఈకలను పీకడానికి ప్రయత్నించాయి. ఒక రాజకీయ నాయకుడి వద్దకు ఎవరైనా వచ్చి నమస్కారం చేస్తే, అతన్ని పూర్తిగా స్కాన్ చేసి, అతని పుట్టుపూర్వోత్తరాలు, నేర చరిత్ర, మనస్తతత్వం అన్నీ తెలుసుకుని ప్రతి నమస్కారం చేస్తారా? నమస్కారం చేస్తే అతని నేరాలతో వారికి సంబంధం ఉన్నట్టా? రోడ్డుమీద వనమూలికలు అమ్మేవాళ్లు గతంలో అమితాబ్, ధర్మేంద్ర వంటి ఎందరో హీరోలతో ఫోటోలు దిగి రోడ్డు మీద ప్రదర్శనకు పెట్టేవారు. అంత మాత్రాన ఆ హీరోలకు రోడ్డుమీద వైద్యం చేసే వారు ఫ్యామిలీ డాక్టర్ అనుకుంటే ఎలా ఉంటుందో ? నాయకుడికి నమస్కారం చేసిన వారి ఫోటో చూసి వారి మనిషి అనుకుంటే అలానే ఉంటుంది.

మీరు వర్క్ హాలికులా - పనిమంతులా ?..... సప్త సూత్ర పరీక్షతో తేల్చు కోండి

2012-01-12T08:05:00.000+05:30

ఆఫీసులో ఇద్దరు వ్యక్తులు కనిపించారు. ఒకరు -ఫైళ్లలోకి తలదూర్చేసి పనిలో బిజీగా ఉన్నారు. పక్కనే కూర్చున్న మరో వ్యక్తి టేబుల్ మీద -ఫైళ్లు గుట్టలుగా పేరుకుని ఉన్నాయి. వాటి సంగతి వదిలేసి -తన్మయత్వంతో ఏదో పుస్తకం చదువుకుంటున్నాడు. వీరిద్దరిలో ఒకరికి పని చెప్పదలిస్తే మీరు ఎవరికి చెబుతారు! నిజమే -మీరే కాదు, ఎవ్వరైనా అదే పని చేస్తారు. పనిలో బిజీగా ఉన్న వ్యక్తికే పని చెప్పాలని అనుకుంటారు.
ఇంతవరకూ ఓకె. కానీ -ఆ రెండు కుర్చీల్లో మిమ్మల్ని ఊహించుకోవాల్సి వస్తే మీరు ఏ కుర్చీలో కూర్చున్నట్టు ఊహించుకుంటారు? మీరు ఏ కేటగిరీకి ఓటేసుకుంటారో నిజాయితీగా అంచనా వేసుకోండి. మీది నిరంతరం పని చేసే మనస్తత్వమా? క్షణకాలం బద్ధకించినా మనిషి ఎందుకూ పనికిరాకుండా పోతాడని వాదించే రకమా? బద్ధకం సకల దరిద్య్రాలకు నిజరూపం అన్న వాదన కరక్టే కావచ్చు. కానీ నిరంతరం పనిలో నిమగ్నమై సొంత జీవితాన్ని నిర్లక్ష్యం చేస్తే అది మరింత ప్రమాదం. పనికి బద్ధకించినా, అతిగా పనికి ఉపక్రమించినా -రెండూ కొంపముంచే వ్యవహారాలే అన్నది నిపుణులు చెప్తోన్న మాట.
జీవనం కోసం మనం చేసే పని -జీవితంలో భాగం మాత్రమే. దాన్ని నిర్లక్ష్యం చేస్తే బతుకు పల్టీ కొట్టడం ఖాయం. అలాగని -జీవనం కోసం మనం చేసే పనే జీవితం అనుకున్నా బతుకు పల్టీ కొట్టడం మరింత ఖాయం. ఈ రెండింటి మధ్య సమతుల్యం సాధించడం, ఏది ఎంత వరకూ అన్న విషయంపై అవగాహన పెంచుకోవడం తెలివైన వాళ్లు చేసే పని.
బద్ధకిస్తే బతుకు ఎలా పల్టీ కొడుతుందో అందరికీ తెలిసిన విషయమే కనుక దాన్ని పక్కనపెడదాం. కానీ, మనం చేసే పనే మన జీవితం అన్న భ్రమల్లో బతికేసే వర్క్‌హాలిక్‌ల లక్షణాలపై ఇటీవల శాస్ర్తియమైన సర్వే నిర్వహించారు. అలాంటి వారి జీవితంలో ప్రధానంగా ఏడు లక్షణాలను గుర్తించారు. అలాంటి లక్షణాల మీ జీవితంలోనూ కనిపిస్తున్నాయేమో ఒక్కసారి చెక్ చేసుకోండి. మీరు వర్క్‌హాలిక్‌లో కాదో మీకే అర్థమైపోతుంది.
జీవితానికి ఎన్నో లక్ష్యాలు. వాటి సాధనకు ఎన్నో పనులు. అయితే పనిలో మునిగిపోయి మిమ్మల్ని మీరు మర్చిపోతున్నారా? అదే ప్రమాదం. లక్ష్యంత ఎంత పెద్దదైనా, పనికి సంబంధించి కొన్ని పరిమితులు ఉంటాయి. ఆ పరిమితులను దాటి మీరు పని చేస్తున్నారంటే, మీరు పని రాక్షసులే. ఆ విషయాన్ని నిర్థారించుకోవడానికి ఏడు లక్షణాలు.
కుటుంబం పట్ల నిర్లక్ష్యం: మీ వృత్తిలో మీరు ఏస్థాయిలోనైనా ఉండొచ్చు. హోదా ఎలాంటిదైనా కావచ్చు. అయితే మంచి భర్తగా, మంచి తండ్రిగా కుటుంబంలో మార్కులు తెచ్చుకోవాలి. పనిలో మునిగిపోయి కుటుంబాన్ని నిర్లక్ష్యం చేయడం పని రాక్షసుడి మొదటి లక్షణం.
1. సినిమాలు, షాపింగ్‌ల్లాంటి ఆనందాలకు దూరమై ఎంతకాలమైంది. 2. పిల్లల హోంవర్క్ పట్టించుకుని ఎన్ని రోజులైంది. 3. శృంగార జీవితాన్ని మర్చిపోతున్నారా? 4. బాధ్యతలను స్వీకరించలేకపోతున్నారు కదూ! ఈ లక్షణాలకు మీరు దగ్గరవుతున్నారంటే, కుటుంబ జీవితానికి దూరమైపోతున్నట్టు. సీరియస్‌గా ఆలోచించాల్సిందే.
మత్తుకు బానిస: తరచూ మద్యం తీసుకుంటున్నారా? అతిగా సిగరెట్లు తాగుతున్నారు కదూ! అంటే, తీవ్రమైన ఒత్తిడికి గురవుతున్నారన్న మాట. ఒత్తిడికి దూరంగా జరగాల్సిన తరుణం ఆసన్నమైంది. లేదంటే -ఆరోగ్యం ఫట్. కెరీర్‌లో పరుగులో విజయం సాధించి కొరుకున్న స్థానాన్ని సంపాదించే సమయానికి హెల్త్ గ్రాఫ్ పూర్తిగా కిందకు దిగిపోతుంది. అప్పుడు కొసరు మాట అటుంచి, అసలు జీవితానికి ఎసరొస్తుంది. ఆలోచించండి. ఉన్నతమైన కెరీర్ జీవితంలో భాగమే కానీ, అదే జీవితం కాదు. కెరీర్ కోసం జీవితాన్ని ఫణం పెట్టడం సరైన నిర్ణయం కాదని తెలుసుకోండి.
నిద్రకు పాతర: ఎక్కువ పని చేసేవారిలో సాధారణంగా కనిపించే లక్షణం నిద్ర లేమి. నిద్ర లేకపోవడం, ఒత్తిడి కారణంగా ఇస్నోమియాకు దగ్గరవుతారు. క్రమంగా నరాలు బలహీనపడతాయి. సాధారణంగా ఇలాంటి లక్షణాలు ఉద్యోగంలో చేరిన కొత్తవారిలో ఉంటాయి. ఇలాంటి పరిస్థితే వస్తే మీకు మీరు గ్రహించి పరిస్థితిని మెరుగు పర్చుకోవాలి. మనసుకు, శరీరానికి విశ్రాంతినివ్వడం నేర్చుకోవాలి.
నిస్సత్తువ: నిరంతరం తుమ్ములు. పడితే వదలని పడిసం. ఇలాంటివి మిమ్మల్ని బాధిస్తుంటే అధిక పనితో ఒత్తిడికి లోనవుతున్నారని అర్థం. ఇది ఆరోగ్యంపై ప్రభావం చూపుతుంది. ఇలాంటి పరిస్థితుల్లో వీలుచూసుకుని కొన్ని రోజులు సెలవు పెట్టండి. నచ్చిన ప్రదేశాలకు వెళ్లి విశ్రాంతి తీసుకోండి. దీనివల్ల శరీరం, ఆ తరువాత మనసు పునరుత్తేజం పొందుతాయి. మునుపటి చురుకుదనం మీలో కనిపిస్తుంది.
సిల్లీ మిస్టేక్స్: వాట్స్ యువర్ నేమ్? అన్న చిన్న ప్రశ్నకు నాలుగైదు క్షణాలు ఆలోచించే పరిస్థితిలో ఉన్నారా? లేదంటే -మీతో కలిసి పని చేసే స్నేహితుడి పేరు సైతం గుర్తుకు రావడం లేదా? అప్పుడప్పుడూ ఎదురయ్యే ఇలాంటి పరిస్థితికి -మేధావితనం వచ్చి చేరుతుందన్న భ్రమల్లో ఉండకండి. మీకు మతిమరుపు లక్షణం పెరుగుతుందన్న మాట. లేదంటే -పనిమీద ఏకాగ్రత పెరగటం వల్ల మిగిలిన అంశాలు, సొంత విషయాలను కూడా పూర్తిగా నిర్లక్ష్యం చేస్తున్నారన్న మాట. నిరంతరం పని ధ్యాసలో ఉండేవారికి ఇతర విషయాలు గుర్తుండవు. పరిస్థితి తీవ్రతకు ఇది అద్దం పడుతున్నట్టే. చిన్న చిన్న తప్పులే కదాని సిల్లీగా తీసుకోకుండా, సీరియస్‌గా ఆలోచించండి. లేదంటే, తరువాత ఆలోచించడానికి టైం ఉండదు.
కోపం, నిరాశ: బలమైన కారణం లేకుండానే కోపం వచ్చేస్తుంది కదూ! చిన్న చిన్న విషయాలకే నిరాశ పెరిగిపోతోంది కదూ! ఇంట్లో వారిపై ఆగ్రహం, పిల్లల్ని కసురుకోవడం ఎక్కువయ్యాయి కదూ! ఇవన్నీ వర్క్‌హాలిక్‌ల లక్షణాలు. పని పెరగటం వల్ల ఎదురయ్యే తిక్క ఇబ్బందులు. ఇవి మీలోనూ ఉన్నాయని గ్రహిస్తే మాత్రం జాగ్రత్త పడండి. పనిని దూరం పెట్టిండి. సమతుల్యమైన పని ప్రణాళికలు వేసకోండి. లేదంటే -ప్రేమాను బంధాలను తెంచేస్తుంది. మీలోనే కాదు, మొత్తం కుటుంబానే్న అశాంతికి గురి చేస్తుంది.
కాఫీల మీద కాఫీలు: మీకు టీ, కాఫీ తాగే అలవాటుందా? ఎన్నిసార్లు తాగుతారు? ఒకటీ రెండుసార్లంటే ఓకే. అదే పనిగా సేవించేవాళ్లంతా వర్క్‌హాలికులే. అదీ చివరి స్టేజికి చేరిపోయిన వాళ్లన్నమాట. డజనుసార్లు కాఫీ, టీ తాగడమంటే విపరీతమైన మానసిక ఒత్తిడికి గురవుతున్నట్టు. ఒత్తిడి భయం నుంచి తప్పించుకోవడానికే వీటిని ఆశ్రయిస్తున్నారని అర్థం. కొన్నాళ్లకు మీ శరీరం డజను టీ, కాఫీలను భరించే స్థితిని కోల్పోతుంది. నిద్ర దూరమైపోతుంది. ఇస్నోమియా కౌగిలించుకుంటుంది. ఆరోగ్యం హరించుకుపోతుంది. ఈ లక్షణాలు కాసిన్ని కనిపించినా జాగ్రత్త పడండి. పనితీరు మార్చుకోండి.
పనిలో బద్ధకించకూడదు.. కరక్టే. కానీ, పనే జీవితం కాకూడదు. కుటుంబానికి ఎంత సమయం కేటాయించాలి. మీకోసం మీరెంత సమయం పెట్టుకోవాలి. పనికి ఎంత సమయం కేటాయించాలో మీకు మీరే నిర్ణయించుకోండి. ప్రణాళిక వేసుకోండి. అనారోగ్యంతో చేసే పనిలో నాణ్యత ఉండదు. ఇదీ, ముక్తాయింపు.

మతిమరుపులో మన నేతలు మహా మేధావులోయ్

2012-01-11T08:56:00.000+05:30

మన నేతలకు మహా అన్యాయం జరుగుతోంది. ఏమిటా అన్యాయం అంటున్నారా? నేను చెప్పడం కాదు విషయం తెలిస్తే, మీరే ఒప్పుకుంటారు. మన వాళ్లు మహా మేధావులు! చాలా మంది మేధావులను సమకాలీన సమాజంలో పిచ్చివాళ్లుగానే చూశారు. విమానం గురించి రైట్ సోదరులు చెప్పినప్పుడు ప్రపంచం వాళ్లను పిచ్చివాళ్లుగానే చూసింది. సోక్రటీసును ఏకంగా పై లోకాలకు పంపించేశారు. అలానే మన రాజకీయ మహామేధావులను కూడా చిన్నచూపు చూస్తున్నాం. ఎలా అంటారా? ఆ సంగతి చదివే ముందు ఇవి చదవండి.

ఒక శాస్తవ్రేత్త తన ఇంటి తలుపులకు ఒకటి పెద్దది, మరోటి చిన్నది రెండు రంధ్రాలు చేశాడట! ఎందుకలా అంటే పిల్లులు లోనికి రావడానికి, బయటకు వెళ్లడానికి అని సమాధానం చెప్పాడు. మరి రెండెందుకు అంటే ఒకటి చిన్నపిల్లికి మరోటి పెద్ద పిల్లికి అంటూ చెప్పుకొచ్చాడు. మాకు తెలుసులే ఆ ప్రపంచ ప్రఖ్యాత శాస్తవ్రేత్త అంటున్నారా? సరే ఈ మధ్య టైమ్స్ వాళ్లు మ్యాన్ ఆఫ్‌ది సెంచరీ అంటూ ఐన్‌స్టిన్ గురించి ఆసక్తికర విషయాలు పేర్కొన్నారు.
ఐన్‌స్టిన్ ప్రినె్ట్సన్ యూనివర్సిటీలో పని చేశారు. యూనివర్సిటీ నుండి ఒకసారి ట్యాక్సీలో ఇంటికి వెళుతున్నారు. ఇంటి అడ్రస్ మరిచిపోయారు. అయితే ట్యాక్సీ డ్రైవర్ ఐన్‌స్టిన్‌ను గుర్తించలేదు. ఇప్పుడు ఇంటికెలా వెళ్లడం అనే ఆలోచనలో పడ్డాడు. కొద్దిసేపటి తరువాత డ్రైవర్‌తో ఐన్‌స్టిన్ ఇల్లు తెలుసా? అని అడిగాడు. ఈ నగరంలో ఐన్‌స్టిన్ ఇళ్లు తెలియని వారెవరుంటారు? ప్రతి ఒక్కరికి తెలుసు అన్నా డు. ఐతే ఆయన ఇంటికి పదా! అన్నాడు ఐన్‌స్టిన్! ఆయన్ని మీరు చూడాలనుకుంటున్నారా? అని డ్రైవర్ ఆసక్తిగా అడిగాడు. ఐన్‌స్టిన్ చిరునవ్వుతో అది కాదు నేనే ఐన్‌స్టిన్‌ను ఇంటి అడ్రస్ మరిచిపోయాను అని చెప్పాడు నింపాదిగా! మరోసారి ఎక్కడో లోకల్ ట్రైన్‌లో ప్రయాణిస్తుండగా, టికెట్ ఎక్కడో పడిపోయిందని కంగారుగా వెతకసాగాడు. అది గమనించి కండక్టర్ సార్ మిమ్ములను నేను గుర్తుపడతాను, మీరు టికెట్ కొన్నారు, ఆ విషయం నాకు తెలుసు. వెతకాల్సిన అవసరం లేదు పోతే పోనివ్వండి అన్నాడు. అయినా కంగారుగా ఐన్‌స్టిన్ అలానే వెతకసాగాడు. కండక్టర్ దక్కరకు వచ్చి వదిలేయండి సార్ మీరు నాకు తెలుసు అన్నాడు. దానికి ఐన్‌స్టిన్ నేనెవరో మీకు తెలియవచ్చు కానీ నేను ఎక్కడ దిగాలో నాకు గుర్తు లేదయ్యా! బాబు ఇప్పుడా టికెట్ చూస్తే కానీ ఎక్కడ దిగాలో తెలియదు అని దిగులు పడ్డాడట!

మేధావుల్లో ఇలాంటి లక్షణాలు సహజమే. ఐతే ఏంటీ ? అనే కదా మీ ప్రశ్న. చెప్పదలుచుకున్నదాన్ని మరిచిపోయి ఏదేదో చెబుతున్నాననే కదా మీ అనుమానం.

ఇప్పుడు బాగా ఆలోచించండి మన నాయకులకు అన్యాయం జరిగిందా? లేదా? తన పేరును, తన ఇంటిని మరిచిపోయిన వాడే మేధావి అయినప్పుడు ఓటేసిన లక్షల మంది ఓటర్లను ఐదేళ్ళ వరకు మరిచిపోయేవాడు ఎంత మహామేధావి అయి ఉంటాడు. మీ, మా నియోజక వర్గం అనే తేడా లేదు మన నాయకులంతా ఐదేళ్ల వరకు మనను మరిచిపోతున్నారంటే మన నేతలు మహా మేధావులు అని అంగీకరించి తీరాల్సిందే. మరిచిపోవడం మీకూ మంచిదే! ఒకవేళ గుర్తుంటే ఒక్కో పార్టీ ఎన్నికల ప్రణాళికలో ఏం చెప్పిందో గుర్తుకు తెచ్చుకోండి. ఎన్నికలయ్యాక వాటిని వారు మరిచిపోతున్నారు కాబట్టే కొత్త మాటలు చెప్పగలుతున్నారు. తెలివిని ఐ క్యూ అని కొలిచినట్టు మతిమరుపును కొలిచే విధానం ఉంటే మన నేతలు ప్రపంచానికి మతిమరుపులో పాఠాలు నేర్పించగలరు.

రామాలయం కట్టకపోతే దేశం సర్వనాశనం అవుతుందని గగ్గోలు పెట్టి ఊరువాడ తిరిగి ఇటుకలు సేకరించి, ఇటుకపై ఇటుక పేర్చి అధికార భవనాన్ని నిర్మించుకునే నాయకులు ఆ వెంటనే విషయం మరిచిపోతారు.

వ్యవసాయానికి విద్యుత్ చార్జీలు అంత భారీగా పెంచితే ఎలా భరిస్తాం అంటూ ఆందోళనకు దిగిన వారిని పిట్టలను కాల్చినట్టు కాల్చడం కూడా వీరోచిత చర్యగా సమర్ధించుకున్న మహానుభావుడు, అధికారం పోగానే ఆ విషయం మరిచిపోయి విద్యుత్ చార్జీలను తగ్గించేంత వరకు చివరి రక్తం బొట్టు వరకు ఉద్యమిస్తాను అని రోడ్డుమీద బైటాయించడం అంటే అతని మతిమరుపు స్థాయి సామాన్యమైనదా? ఆయన మహామేధావి కాకుంటే మరేమిటి? అమ్మానాన్న లేని అనాధను శిక్ష వేయకుండా వదిలేయండి న్యాయమూర్తిగారూ అని వెనకటికొకడు కోర్టులో దీనంగా వేడుకున్నాడు. వాడి ఏడుపు అందరికీ కన్నీళ్లు తెప్పించింది ఇంతకూ కేసు ఏమిటంటే వాడు అమ్మానాన్నలను హత్య చేశాడు. ఆ విషయం మరిచిపోయాడు కాబట్టి వాడు కచ్చితంగా మహామేధావి. మామను పోటు పొడిచిన వారు ఆ విషయం మరిచిపోయి మామ ఫోటోతో ఓట్లు అడుక్కోవడం అంటే మతిమరుపు గొప్పతనమే.

మీ ఇ-మెయిల్ అకౌంట్ పాస్‌వర్డ్ మీరు మరిచిపోవద్దు. కానీ అది మీ మాజీ ప్రేయసి పేరనే విషయం మీ శ్రీమతి మరిచిపోకపోతే మీ జీవితం రాంగోపాల్ వర్మ సినిమా అంత అయోమయంగా తయారవుతుంది.

నేతలతో వేషాలేయిస్తున్న వార్తా చానళ్లు

2012-01-10T09:17:00.000+05:30

టీవిలో కనిపించడానికి గాంధీ భవన్‌లో మహిళా కార్యకర్త నృత్యం చేస్తే, టిడిపి కార్యాలయం ఎన్టీఆర్ భవన్‌లో ఒక కార్యకర్త చిత్రవిచిత్ర వేషాలు వేస్తుంటారు. న్యూస్ చానల్స్ పుణ్యమా అని కార్యకర్తలతో మొదలైన ఈ జబ్బు ఇప్పుడు పెద్ద నాయకుల వరకు వెళ్లింది. కార్యకర్త వేషాలేస్తే వారితో పోటీ పడి పెద్ద నాయకుడు డప్పు వాయిస్తున్నాడు, బోనం ఎత్తుకుంటున్నాడు, బతుకమ్మ ఆడుతున్నాడు.

రాజకీయాల పట్ల నీకు ఆసక్తి లేకపోవచ్చు, కానీ రాజకీయాలకు నీ పట్ల ఆసక్తి ఉంటుంది ఇదో రాజనీతిజ్ఞుడు చెప్పిన మాట. నిజమే మనకు రాజకీయాల పట్ల ఆసక్తి ఉన్నా లేకున్నా రాజకీయాలు మన జీవితంపై తీవ్రమైన ప్రభావం చూపుతాయి. మన జీవితాలను శాసిస్తాయి. మనను అభివృద్ధి పథంలో తీసుకు వెళ్లేవి, మన జీవితాలను సమస్యాత్మకంగా మార్చేవి, సమస్యలను పరిష్కరించేవి అన్నీ రాజకీయాలే. చివరకు అడవుల్లో జీవించే వారిపై సైతం ప్రభుత్వం తన ప్రభావం చూపుతుంది. అలాంటిది మనపై ఇంకెంత ప్రభావం చూపుతుంది. రాజకీయాల్లో ఒకప్పుడు ఆలోచనా పరులు క్రియాశీలక పాత్ర వహించేశారు. రాజకీయాల్లో ఆలోచనలకు ప్రాధాన్యత ఉండేది. కానీ తెలుగునాట తెలుగు చానల్స్ విజృంభణ తరువాత తమాషాలు చేసేవారే రాజకీయాల్లో చురుగ్గా కనిపిస్తున్నారు.

మీరు వేషాలు వేయగలరా? తమాషాలు చేయగలరా, సిగ్గుపడకుండా గుంపులో డ్యాన్స్ చేయగలరా? ఇంకెందుకాలస్యం రాజకీయాల్లో చేరిపోండి బాగా రాణిస్తారు. నిజానికి ఈ లక్షణాలన్నీ ఉంటే సినిమా వేషాల కోసం ప్రయత్నించాలి, కానీ ఇప్పుడీ లక్షణాలు సినిమాల్లో కన్నా రాజకీయాల్లో రాణించడానికి ఎక్కువగా ఉపయోగపడుతున్నాయి. నూతన సంవత్సరం సందర్భంగా గడిచిన సంవత్సరంలో రాష్ట్ర రాజకీయాల్లో ఆసక్తికరమైన అంశాలతో దాదాపు అన్ని చానల్స్ ప్రత్యేక కార్యక్రమాలను ప్రసారం చేశాయి. అన్ని చానల్స్‌లోనూ ఎక్కువ ప్రాధాన్యత లభించింది మంత్రి శంకర్‌రావుకే. ఒక చానల్ వాళ్లు ఏకంగా ఆయనకు కామెడీ కింగ్ అనే అవార్డు ప్రకటించారు.
ఏడాది కాలంలో ఆయన చేసిన చిత్రవిచిత్రమైన వేషాలను చానల్స్ చూపించాయి. జీ న్యూస్‌లో, సాక్షి చానల్‌లో శంకర్‌రావు ఆటపాటలు, వింత మాటలను ప్రత్యేకంగా చూపించాయి. సాధారణంగా ఒక కార్యక్రమానికి మంత్రిని అతిధిగా పిలిస్తే రిబ్బన్ కట్ చేయడం, ఉపన్యసించడానికే పరిమితం అవుతారు. కానీ రికార్డింగ్ డ్యాన్స్ వాళ్లు శంకర్‌రావును పిలిస్తే ఆయన ఏకంగా అక్కినేని నాగేశ్వరరావు పాట నేను పుట్టాను ఈ లోకం నవ్వింది అంటూ మొత్తం పాటమీద డ్యాన్స్ చేశారు. ఒక మంత్రి రికార్డింగ్ డ్యాన్స్ చేస్తే కచ్చితంగా అది ఏ చానల్‌కైనా పసందైన వార్త అవుతుంది.

చానల్స్‌కు ప్రధానంగా దృశ్య ప్రధానమైన అంశాలు కావాలి. టికెట్ రాలేదా? గాంధీభవన్‌లో కర్టెన్లు తగలబెట్టండి బ్రహ్మాండమైన కవరేజీ వస్తుంది అంటూ సలహాలిచ్చి మరీ ప్రోత్సహించారు. 2004 ప్రాంతంలో చానల్స్ వాళ్లు ట్రైనింగ్ ఇస్తే ఇప్పుడు నాయకులు రాటుదేలి పోయారు. ఈ పోటీలో సీనియర్ నాయకులు వెనకబడి పోతే వేషాలు వేయగలిగిన వారు ముందు వరుసలో ఉంటున్నారు. బంగిఅనంతయ్య అని కర్నూలులో ఉంటారు. పెట్రోల్ ధరలు పెంచినా, దేశంలో ఏం జరిగినా ఆయన టీవిలో కనిపించాల్సిందే. మరి ఆయన అంత గొప్ప నాయకుడేం కాదు. ఆయన్ని టిడిపి నుండి బయటకు పంపించారు. కానీ ఆయన ఒకసారి పాడె కట్టుకుని శవంలా పడుకుంటారు, మరోసారి కొజ్జాలతో కలిసి ఉద్యమిస్తారు, అల్లూరి సీతారామరాజు, సుభాష్ చంద్రబోస్‌లా వేషం వేసుకొని నిరసన వ్యక్తం చేస్తారు. దాంతో ఆయన్ని టీవిల వాళ్లు ఇష్టం ఉన్నా లేకున్నా ప్రముఖంగా చూపించేయక తప్పదు.
ఉత్తరాది వారిలో నృత్యాలు చేసే సంప్రదాయం ఎక్కువగానే ఉంది. దేశంలో ఏ మూల ఎక్కడ కాంగ్రెస్ గెలిచినా గాంధీ భవన్‌లో ఒకావిడ నలుగురితో కలిసి డ్యాన్స్ చేస్తుంది. ఆమె చూడడానికి బాగానే ఉంటుంది, అందరి ముందు డ్యాన్స్ చేస్తుంది. టీవిలకు ఇంత కన్నా ఏం కావాలి. దాంతో ఆమెను టీవిలో చూపించేస్తారు. పార్టీలో కీలక బాధ్యతలు వహించే వారి కన్నా టీవిల్లో వీరి హడావుడే ఎక్కువగా ఉంటుంది.

టిడిపిలో గౌడ్ అనే ఒక కార్యకర్త ఉన్నారు. రైతు ఉద్యమం జరిగితే అతను రైతు వేషంలో ప్రత్యక్షమవుతారు. అవినీతి, ధరల పెరుగుదల సందర్భం ఏదైనా కావచ్చు వ్యక్తి ఒక్కరే కాని వేషాలు వేరువేరుగా ఉంటాయి. మద్యం ధరలు ఎంఆర్‌పి కన్నా ఎక్కువ ధరకు అమ్ముతున్నారని టిడిపి అధ్యక్షుడు ఉద్యమించాలని పిలుపు ఇచ్చారు. తెలుగు తమ్ముళ్లు నిజంగానే మందు కొడుతూ రోడ్డుపై పడిపోతూ టీవిల ముందు జీవించేశారు. ఇదేంటని విమర్శలు వస్తే మేం మా పాత్రలో సహజంగా నటించాం అంతే తప్ప మరో ఉద్దేశం లేదన్నారు. ఆ తరువాత ఏకంగా తెలుగు మహిళలు మందు బాటిల్స్ పట్టుకుని తాగుతున్నట్టు నటిస్తూ ఎక్సైజ్ కమీషనర్ కార్యాలయం ముందు బైఠాయించారు. టీవిలో కనిపించాలంటే ఈ వేషాలు అవసరమా? మద్యంపై ఉద్యమిస్తున్నారా? నలుగురు నవ్వుకునేట్టు నటిస్తున్నారా?

చిన్న నాయకులకే కాదు మన చానల్స్ పుణ్యమా అని ఈ వేషాలు పెద్ద నాయకులకు సైతం తప్పడం లేదు. వెరైటీగా ఉండాలని ఒక సినిమాలో హాస్య నటుడు దీపావళి నాడు రంగులు పూస్తాడు, దసరా రోజు బాణా సంచా కాలుస్తాడు, గొబ్బెమ్మలు సంక్రాంతి నాడే ఎందుకు పెట్టాలి అని వాదిస్తూ హోళీ నాడు పెడతాడు. ఏ పండుగ రోజున ఏం చేయాలో ఒక పద్ధతి ఉంటుంది. చానల్స్‌లో ఎక్కువ సమయం కనిపించాలంటే రాజకీయ నాయకుల కార్యకలాపాలు దృశ్య ప్రధానంగా ఉండి తీరాలి కాబట్టి ఎప్పుడు ఏం చేయాలనేది పట్టించుకోకుండా నాయకులు వేషాలేస్తున్నారు. తెలంగాణలో బోనాలు, బతుకమ్మ పండుగ అనేవి తెలంగాణకు సంబంధించి ప్రత్యేకత గలవి. రైతు పోరుబాట పేరుతో చంద్రబాబు వరంగల్ జిల్లాలో పర్యటించి బోనం ఎత్తుకున్నారు. చానల్స్ వారు కోరినంత సేపు డప్పు వాయించారు. నిజానికి ఆ డప్పు వ్యవహారం ఏమిటో? ఎందుకు వాయిస్తారో ఆయనకు తెలియదు. కానీ చెప్పిందే చెప్పే తన ఉపన్యాసం కన్నా డప్పు వాయించడాన్ని చానల్స్‌లో ఎక్కువ సమయం చూపిస్తారని ఆయనకు తెలుసు. ఆయన ఊహించినట్టే ఉద్రిక్తతలు, గొడవల మధ్య కూడా ఆయన డప్పు వాయిస్తున్న దృశ్యాలకు చానల్స్‌లో ఎక్కువ ప్రాధాన్యత లభించింది. చానల్స్ లేని కాలంలోనే ఎన్టీఆర్ మహానాడులో లొట్టిపిట్టల ఊరేగింపు, ముగ్గుల పోటీ, వంటల పోటీ వంటి చిత్రవిచిత్రమైన వాటిని పరిచయం చేశారు. ఆయన సన్యాసి వేషంలో కొన్నాళ్లు కనిపించారు. ఆయన స్వయంగా నటుడు కాబట్టి ఆయనకివి చెల్లుబాటు అయ్యాయి కానీ ఇప్పుడు కార్యకర్తలు మొదలుకొని, పెద్ద నాయకుల వరకు టీవి వార్తలో సముచితమైన వాటా కోసం వేషాలు వేయక తప్పడం లేదు.
చానల్స్ పుణ్యమా అని దృశ్య ప్రధానమైన రాజకీయాలు పెరిగిపోయాయి. ఒక మంత్రి నేలపై కూర్చోని సమీక్షలు నిర్వహించినా, నాయకులు డప్పు వాయించినా, నృత్యాలు చేయడం అంతా చానల్స్ రాజకీయం పుణ్యమే. రాజకీయాలు సీరియస్ విషయాలు. దాన్ని చివరకు ఇలా తమాషాగా మార్చడం నాయకులకు మంచిది. సమాజానికీ మంచిది కాదు.

విమర్శలను ఎదుర్కోవడం లో జవహర్ లాల్ నెహ్రు ... ఇందిరాగాంధీ కాలం నుంచి సోనియా వరకు........... సామజిక మాధ్యమాలపై సెన్సార్షిప్ సాద్యమా ?

2012-01-08T12:23:00.003+05:30

దేశ తొలి ప్రధానమంత్రి జవహర్‌లాల్ నెహ్రూను ఈ దేశ ప్రజలు కనిపించే దైవంగా భావించే వారు. అప్పటివరకు బ్రిటీష్ పాలన అనుభవించిన మనకు ప్రజాస్వామిక పాలన ఎలా ఉంటుందో చూపిన వారు. ప్రజల్లో ఆయన పట్ల విపరీతమైన అభిమానం ఉండేది. ఇప్పుడంటే ఇమేజ్ కోసం మీడియాను మేనేజ్ చేసుకోవడం మన నాయకులకు తెలుసు. అలాంటి మేనేజ్‌మెంట్ టెక్నిక్‌లు ఏమీ లేని కాలంలోనే ఆయన పట్ల జనంలో విపరీతమైన అభిమానం ఏర్పడింది. అలాంటి నెహ్రూపై ఒక పత్రికలో విపరీతంగా విమర్శిస్తూ తరుచుగా వ్యాసాలు వచ్చేవి. తీరా చివరకు తెలిసిందేమిటంటే ఆ వ్యాసాలు రాసింది స్వయంగా నెహ్రూనే తనను తాను సమీక్షించుకోవడానికి స్వయంగా ఆయనే తనపై ఇలాంటి వ్యాసాలు రాసుకునే వారట!
అది నెహ్రూ కాలం

ప్రధానమంత్రి శ్రీమతి ఇందిరాగాంధీ ఆమె ఇద్దరు కుమారులు రాజీవ్‌గాంధీ, సంజయ్‌గాంధీ ముగ్గురూ భోజనం చేస్తున్నారు. ఏదో ఒక విషయంపై వాడిగావేడిగా చర్చ సాగుతోంది. ఇంతలో సంజయ్‌గాంధీ పరుషంగా ఒక మాట అన్నాడు. రాజీవ్‌గాంధీకి కోపం వచ్చింది. తల్లితో మాట్లాడే పద్ధతి అదేనా? అంటూ సంజయ్‌పై ఆగ్రహం వ్యక్తం చేశాడు. తమ్ముడి మాటలపై ఏమీ అనడం లేదేమిటని తల్లిని కూడా అడిగాడు. ఇందిరాగాంధీ నవ్వుతూ సంజయ్‌గాంధీ తన తల్లితో పరుషంగా మాట్లాడితే నేను దానికి తగినట్టుగానే స్పందించేవాడిని, కానీ అతను ఈ దేశ ప్రధానమంత్రితో పాలనపై తన అసంతృప్తిని పరుషంగా వ్యక్తం చేశాడు. అతనికా హక్కు ఉంది అని సమాధానం చెప్పారు.
దేశంలో అత్యవసర పరిస్థితిని విధించిన ఇందిరాగాంధీ సైతం దేశ ప్రధానిని విమర్శించే హక్కు పౌరుడికి ఉందని అంగీకరించారు.
అది ఇందిరాగాంధీ కాలం
* * *

ప్రస్తుతం మనమున్నది కోడలి గారి కాలంలో...
కోడలిగారిని సామాజిక మాధ్యమాల్లో ఎవరో ఏదో విమర్శ చేశారట! దాంతో కేంద్ర మంత్రి కపిల్‌సిబల్ వాటిపై సెన్సార్‌షిప్ విధించే ఆలోచన చేశారు. కపిల్‌సిబాల్ ఇటీవల విలేఖరుల సమావేశంలో సోషల్ నెట్‌వర్కింగ్ వెబ్‌సైట్స్‌లో రాజకీయ నాయకులపై వస్తున్న అభ్యంతరకరమైన కామెంట్స్‌పై తీవ్రంగా స్పందించారు. శ్రీమతి సోనియాగాంధీ పట్ల అభ్యంతరకరమైన రాతలు సామాజిక మాధ్యమాల్లో( సోషల్ నెట్‌వర్కింగ్ వెబ్‌సైట్స్) రాస్తున్నారని, ఈ వీటి ఆంక్షలు విధించే విషయం పరిశీలిస్తున్నట్టు ప్రకటించారు. దేశంలో ఇది పెను సంచలనానికి దారి తీసింది. సామాజిక మాధ్యమాలపై ఆంక్షలా అంటూ నెట్ జనులు ఆగ్రహం వ్యక్తం చేశారు. సోషల్ నెట్‌వర్కింగ్ సైట్స్‌లో కపిల్‌సిబల్ తీరుపై మండిపడ్డారు. దీనిపై దేశ వ్యాప్తంగా చర్చలు జరుగుతున్నాయి.
మేడమ్ గోప్యత కోసం పదికోట్ల మంది నెట్‌జనుల స్వేచ్ఛను హరిస్తారా? అంటూ ప్రశ్నించారు. న్యాయవాదిని ఐటి మంత్రిగా నియమిస్తే ఇలానే ఉంటుంది అంటూ ప్రముఖ స్టాక్ బ్రోకర్ రాకేష్ ఝున్‌ఝున్ వాలా మండిపడ్డారు. ఇది ఐటం సాంగ్ కోసం మాయావతిని ఎంపిక చేసుకోవడం లాంటిదే అని దురుసుగా వ్యాఖ్యానించారు.
సామాజిక మాధ్యమం ఈ దశాబ్దపు అద్భుతమేకాదు శతాబ్దపు అద్భుతంగా భావించే వాళ్లు పెద్ద సంఖ్యలో ఉన్నారు. ఆన్‌లైన్‌లో కొంత మంది
స్నేహితులతో నిరంతరం సామాజిక మాధ్యమం వల్ల టచ్‌లో ఉండవచ్చు. ఆన్‌లైన్‌లో పాత స్నేహితులను కలువ వచ్చు, కొత్త స్నేహాలు చేసుకోవచ్చు. రెండు మూడు దశాబ్దాల క్రితం చదువుకుని ఎక్కడెక్కడో ఉద్యోగాలు చేస్తున్న వారు సామాజిక మాధ్యమం పుణ్యమా అని మళ్లీ ఆన్‌లైన్‌లో టచ్‌లో ఉంటున్నారు. ప్రపంచంలో ఎక్కడెక్కడి వారు ఒక చోట చేరుతున్నారు. సాహిత్యం కావచ్చు, రాజకీయాలు కావచ్చు ఒకే రకమైన అభిరుచి గల వారు కొన్ని వేల మంది స్నేహితులుగా మారవచ్చు. అదీ ఇదీ అని లేదు. ఏ రంగంలో అభిరుచి ఉన్న వారైనా ఏకం కావచ్చు. గ్రూపులు, ఫోరంల ద్వారా ఎక్కడెక్కడి వారు ఏకమవుతున్నారు. ఏ అంశంపైనైనా వారు నిర్మోహమాటంగా తమ అభిప్రాయాలను వెల్లడించుకుంటున్నారు. కొన్ని అభిప్రాయాలు కొందరికి నచ్చకపోవచ్చు, కొన్ని వివాదస్పదం కావచ్చు కానీ అభిప్రాయాలను స్వేచ్ఛగా చెప్పుకునే అవకాశం మాత్రం అభినందనీయం.
బ్రిటీష్ పాలనా కాలంలో సంఘ సంస్కర పరులు తమ భావాల వ్యాప్తికి పత్రికలు ప్రారంభించారు. తరువాత స్వాతంత్య్ర పోరాటం కోసం పత్రికలను ప్రారంభించారు. తరువాత సంపన్నులు వ్యాపారంగా పత్రికలు ప్రారంభించారు. ఇటీవల కాలంలో రాజకీయ పక్షాలు, కార్పొరేట్ కంపెనీలు పత్రికలు, చానల్స్ ప్రారంభిస్తున్నారు. మీడియా పార్టీల వారిగా విడిపోయింది. కార్పొరేట్ కంపెనీ తమ అభిప్రాయాలను వెల్లడించడానికి మీడియా ఉంది, రాజకీయ పార్టీ తమ పార్టీ ప్రచారం కోసం మీడియాను ఏర్పాటు చేసుకొంది. మరి సామాన్యుడు తన అభిప్రాయం చెప్పాలంటే సాధమేది. ఇలాంటి ప్రశ్నకు సమాధానంగా ఉద్బవించిందే సామాజిక మాధ్యమం. ఏ అంశంపైనైనా కావచ్చు సోనియాగాంధీ తీరు మీకు నచ్చలేదా? ప్రధానమంత్రి పప్పెట్‌గా వ్యవహరించడాన్ని మీరు జీర్ణం చేసుకోలేక పోతున్నారా? విడుదలైన సినిమా పరమ చెత్తగా ఉందని మీ కనిపిస్తుందా? క్షణం కూడా ఆలస్యం అవసరం లేదు. సామాజిక మాధ్యమంలో మీ అభిప్రాయాన్ని మీరు నిర్మోహమాటంగా వెల్లడించవచ్చు. మీ అభిప్రాయం బాగుందని మిమ్ములను మెచ్చుకునే వారు, చెత్తగా ఉందని విమర్శించే వారు నిమిషాల్లోనే తమ స్పందన తెలియజేస్తారు. అంటే ఒక రకంగా పైసా ఖర్చు లేకుండా ఎవరికి వారు సొంత మీడియాను ఏర్పాటు చేసుకోవడం అన్న మాట. కోట్ల రూపాయల పెట్టుబడితో, వ్యయ ప్రయాసల కోర్చి ఏర్పాటు చేసుకునే మీడియా తరహాలో క్షణాల్లో పైసా ఖర్చు లేకుండా మన అభిప్రాయాలు ప్రపంచానికి చాటి చెప్పే సౌకర్యం కచ్చితంగా అద్భుతమే.
సామాజిక మాధ్యమాలకు ఇది ఒక కోణం
అదే సమయంలో వీటి వల్ల తీవ్రమైన నష్టాలు సైతం ఉన్నాయి.
సోనియాగాంధీని కించపరిచే విధంగా సామాజిక మాధ్యమాల్లో వచ్చిన రాతలను చదివిన వారు ఎంత మంది ఉంటారో తెలియదు కానీ కచ్చితంగా కపిల్ సిబల్ ప్రకటనతో ఈ విషయం కొన్ని కోట్ల మందికి తెలిసి వచ్చింది. సోనియాగాంధీ

ఏ విషయం బయటకు మాట్లాడరు కాబట్టి సామాజిక మాధ్యమాలపై సెన్సార్ విధించాలనే ఆలోచన ఆమెకే వచ్చిందా? లేక ప్రభువును మించిన ప్రభు భక్తి ప్రకటిస్తున్న కపిల్ సిబల్‌కు వచ్చిందా? సోనియాగాంధీకి సంబంధించిన వ్యవహారంపై కపిల్ స్వతంత్రంగా ఈ నిర్ణయం తీసుకున్నారని భావించలేం. సోషల్ నెట్‌వర్కింగ్ వెబ్‌సైట్స్‌పై ఆంక్షలు విధించాలనే ఆలోచనకు సంబంధించిన అంశం కాంగ్రెస్ పార్టీ అంతర్గత వ్యవహారం కాదు. కపిల్ నుండి వచ్చిన ఈ ప్రకటనకు అమెరికా సైతం విస్తుపోయింది. ప్రజాస్వామిక దేశమైన ఇండియా నుండి ఇలాంటి ప్రకటనను ఊహించలేమని అమెరికా ప్రకటించింది. అభ్యంతరకరమైన రాతలపై అభ్యంతరాలు వ్యక్తం చేయడం సమంజసమే. అయితే దీన్ని సాకుగా చూపించి సామాజిక మాధ్యమాలపై ఆంక్షలు విధించాలనే ఆలోచన ప్రమాదకరం. ప్రజాస్వామిక వాదులు ఎవరూ దీన్ని హర్షించరు. ఈరోజు మీడియా కార్పొరేట్ కంపెనీల చేతుల్లో ఉంది. గతంలో మాదిరిగా మీడియాకు విశ్వసనీయత లేదు. కార్పొరేట్ కంపెనీల చేతుల్లో ఉన్న మీడియా ప్రజల సమస్యల కన్నా తమ సంస్థ ప్రయోజనంపైనే ఎక్కువగా దృష్టి పెడుతుంది. వ్యాపారం అన్నప్పుడు తన వ్యాపార ప్రయోజనాలకు పెద్ద పీట వేయడం సహజమైన చర్యనే. ఇలాంటి పరిస్థితిలో ఆవిర్భవించిన సామాజిక మాధ్యమాలు ప్రజల మాధ్యమాలుగా నిలుస్తున్నాయి. ప్రస్తుతానికి ఇంగ్లీష్ చదువులు చదివిన మధ్యతరగతి కంప్యూటర్ ఆధార ఉద్యోగుల హడావుడి మాత్రమే ప్రస్తుతం సామాజిక మాధ్యమాల్లో ఎక్కువగా కనిపిస్తోంది. సువిశాల భారత దేశంలో స్వల్ప సంఖ్యలో ఉన్న వీరికి పరిమితం అయిన సమయంలోనే అన్నా హజారే అవినీతికి వ్యతిరేకంగా ఉద్యమం సాగించినప్పుడు సామాజిక మాధ్యమాలు చూపిన ప్రభావం ప్రభుత్వాన్ని సైతం విస్మయపరిచింది. వీటిపై ఆంక్షలు విధించాలనే ఆలోచన వెనుక అన్నా హజారే అవినీతి వ్యతిరేక ఉద్యమాన్ని అణిచివేసే చర్య దాగి ఉందనే అనుమానాలు కూడా వ్యక్తం అవుతున్నాయి. ఇందులో నిజానిజాలు ఎలా ఉన్నా సామాజిక మాధ్యమాల ద్వారా అవినీతికి వ్యతిరేకంగా సాగుతున్న ఉద్యమం కచ్చితంగా ప్రభుత్వానికి ఇబ్బందికరంగానే తయారైంది. చిన్నపామునైనా పెద్ద కర్రతో కొట్టాలని సామెత. సామాజిక మాధ్యమాల్లో సభ్యులుగా ఉన్న యువత సంఖ్య స్వల్పమే కావచ్చు కానీ విద్యావంతులైన వీరి ప్రభావం చాలా ఎక్కువగా ఉంటుంది. సహజంగా వీరు మార్పును కోరుకుంటారు. 125 ఏళ్ల నుండి ఒకే పార్టీ రాజ్యం చేయడం వీరికి నచ్చదు. వారసత్వ రాజకీయాలు నచ్చవు. విదేశీయురాలైన సోనియాగాంధీ నాయకత్వం నచ్చదు. అలాంటప్పుడు సామాజిక మాధ్యమాలు కాంగ్రెస్ నాయకత్వానికి నచ్చకపోవడం సహజమే.

సామాజిక విప్లవకారుడు
టైమ్ మేగజైన్ ప్రతి సంవత్సరం ఈ ఏటి మేటి వ్యక్తిగా ఒకరిని గుర్తిస్తుంది. ఈ సంవత్సరం వ్యక్తిని కాదు మొత్తం సామాజిక మాధ్యమాన్ని గుర్తించింది. ప్రజల సమస్యలపై నిరసన గళం వినిపించిన ఉద్యమ కారుడిని ఈ ఏటి మేటి వ్యక్తిగా నిరసన కారుడిని ఎంపిక చేసింది. నిరసన కారుడు అంటే ఒక వ్యక్తిని గుర్తించడం కాదు. ఇటీవల కాలంలో జరిగిన మొత్తం ఉద్యమాలను దృష్టిలో పెట్టుకుని నిరసన ది ప్రొటెస్టర్ అనే పేరుతో నిరసన కారుడిని ఎంపిక చేశారు. నియంతృత్వ పాలనకు వ్యతిరేకంగా ఇటీవల తలెత్తిన పలు ఉద్యమాలకు గుర్తింపుగా ఈ ఎంపిక జరిగింది. అయితే ఈ ఉద్యమాలన్నింటిలో సామాజిక మాధ్యమాలే కీలక పాత్ర వహించాయి. అందుకే టైమ్ మేగజైన్ ఈ సంవత్సరం సామాజిక ఉద్యమ మాధ్యమాన్ని ఈఏటి మేటి వ్యక్తిగా గుర్తించినట్టు అయింది.
సామాజిక మాధ్యమాల ద్వారా అన్నీ అద్భుతాలే, ఎలాంటి నష్టాలు లేవు, సమస్యలు లేవు అని ఎవరూ చెప్పడం లేదు. మంచి ఎంతుందో అంతకు మించి చెడు కూడా జరుగుతోంది. అమెరికాలో కాపురాలు కూలడంలో ఫేస్‌బుక్ ప్రధాన పాత్ర వహిస్తున్నట్టు ఇటీవల కొన్ని సర్వేలు వెల్లడించాయి. అశ్లీల బొమ్మలు, మాటలకు అంతు లేదు. మార్పును కోరుతూ అమెరికా ఓటర్లు విలక్షణమైన తీర్పును ఇచ్చి ఒబామా రాష్టప్రతి కావడానికి దోహదం చేశారు. దీనికి సామాజిక మాధ్యమాలు కీలక పాత్ర వహించాయి. అలాంటిది స్వయంగా ఒబామా తమ పిల్లలకు ఫేస్‌బుక్ అకౌంట్ అవసరం లేదని ప్రకటించారు. ఈ వార్తను అమెరికా పత్రికలు ప్రధానంగా ప్రచురించాయి. మా పిల్లలు వ్యక్తిగత విషయాలను ఈ వయసులో ఫేస్‌బుక్ ద్వారా అందరికీ చెప్పుకోవలసిన అవసరం లేదు అందుకే వారికి ఫేస్‌బుక్ ఖాతా అవసరం లేదనుకుంటున్నట్టు ఆయన తెలిపారు.
సోనియాగాంధీని, సినిమా తారలనే కాదు బాబారాందేవ్ వంటి సన్యాసిని సైతం సామాజిక మాధ్యమాలు వదిలిపెట్టడం లేదు, వెకిలి మాటలు, బూతు బొమ్మలతో వెంటాడుతున్నాయి.
పెద్దవారే కాకుండా 18 ఏళ్ల లోపు వయసు వారు సామాజిక మాధ్యమాలకు బానిసలు అవుతున్నారని అమెరికాకు చెందిన అమెరికన్ అకాడమీ ఆఫ్ పీడియాట్రిక్స్ సంస్థ ఆరోగ్య అధ్యయనాల్లో ఈ విషయం తేలింది.
సామాజిక మాధ్యమాల గ్రూపుల్లో చర్చలు చివరకు ఆందోళనకు వేధింపులకు కారణమవుతున్నాయి. వేధింపులకు పాల్పడినా పట్టుబడమూ అనే ధీమాతో కొంతమందిలో నేర ప్రవృత్తి పెరిగిపోతున్నట్టు తేలింది. అయితే ఇన్ని నష్టాలు ఉన్నాయని సామాజిక మాధ్యమాలకు పిల్లలను దూరంగా ఉంచడం ద్వారా వారిని వెనక్కు నెట్టవద్దు అనేది నిపుణుల సూచన. వీటిలోని మంచి చెడులను వివరించి చెడు వైపు ఆకర్శితులు కాకుండా చూసుకోవాలి. లాటరీ వచ్చిందనో, వంటరిగా ఉన్నాను ప్రేమించుకుందామనే సందేశాల ద్వారానో సామాజిక మాధ్యమాలను కొందరు దుర్వినియోగం చేస్తున్నారు. ఇలాంటి వ్యవహారాలకు సంబంధించి దేశంలో దాదాపు పదివేల కేసుల వరకు ఉన్నాయి.
సామాజిక మాధ్యమాల వల్ల ఎన్ని లాభాలు ఉన్నాయో, అంతకు మించి నష్టాలూ ఉన్నాయి. ఆ రెండింటిలో ఏది కోరుకోవాలో చాయిస్ మన చేతిలోనే ఉంది.
నష్టాలు ఉన్నాయని ఆంక్షలు విధించలేం. ప్రపంచంలో కొన్ని వందల భాషలు ఉన్నాయి. ప్రపంచ వరకు ఎందుకు మన దేశంలోనే ఎన్నో భాషలు ఉన్నాయి. ఒక్కో భాషలో సామాజిక మాధ్యమాల్లో ఏం రాస్తున్నారో పరిశీలించి, సెన్సార్ విధించడం సాధ్యమా? ఒక్క మన దేశంలోనే రోజుకు 25 మిలియన్ల భారతీయులు ఫేస్‌బుక్ ఉపయోగిస్తున్నారు. వంద మిలియన్ల మంది గూగుల్‌ను ఉపయోగిస్తున్నారట! వీరి రాతలను సెన్సార్ చేయడం సాధ్యమా?
ఐఎస్‌ఐ అండతో భౌతికంగా దాడులు జరుగుతుంటేనే నివారించలేకపోతున్నాం ఇక కంటికి కనిపించకుండా జరిగే అక్షర దాడులను అరికట్టడం సాధ్యమా?
మరేం చేయాలి అంటే ఒక నిపుణుడు మంచి సలహా ఇచ్చారు. ఉపేక్షించాలి. ఔను నిజం ఊపేక్షించడానికి మించిన శిక్ష లేదు.
పూర్వం రోమ్ లో సెనెట్‌కు ఎవరైనా నచ్చకపోతే వారిని తిరస్కరిస్తూ ‘డామ్‌నాటియో మెమోరి’ అనే ప్రకటన చేసేదట! అంటే వారి జ్ఞాపకాలను చెరిపివేస్తున్నట్టు చేసిన ప్రకటన. అలాంటి ప్రకటన చేసిన తరువాత ఆ వ్యక్తి పేరును అన్ని రికార్డుల నుండి తొలిగిస్తారు. బర్త్ రికార్డ్స్ , రోమన్ ఆర్మీ రికార్డ్స్ వంటి వాటి నుండి తొలగిస్తారు. అంటే చరిత్రలో వారి పేరును చెరిపేస్తారన్నమాట!
అంటే ఆ వ్యక్తిని పూర్తిగా ఉపేక్షించడం.
కొన్ని కోట్ల మంది అకౌంట్లను పరిశీలించి ఎవరు అభ్యంతర కరంగా రాశారో పరిశీలించి సెన్సార్ చేయడం కన్నా అలాంటి వారిని ఉపేక్షిస్తే అంత కన్నా పెద్ద శిక్ష అవుతుంది కదా! బూతు బొమ్మలు, రాతలు కనిపించినప్పుడు సహజంగా ఆ గ్రూపులో ఉన్న ఇతరులే ఫిర్యాదు చేస్తారు.
ఇక ఇంత సువిశాల మైన దేశానికి నాయకత్వం వహించేవారు ఎవడో పనికిమాలిన వాడు ఫేస్‌బుక్‌లో ఏదో రాశాడని కలవరపడితే అది వాడికి సంతోషం కలిగిస్తుంది తాను విజయం సాధించాననే భావన కలిగిస్తుంది. అంటే కపిల్ సిబల్ ఒక రకంగా అలాంటి అభ్యంతర కరమైన రాతలు రాసిన వారిని ప్రోత్సహించినట్టు అయింది.
అభ్యంతరకరమై అంశాలు కనిపించినప్పుడు ఫిర్యాదు చేస్తే కొన్ని సామాజిక మాధ్యమాలు వాటిని తొలగిస్తున్నాయి. కొన్ని పట్టించుకోవడం లేదు. ఇలాంటి వికృత చర్యలను ఖండించాల్సిందే, అరికట్టడానికి ప్రయత్నించాల్సిందే అంతే తప్ప వీటిని సాకుగా చూపించి మొత్తం సామాజిక మాధ్యమాలను కంట్రోల్ చేయాలని ప్రభుత్వం ప్రయత్నించడం సహించరానిది.

వీళ్లు నిషేధించారు
పలు దేశాలు సామాజిక మాధ్యమాలను నిషేధించాయి. చైనాతో పాటు కొన్ని ఇస్లామిక్ దేశాలు సామాజిక మాధ్యమాలను నిషేధించాయి. ఇండియా లాంటి ప్రజాస్వామిక దేశంలో అది సాధ్యమా?
ఫేస్‌బుక్, యూ ట్యూబ్, ట్విట్టర్, బ్లాగర్, వికీమీడియా వంటి సామాజిక మాధ్యమాలను చైనా, పాకిస్తాన్, ఇరాన్, సిరియా, ఇథియోపియా, టర్కీ, థాయ్‌లాండ్, ఇండోనేషియా, యునైటెడ్ అరబ్ ఏమిరేట్స్ దేశాలు నిషేధించిన దేశాల జాబితాలో ఉన్నాయి.
నిజంగా మన దేశంలో సామాజిక మాధ్యమాలపై సెన్సార్ విధించాలనే ఆలోచన బూతు రాతల నివారణకా లేక పాలకులపై ప్రజల్లో ఉవ్వెత్తున ఎగిసిపడుతున్న అసంతృప్తి జ్వాలలను అణిచివేయడానికా? అన్నా హాజారే ఉద్యమానికి సామాజిక మాధ్యమాల ద్వారా మద్దతు లభించినప్పటి నుండి వీటిపై ఆంక్షలకు ప్రభుత్వం ఆలోచిస్తుందనే వాదన వినిపిస్తోంది.
నాటి నినాదం: అరచేతిని అడ్డుపెట్టి సూర్యోదయాన్ని ఆపలేరు

నేటి నినాదం: సెన్సార్‌షిప్‌తో సామాజిక మాధ్యమాల ఉద్యమాన్ని ఆపలేరు.

ఆదివారం ఆంధ్రభూమి లో పూర్తి పాఠం

http://www.andhrabhoomi.net/aadivavram-andhrabhoomi/t-830

నిజం చెప్పవద్దు.. అబద్దమాడవద్దు .. నాకు నచ్చిన news

2012-01-04T12:53:00.004+05:30

ఇది చాల కష్టమైన పని నిజం చెప్పవద్దు అలా అని అబద్దమాడవద్దు . ఇలంట వార్త రాయాలంటే కత్తిమీద సాములాంటిదే. భాషలో, విషయం లో పట్టు ఉంటేనే అది సాధ్యం. ఈనాడులో ఈరోజు వచ్చిన వార్త నాకు తెగ నచ్చేసింది . ఆస్తులు అమ్ముకున్నవాడు అమ్ముకున్నాము అని చెబుతాడు ఇది అందరు చేసే పని కానీ మహానుబావులు అలా చెప్పరు. ఈటివి వారు తెలుగు చానల్స్ మినహా మిగిలిన చానల్స్ అన్ని అమ్ముకున్నారు. మార్గదర్శి ఆధ్వర్యం లో చట్టవ్యతిరేకంగా డిపాసిట్లు వసూలు చేస్తున్నారని ఉండవల్లి అరుణ్ కుమార్ బయట పెట్టిన తరువాత చాల రోజుల నుండి చానల్స్ అమ్మేస్తున్నరనే వార్తలు పలు జాతీయ పత్రికల్లో వచ్చాయి. ఇప్పుడది అధికారికంగా వెల్లడయింది . అన్ని పత్రికలూ రామోజీ చానల్స్ అమ్మేశారని వార్త రాస్తే ఈనాడులో మాత్రం ౧౦౦ శతం వాటాల మార్పిడి అని చాల తెలివిగా అబద్దం చెప్పకుండా నిజం అర్ధం కాకుండా భలే రాశారు . రాజుగారికి అశుభ వార్త చెబితే కోపం వస్తుంది అందుకే మీ గుర్రం చచ్చింది అని చెప్పడానికి మీ గుర్రం మొండెం తల నుండి వేరయింది మహారాజ అంటూ ఏదో చెప్పాడని కథ . చానల్స్ అమ్మేసిన వార్త ఈనాడులో ఎలా ఉందో, ఇతర పత్రికల్లో ఎలా ఉందో చూడండి . జుట్టు ఉన్న ఆవిడ ఏ కొప్పు అయిన వేయగాలదన్నట్టు బాషలో పట్టున్న వారు ఏ విషయమైన ఎలా గైనా రాయగలరు . http://www.eenadu.net/Business/Businessinner.aspx?qry=bussi2

మందుదేవో భవ! ......మద్యం ప్రియుల కోసం గాంధీభవన్లో బొత్స టోల్ ఫ్రీ నెంబర్ ..మందు ధరల తగ్గింపునకు బాబు ఉద్యమం

2012-01-04T09:17:00.000+05:30

గాంధీభవన్‌లో ట్రింగ్ ట్రింగ్ మని సౌండ్ వినగానే పిసిసి అధ్యక్షుడు బొత్స సత్యనారాయణ ఉత్సాహంగా ఫోన్ ఎత్తారు. ఎదురుగానే చాలా మంది విలేఖరులు కూడా ఎప్పటి మాదిరిగానే ముచ్చట్లాడుతున్నారు. పైసా ఖర్చు లేకుండా మందు అభిమానులు టోల్ ఫ్రీ నంబర్‌కు కాల్ చేసి పిసిసి అధ్యక్షునితో ముచ్చట్లాడుకోవచ్చు. మంచి చెడు చెప్పుకోవచ్చు.
‘‘ఆ చెప్పమ్మా’’ అంటూ బొత్స తొలి కాల్ అందుకున్నారు. ‘‘షారూ! బొచ్చషారుగారేనా నేను గుంపులో గుర్నాధాన్ని మాడుతున్న’’ అన్నాడు. ‘‘తమ్ముడు అన్‌డ్యూటీలోనే ఉన్నట్టున్నాడు’’ అంటూ బొత్స నవ్వాడు. ‘‘ మీకేమీ ఇబ్బంది లేదు కదా! మద్యం దొరక్క ఏమైనా ఇబ్బంది ఎదురవుతుందా? చేతి నిండా తిండి, నోటి నిండా మందు, ఇంటి వద్దకే మద్యం అనేది మా ప్రభుత్వ లక్ష్యం. ఈ లక్ష్య సాధనలో ఎంత పెద్దవారు అడ్డువచ్చినా పక్కకు తప్పిస్తాం ’’ అంటూ బొత్స భరోసా ఇచ్చాడు.

‘‘ ఎంత పెద్దవారైనా తప్పిస్తాను అంటున్నాడంటే ముఖ్యమంత్రిని తప్పిస్తానని వార్నింగ్ ఇవ్వడమే కదా? కిరణ్‌ను తప్పించడానికి సిద్ధమవుతున్న బొత్స అని బ్రేకింగ్ న్యూస్ ఇచ్చేద్దామా?’’అని చానల్ కొత్త రిపోర్టర్ ఒకరు పక్కనున్న సీనియర్ చెవిలో ఊదాడు. చెవి ఓనర్‌కు తప్ప అక్కడున్న అందరికీ ఆ మాటలు స్పష్టంగా వినిపించాయి. ‘‘నా ఉద్దేశం అది కాదయ్యా? కాంగ్రెస్‌లో అందరం ఒక్కటే.. మాకు అడ్డు వచ్చేది అంటే బాబు అని అర్ధం చేసుకోవాలి’’ అని బొత్స వివరణ ఇచ్చారు.

బ్రేకింగ్ న్యూస్ ముందు బ్రేక్ చేయాలి కానీ అభిప్రాయం ఎవరికీ చెప్పొద్దని కొత్త రిపోర్టర్ తొలి పాఠం నేర్చుకున్నాడు.
‘‘షారూ ఇక్కడ నేన్ లైన్‌లో ఉంటే మీరూ మీరూ మాట్లాడుకుంటే ఇంక మేమెందుకు? ఆదాయం ఇచ్చేవాళ్ల మాటకు ఇలువేలేదా? ఇదేనా షారు’’ అని గుర్నాధం ఆవేదన వ్యక్తం చేశాడు.‘‘ అయ్యో కస్టమర్ ఇస్ గాడ్ అని మహాత్మాగాంధీ అన్నారు. నేను కస్టమర్‌ను చిన్నచూపు చూస్తానా? నెవర్ చెప్పండి’’ అన్నాడు.

‘‘షారూ బార్లో మా మానాన మేం తాగి రోడ్డుమీద పడి ఆనందంతో దొర్లుతుంటే కొందరు వెహికిల్స్‌తో మాకు అడ్డంగా వస్తున్నారు. రాత్రి ఎనిమిది నుండి అర్ధరాత్రి ఒంటిగంట వరకు రోడ్లు మీదికి వెహికిల్స్‌ను అనుమతించొద్దు . దాన్ని మా సమయంగా ప్రకటించాలి. ఈ సంగతి మీకు చెబుదామని ఫోన్ చేశాను’’అన్నాడు గుర్నాధం. ‘‘నేనెలాగూ రవాణా శాఖ మంత్రినే కాబట్టి తప్పకుండా ఆలోచిస్తాను. మంచి సలహా ’’అని బొత్స నోట్ చేసుకున్నాడు. ‘‘మీరే మా ప్రగతి రథ సారధులు మీ అభిప్రాయాలు మాకెంతో విలువైనవి చెప్పండి’’ అంటూ బొత్స మరో కాల్ అందుకున్నారు. రాష్ట్రంలో ప్రతి ఒక్కరితో ఫోన్‌లో మాట్లాడి అందరి అభిప్రాయాలు తెలుసుకుంటా? అని బొత్స పలికాడు.

‘‘సార్ మీ కార్యక్రమాన్ని నేను చాలా సేపటి నుండి చూస్తున్నాను. మనకు మంచి చేసిన మహనీయులందరినీ ఒకసారి స్మరించుకోవడం మన ధర్మం. నేను ఎన్టీఆర్ వీరాభిమానిని కాని ఆయన మాకు ద్రోహం చేశారు. నిషేధం విధిస్తే పొరుగున ఉన్న కర్నాటక, తమిళనాడు, ఒరిస్సా, యానాం వెళ్లి మందు కొట్టాల్సి వచ్చేది. మా కష్టాలను కడతేర్చడానికి ఆ దేవుడే బాబుగారిని పంపించారు. ఆయన నిషేధాన్ని ఒక్క తన్ను తన్ని ఆరువేల మద్యం షాపులు పెట్టారు. బెల్ట్ షాపులను ప్రపంచానికి పరిచయం చేశారు. అలాంటి వ్యక్తిని గుర్తు చేసుకోవలసిన అవసరం లేదా?’’ అని ఆ వ్యక్తి బొత్సను నిలదీశాడు. ‘‘చూడమ్మా ఇది మా పార్టీ ఆఫీసు మేం మా వాళ్లు చేసిన మంచి పనులనే స్మరించుకుంటాం’’ అని బొత్స సమాధానం చెప్పారు.

‘‘సార్ చేసిన మంచిని ప్రజలు ఎప్పుడూ మరిచిపోరు. మీ ఇమేజ్ జనంలో రోజు రోజుకు పెరిగిపోతోంది’’ అని ఇదంతా ఎన్టీఆర్ భవన్ నుండి లైవ్‌లో చూస్తున్న తెలుగునేతలు బాబును అభినందించారు.
కొన్ని కాల్స్ విన్నతరువాత బాబు ముఖంలో రంగులు మారాయి. బొత్స ప్రజల్లోకి దూసుకెళ్తున్నారు, భవిష్యత్తులో అతనితోనే పోటీ అని అన్నారు. ‘‘మనం సచివాలయాన్ని మించిన వ్యవస్థను ఏర్పాటు చేసుకున్నాం. ఇన్ని వందల మంది సిబ్బంది ఉన్నారు ఏం లాభం మీ ఎవ్వరికీ మందు ప్రియుల కోసం టోల్‌ఫ్రీ నంబర్ ఏర్పాటు చేయాలనే ఈ ఆలోచన తట్టలేదు ’’ అని బాధపడ్డారు.

బాబు 2004లో ఐటి వారిని నమ్ముకుంటే రోడ్డున పడేశారు. ఇది కాదని వారిని జెపికి వదిలేసి 2009లో పొలం బాట పట్టారు. అదీ వర్కవుట్ కాలేదు. రాష్ట్రంలో నాలుగు కోట్ల మంది ఓటర్లుంటే, ఓటర్లలో 80 శాతం వరకు మందు ఖాతాదారులే అనే విషయం గ్రహించిన తరువాత వారి అభిమానాన్ని చూరగొనాలని ఉద్యమ బాట పట్టారు. మద్యం ధర తగ్గించాలని ఉద్యమ బాట పట్టారు. రెట్టింపు ధరకు అమ్మడం వల్ల ఫుల్‌బాటిల్ తాగాల్సిన వారు సగం, ఆఫ్ బాటిల్ తాగాల్సిన వారు క్వార్టర్‌తో సరిపుచ్చుకుంటున్నారు ఇంత కన్నా అన్యాయం ఏమన్నా ఉందా? ధర తగ్గించాల్సిందే క్వార్టర్ బాటిల్ ధరతో ఫుల్‌బాటిల్ తాగండి అనే నినాదంతో ప్రజల్లోకి వెళ్లాలని నిర్ణయించుకున్నారు. మందు ప్రియుడ్ని నేరుగా కలుసుకొని వారికి దగ్గరవుదాం. తాగిన వాళ్లు అబద్ధంచెప్పరు, ఈసారి మనదే అధికారం ’’అంటూ బాబు ఉత్సాహంగా పలికారు.

తెలుగు చానల్స్ చర్చలు ఎవరికోసం ?

2012-01-03T12:39:00.000+05:30

వార్తా పత్రికల్లోని వార్తలు మేధస్సును ప్రదర్శించడానికి కాదు. ఐదవ తరగతి ఆరవ తరగతి చదువుకున్న వారికి సైతం విషయం అర్థమయ్యేట్టు ఉండాలి. అక్షరాలు చదవడం వస్తే చాలు పత్రికల్లోని వార్తలు అర్థం కావాలి. పత్రికల ప్రాథమిక సూత్రమిది. కవిత్వమో, కథలో అభిరుచి ఉన్నవారికి, మేధావులకు మాత్రమే అర్థమయ్యేట్టు రాస్తే ఫరవాలేదు. కానీ కచ్చితంగా వార్తలు మాత్రం అక్షర జ్ఞానం ఉన్నవారికి అర్థమయ్యే స్థాయిలో ఉండాలి. అతను ఇంగ్లీష్‌లో వార్త రాస్తే మేధావులకు సైతం అర్థ్ధమయ్యేది కాదు అని ఒక మేధావి గురించి చెబితే అలాంటి వ్యక్తిని వెంటనే ఆ స్థానం నుండి తొలగించాలి అని ఆ మాట విన్న జర్నలిస్టులు చెప్పారు. ఎందుకంటే మేధావు లకు మాత్రమే

అర్థమయ్యేట్టు రాసే అతనా పనికి పనికిరాడు. సామాన్యులకు అర్థ్ధమయ్యేట్టు రాయాలి. విషయం ఏమంటే పత్రికల్లో వచ్చే వార్తలపై ప్రతి రోజు ఉదయమే అన్ని తెలుగు చానల్స్‌లో సమీక్ష నిర్వహిస్తున్నారు. అది అవసరమా? అంటే పత్రికల్లో వచ్చిన వార్తలు పాఠకులకు అర్థం కావా? వీళ్లు విడమరిచి చెబుతారా? పోనీ ఆ వార్తల వెనుకు ఉద్దేశం ఏమిటో చెబుతారా? అలాంటిదేమీ ఉండదు. మూడు నాలుగు పార్టీల వాళ్లు కూర్చుంటారు. మధ్యలో చానలాయన ఒకరు. ఈ నలుగురికి ఒకరంటే ఒకరికి పడదు. వాళ్ల ధర్మం వాళ్లు నిర్వహించాలి. ఎడ్డెమంటే తెడ్డం అంటూ తమతమ పార్టీల వాదనలు వినిపించాలి. తమ పార్టీ అధ్యక్షుడు ఎంత పనికిమాలిన పని చేసినా ఆ పార్టీ తరఫున చర్చల్లో పాల్గొనే వారు దాన్ని సమర్థ్ధిస్తూ మాట్లాడాలి.

తెలంగాణ నాయకుల వాదన ఆంధ్ర నాయకులకు నచ్చదు, ఆంధ్ర నాయకుల వాదన తెలంగాణ వారికి నచ్చదు. అక్కడికక్కడే ఆవేశంగా ఖండించుకుంటారు. ఏ ఒక్క చానల్‌లోనూ అర్థవంతమైన చర్చ జరగదు. అలా జరుగుతుందని ఆశించడం తప్పే! ఒక పార్టీ వాళ్లు టీవి చర్చలన్నింటిని రికార్డు చేసి తమ పార్టీ కార్యాలయంలో సమీక్ష నిర్వహిస్తారు. చర్చలో ఆ పార్టీ వాళ్లు వెనకబడ్డారట! చర్చల్లో ఎదుటి వాళ్లు ఏం మాట్లాడినా అడ్డు తగులుతూ రచ్చ రచ్చ

చేసేయడం ఎలానో వాళ్లు చక్కని శిక్షణ ఇస్తున్నారు. పార్టీ పరంగా ఏ అంశంలోనైనా మన వాదన వినిపించే పరిస్థితి లేకుండా మనం డిఫెన్స్‌లో ఉంటే ఆ అంశంపై గట్టిగా అడ్డదిడ్డంగా వాదిస్తూ వాతావరణాన్ని ఎలా మార్చవచ్చునో వారికి శిక్షణ ఇచ్చారు. శిక్షణ తరువాత పరిస్థితి కాస్త మెరుగు పడిందని ఆ పార్టీ అధ్యక్షుడు పార్టీ వారికి కితాబు ఇచ్చారు. ఆ పార్టీ నుండి చర్చల్లో పాల్గొనే వారు పార్టీ ఇచ్చిన సూచనలను తు.చ. తప్పకుండా పాటిస్తూ చెప్పినట్టుగానే వాదిస్తున్నారు. ఏ పత్రిక ఏ పార్టీ వాదం వినిపిస్తోందో, ఏ చానల్ ఎవరి ప్రయోజనాల కోసం పని చేస్తుందో తెలుగు నాట ప్రజలు సులభంగానే అర్థం చేసుకుంటున్నారు. పత్రికల్లో వచ్చే వార్తలు పాఠకులకేమైనా అర్థం కాకుండా ఉన్నాయా? చర్చల పేరుతో ఆయా రాజకీయ పార్టీల వాళ్లు వార్తలను విశే్లషించి చెబితే కానీ పాఠకులు అర్థం చేసుకోలేని స్థితిలో ఉన్నారా?
ఒక ప్రాంతం వారి ఉనికిని మరో ప్రాంతం వారు భరించే స్థితిలో లేరు. ఒక కులం పొడ మరో కులానికి పడడం లేదు. చర్చల్లో ప్రత్యక్షంగా ప్రాంతాల ప్రభావం కనిపిస్తే, పరోక్షంగా కులం ప్రభావం కనిపిస్తోంది.
కులం, ప్రాంతం పడనప్పుడు ఎవరేమన్నా అందులో తప్పే కనిపిస్తుంది అది చాలా సహజం ఇది కాదనలేని నిజం. రాజకీయ పక్షాల ప్రతినిధులు తమ పార్టీ వాదన వినిపించి ప్రేక్షకులను ఆకట్టుకోవడానికి ప్రయత్నిస్తే ఫరవాలేదు. కానీ పక్క పార్టీ వాళ్లతో పోట్లాటకు దిగి, అదే విజయం అనుకుంటే అది ఎవరికీ ప్రయోజనం కలిగించదు. గురువారం ఉదయం ఐ న్యూస్‌లో జరిగిన చర్చ పరోక్షంగా కుల ప్రభావం చూపింది. మంత్రి శంకర్‌రావుపై జరిగిన దాడి చర్చ తరువాత లోక్‌పాల్‌పై చర్చ జరగాల్సి ఉండగా, ఎవరికి ఏదీ ముఖ్యం అనే అంశం వాదన చోటు చేసుకుంది. చివరకు ఏది ముఖ్యం అనే చర్చకే పరిమితం అయ్యారు. దాంతో లోక్‌పాల్‌పై చర్చ జరపలేదు. ఒకరు ముఖ్యం అనుకున్నది ఇతరులకు అంత ప్రాధాన్యత లేని అంశం కావచ్చు, అలానే ఇతరులు చాలా ప్రాధాన్యత గల అంశం అనుకున్నది వారికి అంతగా ప్రాధాన్యత గల అంశం కాకపోవచ్చు. ఇలాంటి చర్చల్లో మాట్లాడేప్పుడు చాలా జాగ్రత్తగా ఉండాల్సి వస్తుంది, అదంతా ముఖ్యమైంది కాదు మరో అంశం చర్చిద్దాం అంటే మాకు సంబంధించిన అంశం మీకు ముఖ్యమైంది కాదా? అనే ప్రశ్న ఆ వర్గం నుండి వస్తుంది. ఇది సహజం. తామరాకుమీద నీటిబొట్టులా లౌక్యంగా ఉండకపోతే ఇబ్బందిలో పడిపోతారు.

గతంలో మాదిరిగా ఒకే ఒక చానల్ ఉంటే వారు ఆడిందే ఆట వారు చూపిన వారే అందగాళ్లు. కానీ ఇప్పుడలా కాదు. చానల్స్‌ను తిడుతూ కూడా చానల్స్‌లో మాట్లాడేంత విస్తృతంగా అవకాశాలు ఉన్నాయి. మారిన పరిస్థితులను, ప్రాంతాలు, కులాలు, మతాలు, పార్టీలు వీటన్నింటిని దృష్టిలో పెట్టుకుని మాట్లాడాలి. ఉదయం సమయంలో టీవిల్లో ఈ చర్చలు వింటుంటే బయటి వారికి ఆ ఇంట్లో కొట్టుకుంటున్నారేమో అనిపిస్తుంది. ఒకరిపై ఒకరు అలా అరుచుకుంటుంటారు. ఎవరి అభిప్రాయం వినడానికైనా ఎవరికీ సహనం ఉండడం లేదు. అసలీ చర్చలు అవసరమా? అనే ఆలోచన చేయాలి. అవసరం అనుకుంటే ఇప్పుడు సాగుతున్న తీరులో మార్పులు అవసరమేమో చూడాలి. వివిధ పార్టీలకు చెందిన ప్రతినిధులకు ఎలాంటి అభిప్రాయాలు ఉన్నా వాటిని అణిచిపెట్టుకుని పార్టీ వాదన మాత్రమే వినిపించక తప్పదు. దాంతో వారి నిజమైన అభిప్రాయం బయటపడే అవకాశమే లేదు. అలాంటప్పుడు పార్టీల ప్రతినిధులను పిలిచే కన్నా ఆయా రంగాలకు చెందిన నిపుణులను, వివిధ ప్రాంతాలకు చెందిన మేధావులు, సామాజిక ఉద్యమ కారులకు చర్చలో అవకాశం కల్పించడం వల్ల కొంతలో కొంత మేలేమో

ట్రెండు మారింది స్క్రిప్ట్ మార్చండయ్యా!...రాజకీయ వ్యంగ్యం

2011-12-28T09:36:00.000+05:30

గళ్ల లుంగి. ఒకవైపు పైకి మరోవైపు కిందికి. ముఖానికి పెద్ద గాటు. మెడకు కట్టుకున్న కర్చీప్. చేతిలో పెద్ద కర్ర. అతను భయంకరంగా కనిపిస్తున్నాడు. వాడి పేరు గంగులు అని వేరే చెప్పాల్సిన అవసరం లేదు. కొన్ని వందల తెలుగు సినిమాల్లో దొంగతనం చేసే గంగులు తప్పని సరిగా ఇలానే దర్శనమిచ్చేవాడు. దొంగకు ఆ కాలంలో ఈ మాత్రం బిల్డప్ ఉండాలి. రూపం సంగతి సరే దొంగలందరికీ అలా ఒకే చోట గాటు ఉండడం ఏమిటనే సందేహం అప్పుడప్పుడు వచ్చేది.

వారధి నిర్మించడంలో సహాయం చేసిన ఉడతను శ్రీరాముడు ఆప్యాయంగా నిమిరితే గీతలు పడ్డాయట! ఒక ఉడతను ఆప్యాయంగా నిమిరితే మొత్తం ఉడతలకు గీతలు వంశ పారంపర్యంగా వస్తున్నప్పుడు ఒక గంగులు ముఖానికి గాటు పడితే దొంగలందరికీ గాటు ఉండడం సబబే అనిపించింది. మరిప్పుడో కర్చిప్ స్థానంలో మెడకు చక్కని టై వచ్చి చేరింది. గంగులు అనే మొరటు పేరు నుండి మిస్టర్ వర్మ అనో కోనేరు ప్రసాదు అనో చక్కని పేర్లు ఉంటున్నాయి. కాలం మారింది మరి గళ్ల లుంగీతో దోపిడీలు చేయాలంటే సాధ్యమయ్యే పనేనా? పేరు కూడా మారింది. ఇప్పుడు ఇష్టం ఉన్నా లేకున్నా, సూట్ అయినా కాకున్నా సూట్ వేసుకోవలసిందే! ఆనాటి గంగులులా దౌర్జన్యాలు చేస్తామంటే కుదరదు, దురుసుగా మాట్లాడడం సాధ్యం కాదు. చేతిలో కర్ర పట్టుకుని తిరగడం ఊహకే అందని కోరిక. భారీ కార్లలో, చక్కని సూట్‌లో కనిపించి తీరాల్సిందే లేకపోతే దగా మోసం మార్కెట్‌లో ప్రవేశమే ఉండదు. ఆర్థిక సంస్కరణల తరువాత దొంగల రూపే మారిపోయింది. వారు కూడా సంస్కరణల బాట పట్టేశారు.

గతంలో మహాభారత యుద్ధం సైతం బాణాలతో, గదలతో ముష్టిఘాతాలతో సాగేది. రామాయణం అంతే రాముడు మహాబలసంపన్నుడైనా, బాణాలతో బ్లాక్ అండ్ వైట్‌లో కొద్దిపాటి మెరుపులు మెరిపించేవాడు. టెక్నాలజీ పెరిగింది గ్రాఫిక్ మయాజాలం దేవుళ్లను సైతం వశం చేసుకుంది. కాలం మారింది టెక్నాలజీ పెరిగింది మరి దేవుళ్లు సైతం మారిన కాలానికి తగ్గట్టు యుద్ధాలు చేస్తున్నారు.
ఐతే ఏంటీ ? ఇంతకూ ఏం చెప్పదలుచుకున్నారని అడుగుతున్నారా?
మార్పు తప్ప ఏదీ శాశ్వతం కాదు ప్రపంచంలో అన్నీ మారుతాయి అంటారు. మారాల్సిందే. తప్పదు మరి! కాలం ఇంత మారినా దేవుళ్లు, మనుషులు, దొంగలు సైతం సంస్కరణల బాట పట్టి మారుతుంటే మన రాజకీయ నాయకులు మాత్రం దశాబ్దాల క్రితం నాటి స్కిృప్ట్‌ను మార్చడం లేదు. డైలాగులు మారడం లేదు.
అందుకే కాలం మారింది స్క్రిప్ట్ మార్చండయ్యా అనేది.

ప్రపంచం అంతా మారుతోంది. వ్యాపారాలు అన్నీ మారుతున్నాయి. పూటకూళ్ల ఇళ్లలో తిండి అమ్ముకునే కాలం నాటి డైలాగులనే స్టార్ హోటళ్ల కాలంలో నాయకులు వినిపిస్తున్నారు. ఇంకెప్పుడు మారుతారు, మారండయ్యా! కొత్త జనరేషన్‌కు తగ్గట్టు కొత్త డైలాగులు, కొత్త స్క్రిప్ట్‌లతో రండయ్యా! ‘ప్రజలే నా దేవుళ్లు, వారికే నా జీవితం అంకితం. చివరి రక్తం బొట్టువరకు రైతుల కోసమే ఉద్యమిస్తాను’ అబ్బబ్బ ఇంకెంత కాలం చెబుతారు ఈ డైలాగులు. 1960 ప్రాంతంలో నాగభూషణం మహమ్మద్‌బిన్ తుగ్లక్ సినిమాలో ప్రజలే నా దేవుళ్లు అని రాజకీయ నాయకుడు డైలాగు చెప్పడాన్ని తొలిసారిగా ఉపయోగించారు. 82లో కొత్త పార్టీ నేత ఈ డైలాగులను చాలా సీరియస్‌గా ఉపయోగించారు. జనం కూడా బాగానే నమ్మారు. సరే సినిమా డైలాగు అయినా రాజకీయాల్లో తొలిసారి ఉపయోగించారు కాబట్టి బాగానే హిట్టయింది. 50 ఏళ్ల క్రితం నాటి ఆ సినిమా డైలాగు, 30 ఏళ్ల క్రితం నాటి రాజకీయ డైలాగును ఇంకా వాడుకుంటే ఎలా? కొత్త డైలాగు చెప్పండి. నెహ్రూ చితాభస్మాన్ని ఆకాశం నుండి పొలాల్లో చల్లించారంటారు. బ్లడ్ బ్యాంకు ద్వారా ఈయన రక్తం బొట్లను అందరికీ పంచుతారో ఏమిటో?

మురికివాడల్లో ముక్కుచీమిడి కారే పిల్లలను ముద్దుపెట్టుకుంటూ కెమెరాలకు ఫోజులిచ్చే టెక్నిక్ ఇందిరాగాంధీ రాజకీయాల్లోకి వచ్చిన కొత్తనాటిది. సరే నానమ్మ వారసత్వంతో ఆమె మనవడు రాజకీయ శిక్షణలో భాగంగా గుడిసెల్లో దూరి భోజనం చేయడం, కాలేజీలకు వెళ్లి రాజకీయాల గురించి మాట్లాడితే పిల్ల చేష్టలు అనుకోవచ్చు. 60 ఏళ్లు దాటి, రిటైర్ మెంట్‌కు చేరువైన వారూ అవే నాటకాలా? తల్లిదండ్రులనే మా ఆవిడ వద్దంటుందమ్మా !అంటూ వృద్ధాశ్రమాల్లో చేరుస్తున్న కాలమిది దశాబ్దాల తరబడి ఓదార్పులు అంటూ జనం మీద పడితే నమ్ముతారా? ఆన్‌లైన్‌లో పంటలు పండించవచ్చునని నమ్మేవారు సైతం పంట పొలాల వెంట పడి రైతులకే నా జీవితం అంకితం అని ఎంత కాలం చెబుతారు. దళితుల అభ్యున్నతి కోసమే పుట్టామని ఎంత కాలం చెప్పుకుంటారు. 1885లో కాంగ్రెస్ పుట్టాక, వచ్చిన తొలి ఎన్నికల్లో చెప్పిన మాటల నుండి నిన్నమొన్న పుట్టిన పార్టీ వరకు అన్ని పార్టీల ఎన్నికల ప్రణాళికలో అవే డైలాగులు సమసమాజం, పేదరిక నిర్మూలన, బడుగు బలహీన వర్గాల అభ్యున్నతి ... వైగైరా.. వైగైరా... అవే డైలాగులు, తళతళలాడే ఖద్దరు డ్రెస్సు, మెడలో కండువా. ప్రతిసారి బడ్జెట్‌పై చెబుతారు అదేంటీ ఆ కొత్త సీసాలో పాతసారా! అని అలానే మీరు పార్టీల పేర్లు మారుస్తున్నారు తప్ప అదే వ్యాపారం, అవే డైలాగులు, అదే స్క్రిప్ట్. స్క్రిప్ట్ మార్చండి. కొత్త డైలాగులు చేర్చండి...

మన చానల్స్‌కు చట్టాలు వర్తించవా? టైమ్స్ నౌ పై కేసు పెట్టినట్టు తెలుగు చానల్స్ పై కేసులు పెట్టరేమిటి ?

2011-12-27T13:46:00.000+05:30

కొన్ని దేశాల్లో చట్టాలు అక్రమాలకు అనువుగా ఉంటాయి. అలాంటి దేశాల నుండే మన దేశానికి నిధులు వస్తుంటాయి. ఇక్కడ సంపాదించిన సొమ్ము ఆ దేశాల ద్వారా అక్రమంగా మళ్లీ ఇక్కడికే వస్తుంటుంది. అక్రమ సంపాదన పరులకు ఈ దేశాలు కొంగు బంగారం వంటివి. అలానే తెలుగు నాట చానల్స్‌కు చట్టాలు వర్తించవా? అనే అనుమానం కలుగుతోంది. ప్రముఖ సినిమా హీరో అక్కినేని నాగార్జున కుమారుడు అఖిల్ మద్యం సేవించి కారు నడిపారని, ట్రాఫిక్ పోలీసులు పట్టుకున్నారని ఈ నెల 20న తెలుగు చానల్స్ ఒకరిని చూసి ఒకరు హడావుడి చేశాయ. నాగార్జున తండ్రి సమాజంలో పేరు ప్రఖ్యాతులు ఉన్నవారే, మహానటుడు, నాగార్జున నటుడు, ఇక అఖిల్‌ను నేడో రేపో హీరోగా పరిచయం చేయాలనుకుంటున్నారు. ఇంకేం చానల్స్‌లో ఈ వార్త హడావుడి చేయడం సహజమే. అంతా బాగానే ఉంది కానీ చివరకు తేలింది ట్రాఫిక్ పోలీసులు పట్టుకున్న అఖిల్ నాగార్జున కుమారుడు అఖిల్ కాదు. ఫార్ములా వన్ డ్రైవర్ అఖిల్ కుష్‌లానీ.

మద్యం తాగి వాహనాన్ని నడుపుతున్న అతన్ని ట్రాఫిక్ పోలీసులు తిరుమలగిరిలో పట్టుకున్నారు. ఎక్కడ పొరపాటు జరిగిందో కానీ అఖిల అనగానే టీవిల్లో నాగార్జున కుమారుడని ప్రకటించి హడావుడి చేశారు. తరువాత కనీసం పొరపాటు జరిగింది ఫార్ములా వన్ డ్రైవర్ అఖిల్‌ను నాగార్జున కుమారుడు అఖిల్ అనుకున్నాం అనే సవరణ అయినా స్క్రోలింగ్‌లో చూపాల్సిన కనీస బాధ్యత లేదా?

ఇలాంటివి చూసిన తరువాతనే చట్టాలు మన తెలుగు చానల్స్‌కు పని చేయవేమో అనిపిస్తుంది. ఎందుకంటే గజియాబాద్ ఫ్రావిడెంట్ ఫండ్‌లో భారీ కుంభకోణం జరిగింది. ఈ కుంభకోణానికి బాధ్యులు సావంత్ కాగా టైమ్స్ నౌ చానల్ పొరపాటున సావంత్ ఫోటోకు బదులు జస్టీస్ సామంత ఫోటో చూపించారు. పొరపాటు జరిగిందని, ఒకరి ఫోటోకు బదులు మరొకరి ఫోటో టీవిలో చూపించామని టైమ్స్ నౌ స్క్రోలింగ్‌లో పదే పదే చూపించింది. అయితే సామంత్ టైమ్స్ నౌ పై పరువు నష్టం దావా వేశారు. కోర్టుకు వెళ్లడంతో వంద కోట్ల రూపాయల జరిమానా విధించారు. టైమ్స్ నౌ సుప్రీంకోర్టుకు వెళ్లగా ఈ వ్యవహారంలో సుప్రీం సైతం జోక్యం చేసుకోలేమంది. ముందు 20 కోట్ల రూపాయలు డిపాజిట్ చేయమంటే చేశారు. ఇది జాతీయ స్థాయిలో మీడియాలో సంచలనాత్మకంగా మారింది. రెండు పేర్ల మధ్య పోలికలు ఉన్నాయి. ఉద్దేశ పూర్వకంగా చేసిన తప్పు కాదు. పైగా పొరపాటు జరిగిందని ప్రకటించారు. అయినప్పటికీ జరిమానా తప్పలేదు.
పొరపాటు జరిగిన దానికే ఇంత తీవ్రంగా స్పందిస్తుంటే ఉద్దేశ పూర్వకంగానే తెలుగునాట చానల్స్ నిబంధనలు తుంగలో తొక్కినా ఎలాంటి చర్యలేదు. నాగార్జున లాంటి వారు ఇలాంటివి పట్టించుకోకపోతే ఫరవాలేదు కానీ కోర్టుకు వెళితే?

వ్యభిచారం కేసులో పట్టుపడినా? నృత్యాలు చేస్తున్న వారిని అరెస్టు చేసినా వారి ముఖాలను టీవిల్లో చూపించవద్దు. దీనికి సంబంధించి స్పష్టమైన నియమ నిబంధనలు, కోర్టు తీర్పులు ఉన్నాయి. అయితే వీటిని ఏ చానల్ పాటించదు. పైగా అలాంటి నిబంధనలు ఉన్నాయనే విషయం కూడా వారికి గుర్తుండదు. నగర శివార్లలో అమ్మాయిల అర్ధనగ్న దృశ్యాలు అంటూ పోలీస్ స్టేషన్‌లో అమ్మాయిల ముఖాలను చూపుతుంటారు. అక్కడి పోలీసులకు తెలియకుండానే నగర శివార్లలో ఫాం హౌస్‌లో నృత్యాలు జరుగుతాయని అనుకోలేం. ఏదో తేడాలు వచ్చినప్పుడు దాడులు జరుగుతుంటాయి, మీడియాను పిలిచి హడావుడి చేస్తారు. వారు అర్ధనగ్నంగా నృత్యాలు చేశారో, మిత్రులతో కలిసి వచ్చారో, ఏం జరిగిందో తెలియదు కానీ చానల్స్‌లో మాత్రం ఆ అమ్మాయిలు ముఖాలను పదే పదే చూపుతూ బోలెడు కవిత్వాన్ని ఒలకబోస్తుంటారు. వాళ్ల ముఖాలు టీవిలో కనిపిస్తే ఆ కుటుంబం ఏం కావాలి. వ్యభిచారం చేసినా ముఖం చూపించవద్దు అనే చట్టం చెబుతుంటే నృత్యాలు చేశారు అంటూ ముఖాలు నేరుగా చూపించడం చట్ట వ్యతిరేకం కాదా? నిబంధనలకు విరుద్ధంగా నృత్యాలు చేస్తున్నారంటూ నిబంధనలకు విరుద్ధంగా టీవిల్లో ఎలా చూపిస్తారు. రెండూ చట్ట వ్యతిరేకమే కదా?

చానల్స్ పోటీతో కొందరి జీవితాలతో ఆడుకుంటున్నాయి. ఆ మధ్య ఒక అమ్మాయిని ప్రేమించానంటూ ఉన్మాది ఆ అమ్మాయి తల్లిదండ్రులను చంపేశాడు. ఇద్దరు పిల్లలు అనాధలయ్యారు. ఆ వార్తలను పదే పదే చూపుతుంటే టీవిల ముందే పెద్ద అమ్మాయి ఏడ్చింది అలా చూపించకండి అంటూ. కొన్నాళ్ల తరువాత కేసు విచారణ జరిగి దోషికి శిక్ష పడింది. అప్పుడు మళ్లీ టీవిల వాళ్ల ఆ అక్కా చెల్లెళ్లను మళ్లీ టీవిల్లో పదే పదే చూపించారు. దాంతో చెల్లెలు, దీన్ని తట్టుకోలేక పోతున్నానని, బతికున్నంత వరకు ఇలానే చూపిస్తారని ఆవేదన చెంది పాఠశాలలోనే భవనం పై నుండి పడి ఆత్మహత్య చేసుకుంది. అయినా మన చానల్స్ గుండె కరగలేదు. ఇలాంటి సంఘటనలు మళ్లీ మళ్లీ చూపుతూనే ఉన్నారు. నేరం చేసిన మహిళ అయినా సరే ముఖాన్ని టీవిలో చూపించ వద్దనే నిబంధన ఉల్లంఘించినందుకు చాలా రోజుల క్రితం ఒక సామాజిక ఉద్యమ కారిణి కోర్టుకు వెళితే, ప్రముఖ చానల్‌కు జరిమానా విధించారు. భార్యా భర్తల గొడవ, అక్రమ సంబంధాలు, అనుమానాల వ్యవహారాల్లో సైతం కెమెరాలు పట్టుకుని చానల్స్ దూరిపోతున్నాయి. ఒకావిడ తన భర్త ఎవరితోనో అక్రమ సంబంధం కలిగి ఉన్నాడని చానల్స్ వారిని, జనాన్ని వెంటబెట్టుకుని సాక్షాలతో చూపించి, ఆమెను చితగ్గొట్టింది. భార్యా భర్త, ఆవిడ ముగ్గురు, బంధు జనం రోడ్డున పడ్డారు. కొట్టుకున్నారు. టీవి చానల్స్‌కు పసందైన దృశ్యాలు లభించాయి. ప్రసారం చేశారు. దీని తరువాత ఆ భర్త బుద్ధిగా కాపురం చేసుకున్నాడా? ఆ విషయం చానల్‌కు ఎందుకు అప్పటికప్పుడు న్యూ సెన్స్ జరిగి మంచి దృశ్యాలు దొరికితే చాలు, ఆ అవమానాన్ని భరించ లేక ఆమె ఆత్మహత్య చేసుకుంటే వారికేంటి?
పోటీ వల్ల ఎవరికి వారు తాము వెనకబడతామేమోనని నిబంధనలను తుంగలో తొక్కుతున్నారు. ఇలాంటి తప్పులను క్షేత్ర స్థాయిలో ఉండే రిపోర్టర్లు ఆపలేరు. నిబంధనలు ఉల్లంఘించిన సంఘటనల్లో సామాజిక ఉద్యమ కారులు స్పందించి తగు చర్యలు తీసుకుంటే చానల్స్‌లో మార్పు రావచ్చు. టైమ్స్ నౌ సంఘటనలో మానవ తప్పిదానికి పెద్ద శిక్ష వేశారు, కానీ ఇక్కడ ఉద్దేశ పూర్వకంగా జరుపుతున్న తప్పులను నివారించడానికి తీవ్రమైన చర్యలు అవసరం.

భగవద్గీత..టెర్రరిజం..గాంధీ..!!.....వేదాలనూ నిషేధించాలి

2011-12-22T14:30:00.000+05:30

చందమామపై అడుగుపెట్టి ప్రపంచాన్ని సంభ్రమాశ్చర్యంలో ముంచెత్తిన సోవియట్ రష్యా పతనంతో పరిశోధనలు మందగించాయనిపించింది. కమ్యూనిజం ప్రయోగం విఫలమై, సోవియట్ రష్యా ముక్కచెక్కలైన తరువాత రష్యా, భగవద్గీతపై బాగానే పరిశోధన జరిపినట్టుగా ఉంది. వాళ్ల పరిశోధనల్లో ప్రపంచంలో టెర్రరిజానికి మూలం భగవద్గీత అని తేలిపోయింది. దాన్ని నిషేధించాలని కోర్టు నిర్ణయించేసింది, తీర్పువెలువడడమే తరువాయి. భగవద్గీత మనదే అయినా టెర్రరిజానికి మూలం అదే అని మనం కనిపెట్టలేకపోయాం.

గాంధీజీ మన వాడు అనే విషయం పక్కన పెట్టి నిజాయితీగా ఆలోచిద్దాం. ఆయనలో నిలువెత్తు టెర్రరిస్టు కనిపించడం లేదూ? చొక్కాకు ఒక్క గుండే లేకపోతేనే వాడు చూడు రౌడీలా అని తిట్టుకుంటాం. మరి ఆయన ఏకంగా చొక్కానే లేకుండా కనిపిస్తున్నాడంటే టెర్రరిస్టు కాకుంటే మరేమిటి? పైగా చేతిలో ఒక కర్ర. కర్ర హింసకు నిదర్శనం కాదా? నడుము దగ్గర ఒక వాచీ. ఏ టైంలో టైంబాం బు పేల్చాలో నిర్ధారించుకోవడానికి కాకపోతే ఆ వాచీ ఎందుకు? ఒక చెంపమీద కొడితే మరో చెంప చూపమనడం హింసను ప్రేరేపించడమే? మరో చెంప చూపడం అంటే కొట్టిన వ్యక్తిలో హింసాత్మక ధోరణిని అలా పెంచి పోషించడమే కదా? హింసను ప్రేరేపించే వారు టెర్రరిస్టులే కదా? ఇవి సరిపోవంటారా?

బాధల్లో ఉన్నప్పుడు తల్లి ఒడిలో సేదతీరినట్టుగా నేను భగవద్గీతతో స్వాంతన పొందుతాను అని స్వయంగా మహాత్ముడే చెప్పుకున్నాడు. బగవద్గీత టెర్రరిజాన్ని పెంచి పోషించే సాహిత్యం కాబట్టి టెర్రిరిస్టు సాహిత్యాన్ని తల్లిగా భావించే వ్యక్తి టెర్రరిస్టు కాకుంటే మరేమవుతారు. ఆసియా దేశాల వారే కాదు చివరకు యూరప్ దేశానికి చెందిన ఎంతో మంది స్వాతంత్య్ర సమర యోధులు మహాత్ముని బోధనలే మాకు ఆదర్శం, ఆయన స్ఫూర్తితోనే మేం మా దేశ స్వాతంత్య్రం కోసం ఉద్యమించామని ప్రకటించారు. అంటే ఆయన ఒక్క దేశానికే పరిమితం అయిన టెర్రరిస్టు కాదు అంతర్జాతీయ టెర్రరిస్టు. నొబెల్ శాంతి బహుమతి కమిటీ వాళ్లు మహాత్మాగాంధీకి నొబెల్ శాంతి అవార్డుకు ఎందుకు ఎంపిక చేయలేదో ఇప్పుడు తెలిసిందా? శాంతి బహుమతిని టెర్రరిస్టుకు ఎలా ఎంపిక చేస్తారు?

మన లౌకిక వాదులు నిజంగా సిగ్గుపడాల్సిన విషయం. మనకు రాని ఆలోచన ఇతరులను వచ్చినప్పుడు మనస్ఫూర్తిగా అభినందించాలి. హిందూ మతాన్ని ఎన్నో విధాలుగా విమర్శించిన మన లౌకిక వాదులకు ఒక్క సారన్నా ఈ ఆలోచన వచ్చిందా? మరి అలా రానందుకు సిగ్గుపడి తీరాలి. రష్యాలో వర్షం పడితే ఇక్కడ గొడుగు పట్టుకోవడం మనకు ఎలాగూ అలవాటే కాబట్టి ఇప్పుడైనా రష్యావాడికి కలిగిన జ్ఞానోదయం నుండి మన వాళ్లు నేర్చుకోవాలి. సోవియట్ యూనియన్ పతనం తరువాత కల్లోల రష్యాలో ఇటీవల హరేరామ హరేకృష్ణ అంటూ కొంత మంది తీవ్రవాదులు, తీవ్రవాద సాహిత్యం భగవద్గీతను చేతపట్టుకుని పట్టపగలు రోడ్లమీద టెర్రరిజం భజన చేస్తున్నారు. బాంబులు పట్టుకొని తిరిగే వారుంటే మనం పెద్దగా ఆందోళన చెందాల్సిన అవసరం లేదు. ఆ బాంబు పేలితే పక్కనున్న కొద్ది మంది మాత్రమే పోతారు. కానీ అదే భగవద్గీత లాంటి టెర్రరిస్టు సాహిత్యాన్ని అలా వదిలేస్తే ఇంకేమైనా ఉందా? ప్రజల మెదళ్లలో చేరి అహింస అనే తీవ్రమైన హింసను వ్యాపింపజేస్తుంది.
బహుశా ఈ ప్రమాదాన్ని మన పాలకులు కూడా గుర్తించినట్టుగా ఉన్నారు. అందుకనే ఎవ్వరూ ఏమీ మాట్లాడటం లేదు.
విస్తృతమైన పరిశోధన చేసి భగవద్గీతలో టెర్రరిజంను కనుగొన్న రష్యాను మనస్ఫూర్తిగా మెచ్చుకుందాం. అదే కోణంతో ఆలోచిస్తే మనకు మహాత్ముడే కాదు ఇంకెంతో మంది తీవ్రవాదులు కనిపిస్తారు. ఆయనెవరో విల్లు విరిచాడు, ఎప్పుడు చూసినా చేతిలో విల్లు పట్టుకుని ఉంటాడు. అదే నండి శ్రీరాముడు. చేతిలో ఆయుధం ఉంది కాబట్టి ఆయనా తీవ్రవాదే కదా? ఏదో రావణాసురుడు ముచ్చటపడి కిడ్నాప్ చేస్తే ఆయన దేశంపై దండెత్తి చంపేయడమేనా? టెర్రరిజానికి ఇంత కన్నా నిదర్శనం ఏం కావాలి. ఇంకొక దేవుడు శ్రీకృష్ణుడు చేతిలో చక్రంతో తప్ప విడిగా కనిపించడు. ఆ చక్రానికి లైసెన్స్ ఉందా? ఆ చక్రంతో ఆయన చంపిన వారు ఎంత మంది? దేవుళ్ల సంగతి పక్కన పెడదాం ఆ తరువాత వచ్చిన బుద్ధుడి సంగతి రష్యా మెదడుతో

జాగ్రత్తగా ఆలోచిస్తే బుద్ధుడిలోనూ అంతర్జాతీయ టెర్రరిస్టు కనిపిస్తున్నాడు. బౌద్ధమతాన్ని ప్రపంచంలో అనేక దేశీయులు ఆచరిస్తున్నారు. అంటే యుద్ధం వద్దని శాంతిని బోధించడం అంటే దాని వెనుక పెద్ద టెర్రరిజం కుట్ర ఉంది. బౌద్ధమతాన్ని ఆచరించిన వారు శాంతియుతంగా ఉంటారు, దాంతో ఇతర దేశం దాడి చేసి స్వాధీనం చేసుకుంటుంది. రక్తపాతం లేకుండా లొంగదీసుకోవడం అన్నమాట! కాబట్టి చైనా, జపాన్‌లకు ఓ మాట చెప్పి బౌద్ధమతాన్ని కూడా టెర్రరిస్టు జాబితాలో చేర్చే విషయం రష్యా సీరియస్‌గా ఆలోచించాలి. అసలు హిందూ మతమే టెర్రరిజంగా కనిపిస్తోంది. ఇక వేదాలను కూడా ఓ చూపు చూడు రష్యా!

బుల్లితెరపై భక్తి ఉద్యమం

2011-12-20T15:13:00.000+05:30

మతం మనుషులకు మంచి చేస్తుందా? చెడు చేస్తుందా? అంటే రెండు వైపులా బలంగా వాదించవచ్చు. ఈ వాదన కొత్తేమీ కాదు. తరతరాల నుండి ఉన్నదే. మనిషి చంద్రుడిపై అడుగుపెట్టిన తరువాత, కంప్యూటర్ యుగంలో ఇంకా ఈ నమ్మకాలేమిటి? అనే వాదన కంప్యూటర్‌లు మన దేశంలోకి వచ్చిన కొత్తలో బాగా వినిపించేది.

ఇప్పుడు ఇంటింటికి కంప్యూటర్ , ప్రతి చేతిలో సెల్‌ఫోన్ అన్నంతగా పరిజ్ఞానం పెరిగింది. అయితే మేధావులు ఊహించినట్టుగా సాంకేతిక పరిజ్ఞానం పెరిగిన తరువాత భక్తి భావం తగ్గలేదు. మరింతగా పెరిగింది. ఇప్పుడు అమెరికాలో ఉన్నా, గల్ఫ్ దేశంలో ఉన్నా ఇంట్లో ఉండే తిరుమల తిరుపతి దేవస్థానంలో పూజలను తిలకించవచ్చు, పులకించి పోవచ్చు. ఉదయం లేవగానే తిరుమలలో వినిపించే సుప్రభాతాన్ని ఇంట్లో నుండి వినవచ్చు. మనిషి జీవితం సంక్లిష్టంగా మారినా కొద్ది దైవంపై భక్తి మరింతగా పెరుగుతుంది. ఆధునిక జీవితంలో అన్ని సౌకర్యాలు అందుబాటులో ఉన్నాయి ఒక్క మానసిక ప్రశాంతత తప్ప. ఇలాంటి పరిస్థితిలో తనకు తెలియని ఏదో ఒక శక్తి ఉందని మనిషి నమ్ముతాడు. ఈ నమ్మకం అతనికి కొంత మానసిక ప్రశాంతతను ఇస్తుంది అంతే తప్ప సమాజానికి నష్టమేమీ లేదు.

మానసిక ప్రశాంతత కోరుకునే వారు దైవాన్ని నమ్ముతున్నారు. దైవ దర్శనం అంటే వయసు మీరిన వారికి సంబంధించిన విషయమేమీ కాదు ఇప్పుడు. సంపద ఎక్కువ ఉన్న చోట భక్తి సైతం ఇప్పుడు ఎక్కువగానే కనిపిస్తోంది. ఆలయాలను సందర్శిస్తే పెద్దవారి కన్నా యువత ఎక్కువ కనిపిస్తున్నారు. మనం సాంకేతికంగా ఎంతో ముందడుగు వేసినా నైతిక విలువల విషయంలో మన పరిస్థితి ప్రశ్నార్ధకంగానే ఉంది. భక్తి భావం మనిషిలో విలువలను పెంచుతుంది. ఏ మతమైనా కావచ్చు దైవాన్ని విశ్వసించే వాడి మొత్తం సమాజం మంచిని కోరుతారు. మీడియాలో సైతం భక్తి అంశాలకు ఇప్పుడు ప్రాధాన్యత పెరిగింది. దాదాపు తెలుగు పత్రికలన్నీ ఆధ్యాత్మిక అంశాలకు ప్రాధాన్యత ఇస్తున్నాయి. ప్రత్యేకంగా పేజీలు కేటాయిస్తున్నాయి. ఇప్పుడు బుల్లితెరపై సైతం భక్తి ఉద్యమం సాగుతోంది.

వారానికోసారి దూరదర్శన్ సప్తగిరిలో ధర్మసందేహాలు వినేవారి సంఖ్య తక్కువేమీ కాదు. తండ్రికి తద్దినం చిన్నకొడుకు పెట్టాలా? పెద్ద కొడుకు పెట్టాలా? అనే సందేహం మొదలుకుని మహాభారత, రామాయణాల వరకు ధర్మ సందేహాల్లో ఏ అంశం గురించి ప్రశ్నించినా పండితులు చక్కని సమాధానాలు ఇస్తున్నారు. ఒక విషయాన్ని తెలుసుకోవాలనే ఆసక్తితోనైనా వినవచ్చు.
2007లో భక్తి పేరుతో పూర్తిగా ఆధ్యాత్మిక కార్యక్రమాలతో ఎన్‌టీవి ఒక చానల్‌లు ప్రారంభించింది. 24 గంటల పాటు చూపడానికి భక్తి కార్యక్రమాలు ఏముంటాయని అప్పుడు అనిపించి ఉండవచ్చు. కానీ నాలుగున్నర ఏళ్లపాటు భక్తి టీవి ఆధ్యాత్మిక ప్రసారాల ద్వారా భక్తులను బాగానే ఆకట్టుకుంది. దూరదర్శన్ ధర్మ సందేహాల తరహా కార్యక్రమాలు చానల్స్ ఆధ్యాత్మిక కార్యక్రమాల్లో తప్పనిసరిగా ఉంటోంది. ఈ తరహా కార్యక్రమానికి సప్తగిరి మార్గదర్శిగా నిలిచింది.
ఎన్‌టీవి వారి భక్తి చానల్‌తో పాటు తిరుమల తిరుపతి దేవస్థానం ఆధ్వర్యంలో శ్రీవేంకటేశ్వర భక్తి చానల్ హిందూ మతానికి సంబంధించి ఆధ్యాత్మిక కార్యక్రమాలు ప్రసారం చేసే రెండు చానల్స్. శ్రీవేంకటేశ్వర భక్తి చానల్ టిటిడి వారిది కాబట్టి ఆ చానల్ కార్యక్రమాలను ప్రసారం చేయడాని కన్నా ముందు ఆ చానల్ గురించి, నిధుల దుర్వినియోగం అంటూ దాదాపు అన్ని న్యూస్ చానల్స్ హడావుడి చేశాయి.

హిందూ ఆలయాల గురించైనా, హిందూ మతానికి సంబంధించిన విషయాలపైనైనా దాడికి మీడియా సిద్ధంగా ఉంటుంది. ఎందుకంటే హిందువులు కాబట్టి. ఈ మధ్య చిన జీయర్ స్వామి తిరుమలలో ఆధ్యాత్మిక వాతావరణం ఉండాలని క్లబ్‌కు వెళ్లి వచ్చిన భావన కలగరాదని అంటే తిరుమలలో మద్యం, వ్యభిచారం, మాంసం విచ్చలవిడిగా అంటూ జీ న్యూస్ చానల్ మసాలా దట్టించి ప్రసారం చేసింది. భక్తి చానల్ దక్షిణ భారత దేశంలోనే తొలి ఆధ్యాత్మిక చానల్. కాగా భక్తి చానల్ వస్తోందని తెలిసి టీవి9 వాళ్లు హడావుడిగా ప్రపంచంలోనే తొలి సర్వమత చానల్ అంటూ సంస్కృతిని తీసుకు వచ్చారు. ఎంత హడావుడిగా ఆ చానల్‌ను ప్రారంభించారో అంతే హడావుడిగా దాని చరిత్ర ముగిసిపోయింది. టీవి 1 అంటూ ఆ చానల్ ప్రసారాలు చేస్తున్నారు. ఆధ్యాత్మిక చానల్‌ను ప్రారంభించబోయి తమ వల్ల కాదని చేతులు ఎత్తేసిన వారు అదే చానల్‌లో హిందువుల మనోభావాలను అగౌరవపరిచే కార్యక్రమాలు ప్రసారం చేస్తున్నారు. సప్తగిరిలో వచ్చే ధర్మసందేహాలను పేరడీ చేస్తూ ఇడియట్ సందేహాలు అంటూ వెకిలి అంశాలతో వ్యంగ్యం అంటూ చూపుతున్నారు.

శ్రీవెంకటేశ్వర భక్తి చానల్‌లో తిరుమలలోని భక్తి కార్యక్రమాలకు పరిమితం కాగా, భక్తి టీవి మాత్రం ఆధ్యాత్మిక ఉపన్యాసాలతో పాటు ఆలయాల గురించి, ధర్మ సందేహాల గురించి వివరిస్తోంది. ఆధ్యాత్మిక అంశాలపై ఆసక్తి ఉన్నవారిని బాగా ఆకట్టుకుంటోంది. పండుగల సందర్భంగా ఆయా పండగల గురించి తెలియని విషయాలు చెబుతున్నారు. శ్రీవేంకటేశ్వర భక్తి చానల్ ఆధ్వర్యంలో ఆధ్యాత్మిక అంశాల కోసం మరో చానల్ ప్రారంభించనున్నారు. కొన్ని మతాలకు సంబంధించిన ప్రచారానికి విదేశాల నుండి నిధులు రావడం గురించి అందరికీ తెలిసిందే. హిందువులకు అలాంటి అవకాశం లేదు. అలాంటి పరిస్థితుల్లోనూ భక్తి చానల్ వంటివి విజయవంతంగా నాలుగున్నర ఏళ్ల నుండి ప్రసారాలు కొనసాగించడం అభినందనీయం.

హాస్యాంధ్ర ప్రదేశ్ .......... ఇక్కడ అందరూ కమేడియన్లె

2011-12-18T15:04:00.001+05:30

ఆంధ్రా హ్యూమర్ క్లబ్!

అత్తపోరు లేదు మామ పోరు లేదు గుడిసెలో గుడ్డోడి పోరు అన్నట్టు ఇంత కాలం మనకు ఎదురులేదనుకుంటే చివరకు ఇలా అయిందేమిటి? అని రాజ్యలక్ష్మి కొంగుతో కళ్లు తుడుచుకుంది. దశాబ్ద కాలంగా ఎదురులేకుండా ఉన్న వాళ్ల క్లబ్‌కు గట్టి పోటీ వచ్చింది. వారం వారం పార్క్‌లో కలుసుకొని ఎంచక్కా జోకులు చెప్పుకునే వారు. పాపం పగవాడికి కూడా ఈ కష్టం రావద్దు అని విశ్వనాధం మనసులోనే అనుకున్నారు. సుమన్ సినిమాలను సైతం జీర్ణం చేసుకునే మన వాళ్లకు మన జోకులు జీర్ణం కాకపోవడం ఏమిటని పద్మనాభం విస్తుపోయాడు. రాజకీయ నాయకులు ఇలా మనతో పోటీకి రావడం ఏ మాత్రం బాగాలేదని ఎర్రన్న బాధపడ్డాడు.

నిత్యావసర వస్తువుల ధరలు పెరిగినా వారికి బాధ ఉండదు, మూడు రోజుల కోసారి నీళ్లు రాకపోయినా, వారానికోరోజు మంచి నీళ్లు వచ్చినా, రోజుకు డజను సార్లు కరెంటు పోయినా వారిలో ఎలాంటి కోపం ఉండదు. ఎందుకంటే వారు హ్యూమర్ క్లబ్ సభ్యులు. మొండివాడు రాజుకున్నా బలవంతుడైతే, వాడబ్బకన్నా బలవంతులు హ్యూమర్ క్లబ్ సభ్యులు. అలాంటి క్లబ్ సభ్యులకు ఇప్పుడు కష్టకాలం వచ్చింది. ఏమైందని ఏడుస్తున్నారు అంటూ అయోమయరావు అడిగాడు. ఆయన టీవిల్లో బ్రేకింగ్ న్యూస్‌లు తప్ప ఏమీ పట్టించుకోడు దాంతో ఏం జరుగుతుందో ఆయనకు ఎప్పుడూ అర్ధం కాదు. ఇంకేం కావాలి జరగాల్సింది జరిగిపోయింది ఎదురులేదనుకుంటున్న మనకు రాష్ట్ర రాజకీయ నాయకుల నుండే గట్టిపోటీ వచ్చింది. మనకు వారి నుండి పోటీ ఏమిటని ఆయోమయరావు అడిగాడు. జోకులు చెప్పి నవ్వించడాన్ని మనం హాబీగా తీసుకుంటే దాన్ని నాయకులు ఏకంగా వృత్తిగా తీసుకున్నారు. అనుమానం ఉంటే అటువైపు ఒకసారి చూసి నువ్వే చెప్పు వారి జోకుల ముందు మన జోకులు నిలుస్తాయా?

***
బాబు పొలంలోకి అడుగు పెట్టి దీన్ని పొలం అంటారు. దీన్ని గడ్డి అంటారు. గడ్డిలో అనేక రకాలు ఉంటాయి అంటూ రాసుకొచ్చిన సమాచారాన్ని రైతుకు చదివి వినిపిస్తున్నాడు. రైతు అలానే నోరు తెరిచాడు. గడ్డిలో బంగారు పంటలు పండును, చీడపురుగుల వల్లపంట దెబ్బతినును.. అంటూ సొంతంగా చెప్పాడు.

రైతు ఏం తిక్క తిక్కగా ఉందా? నేను లేనప్పుడు పొలంలోకి మిమ్మల్ని ఎవరు రమ్మన్నార ంటూ కర్ర పుచ్చుకున్నాడు. పచ్చ చొక్కాల నాయకులు పరిగెత్తు కొచ్చి ఎవరనుకున్నావ్ ఆయన చంద్రబాబు అని చెప్పారు. మరీ అంత పిచ్చోడిననుకున్నావా? ఎన్టీవోడి అల్లుడు చంద్రబాబు గోరు రాష్ట్రాన్ని తొమ్మిదేళ్లపాటు పాలించారు. ఆయన నాకు తెలియదా? అంటూ తిట్లు మొదలు పెట్టాడు. ఎవరెంత చెప్పినా రైతు వీరంగాన్ని ఆపలేకపోయారు. అక్కడున్న మహిళా ఎమ్మెల్యేకో ఐడియా వచ్చి యూరేకా అని అరిచి కారువైపు పరుగులు తీసి కొద్ది నిమిషాల్లోనే తిరిగి వచ్చి, బాబు తలపాగాను తీసిపారేసి కారులో నుండి తెచ్చిన ల్యాప్‌టాప్‌ను ఓపెన్ చేసి బాబు చేతిలో పెట్టింది. అప్పటి వరకు కర్ర పట్టుకుని అందరినీ పరిగెత్తిస్తున్న రైతు వెంటనే కర్ర పారేసి బాబుగారూ మీరా నన్ను క్షమించండి, చేతిలో ల్యాప్‌టాప్ కనిపించేంత వరకు మిమ్ములను గుర్తించలేకపోయాను క్షమించండి బాబు క్షమించండి అని వేడుకున్నాడు.

***
సచివాలయంలో..మంత్రి శంకరన్నను చూడగానే విలేఖరులు గజగజవణికిపోయారు. నిజంగా సార్ అమ్మతోడు బయటకెళ్లి ఆఫీసుకు ఫోన్ చేసి వస్తాను వదలండి సార్ అంటూ ఒక విలేఖరి వేడుకుంటున్నాడు. ఏంరా బై దూడకు పాలిచ్చి వస్తానని వేడుకున్న ఆవును వదిలేసిన పులిననుకున్నావా? మిమ్ముల్ని వదిలితే మళ్లీ రారు నాకు తెలుసు. నేను చెప్పిందంతా వినాల్సిందే అంటూ తలుపులు మూశాడు.
***
ఏమయ్యా కిరణ్ ప్రతిదీ నీకు నేనే చెప్పాలా? అవిశ్వాస తీర్మానమప్పుడు నేనేం మాట్లాడమన్నాను నువ్వేం మాట్లాడావు. మరీ అంత మెతగ్గా ఉంటే ఎలా? ఆ బొత్సా నిన్ను దూసుకెళ్లేట్టుగా ఉన్నాడు అదే జరిగితే నేను చేయగలిగిందేమీ లేదు అని బాబు ఫోన్‌లోనే అక్షింతలు వేశాడు.

బాబు గారు మీరు ఇలా బెదిరిస్తే నేను ఎన్నికలకు వెళదామని మా హై కమాండ్కు చెబుతాను అని కిరణ్ బెదిరించారు . కంగారు పడ్డ బాబు ఏదో మన జిల్లా వాడివని మంచి చెబుతున్నాను సరే ఆ పని మాత్రం చేయకు . ఐతే నువ్వు లేదా నేను కలిసిపాలిద్దాం కానీ మనం మనం కోట్లడుకొని మూడో వాడికి అవకాశం ఇవ్వడం ఎందుకు అన్నాడు. సరే నీ పాలన పరమ చండాలంగా ఉందని విలేఖరుల సమావేశంలో మాట్లాడేందుకు వెళుతున్నాను. కొన్ని మంచి పాయింట్స్ చెప్పు అని బాబు అడిగాడు. ఫ్యాక్స్ చేస్తాను అని కిరణ్ వినయంగా చెప్పాడు.

***
సార్ తెలంగాణ సంగతి అంటూ ఈటెల రాజేంద్ర కెసిఆర్‌తో మెల్లగా అన్నాడు. ఏదో అలోచనలో ఉన్న కెసిఆర్ ఏంటీ అన్నాడు. తెలంగాణ అని మెల్లగా నసిగాడు. గోడకున్న క్యాలండర్‌ను కెసిఆర్ స్వహస్తాలతో తీసి టెబుల్‌పై వేశాడు. క్యాలండర్‌లో ఉంది చూడు అన్నాడు. ఈటెలకు అర్ధం కాలేదు. మొన్న గులాంనబీ ఆజాద్ ఏమన్నాడు. పండుగల తరువాత తెలంగాణ అన్నాడా? లేదా?
పండుగలు లేని నెల ఏదో చెప్పు సోనియమ్మ అప్పుడు తేలుస్తుంది తెలంగాణ గురించి అని నవ్వాడు.
***
ఏ కులమబ్బీ నీ దే మతమబ్బీ అంటూ సిపిఐ నారాయణ, సిపిఎం రాఘవులు పాటలు పాడుతున్నారు. నీకు మిగిలింది ఆ గోచీ ఒక్కటే అది కూడా ఈసారి దక్కదు అంటూ సిపిఎంకున్న ఒక్కసీటు గురించి నారాయణ ఎద్దెవా చేశాడు.
***

సార్ కూకుట్‌పల్లిలో డ్రైనేజీ అంటూ అమాయకుడొకరు ఏదో వినతిపత్రం ఇవ్వబోతుంటే చూడండి మీకెప్పుడూ తాగునీరు, డ్రైనేజీ వంటి చిల్లర సమస్యలేనా? రాష్ట్ర సమస్యలపై అంతర్జాతీయ సమాజం ఏమంటుందో అమెరికాలో ఉపన్యాసానికి గూగుల్‌లో సెర్చ్ చేస్తున్నాను నన్ను విసిగించకు అని జెపి అతన్ని పంపించేశాడు.

***

10 జనపద్ కు తొలిసారిగా చిరంజీవి ఒంటరిగా వెళ్ళాడు . నిచ్చెన పై ఎవరో కనిపిస్తే అతని వద్దకు వెళ్లి కింది నుంచి మై చిరంజీవి హు .. మెగా స్టార్ హు .. సోనియాజీ ... అంటూ ఏదో చెప్పడానికి ప్రయత్నిస్తున్నారు .. చిరంజీవి వచ్చాడని తెలిసి తెలుగు మీడియా అటువైపు వచ్చి చిరంజీవి మాటలు విని వింతగా చూశారు .. ఎత్తులో ఉన్నారని హై కమాండ్ అనుకున్నారా అని అడిగితే చిరంజీవి తల ఉపాడు . వాడు ఎలక్త్రిశియన్ బల్బు పెడుతున్నాడు . హై కమాండ్ కిందే పరుపులు దిండ్ల పై కూర్చుంటుంది టీవి లలో ఎప్పుడూ ప్లినరి చూడలేదా అని అడిగారు . నాకు తెలియక పోవడం ఏమిటి నేనో సినిమాలో ముఖ్యమంత్రిగా కూడా నటించాను అని చిరంజీవి చెప్పాడు . మీకు తెలుసో లేదో ఇందిరా గాంధీ హయం లో హై కమాండ్ వద్ద కారు డ్రైవర్ గా ఉన్న వ్యక్తి కూడా తరువాత కేంద్ర మంత్రి అయి చక్రం తిప్పాడు . ఆకబట్టి హై కమడ్కు యెంత దగ్గరగా ఉన్నారనేది ముఖ్యం కానీ వాళ్ళు చప్రసినా , బల్బులు పెట్టె వాడా అని కాదు అని చిరంజీవ తనను తను సమర్ధించుకున్నాడు

***

ఇప్పుడు చెప్పండి వీరి ముందు మన జోకులు పెలుతయా అని ఎవరో అడిగితే అంతా లేదు లేదు అని కోరస్ గా పలికారు .

ఎన్నో సమస్యలతో సతమత మవుతున్న మనను హాయిగా నవ్వుకునేట్టు చేస్తున్న మన తెలుగు నాయకులు వర్ధిల్లాలి అని అంతా పలికారు

రాజకీయ పోకిరీలు వర్ధిల్లాలి

2011-12-15T11:30:00.001+05:30

కాలేజీలోల అల్లరి మూక అమ్మాయిలను ఆటపట్టిస్తోంది. ఇంతలో హీరో అక్కడికొచ్చి ఒక పాట పాడడంతో అల్లరిమూక మమ్మల్ని క్షమించండి మాస్టారు ఇంకెప్పుడూ ఆడవారిని వేధించం అంటూ 1980లో కన్నీరు కార్చారు. రామారావు పాడిన పాట విని తన్మయం చెందిన వాణిశ్రీ తనకు సరిజోడు రామారావే అని అప్పుడు నిర్ణయించుకుని చీరకొంగును కొరుకుతూ కాలేజీ నుంచి పార్క్‌లోకి పరుగులు తీసింది.
పదేళ్లు గడిచాయి అమ్మాయిలను వేధిస్తున్న అల్లరి మూకను హీరో చితగ్గొట్టాడు. కాళ్లతో, చేతులతో విలన్లను చితగ్గొడుతున్న హీరో ధైర్యాన్ని చూసిన జయప్రద హీరోకు 1990లో మనసిచ్చేసింది. కాలం మరింతగా మారింది. హీరో అమ్మాయిల వెంట పడుతున్నాడు. గిల్లుతున్నాడు, గిచ్చుతున్నాడు. హీరోయిన్‌ను కూడా వదలలేదు. మిగిలిన ఎక్‌స్ట్రా ఆర్టిస్టుల కన్నా హీరోయిన్‌నే ఎక్కువగా వేధిస్తున్నాడు.

వేధింపులకు అలవాటు పడిపోయిన హీరోయిన్ త్రిష చివరకు హీరోను ప్రేమించేసి, నువ్వు కాదంటే ప్రాణాలు వదిలేస్తానంది 2000ల సంవత్సరంలో. 1980లో విలన్లు అమ్మాయిలను వేధిస్తుంటే చీదరించుకున్న హీరోయిన్ చివరకు 2000ల సంవత్సరంలో అదే పని చేసిన హీరోకు మనసిచ్చేంతగా కాలం మారింది. సినిమాల్లో, రాజకీయాల్లోనే కాదు అన్నింటా కాలం బాగా మారిపోయింది. ఏం మారింది.. అప్పుడు జైలుకు వెళ్లిన వారికి ప్రజలు మంగళహారతులు పాడేవారు, ఇప్పుడు అలానే పాడుతున్నారు తేడా ఏముంది అనేది కొందరి అనుమానం. స్వాతంత్య్ర పోరాటం సాగించిన ప్రకాశం పంతులు జైలు నుండి వచ్చినప్పుడు చెన్నైలో ఎలాంటి స్వాగతం లభించిందో తెలియదు కానీ కనిమొళికి మాత్రం బ్రహ్మాండమైన స్వాగతం లభించింది. డిఎంకెకూ ఒక పురుచ్చి తలైవి లభించిందని ఆ పార్టీ వారు సంబరపడుతున్నారట! ఇప్పట్లో అక్కడ ఉప ఎన్నికలు లేవు కానీ ఉండి ఉంటే మాత్రం కనిమొళి భారీ మెజారిటీతో విజయం సాధించి తీరుతారు.

అనుమానం ఉంటే పొరుగున ఉన్న కర్నాటకకు వెళ్లి చూస్తే తెలుస్తుంది. మైనింగ్ కుంభకోణంలో గాలి జనార్దన్‌రెడ్డి అరెస్టు తరువాత ఆయన ప్రియమిత్రుడు శ్రీరాములు బిజెపికి రాజీనామా చేసి స్వతంత్ర అభ్యర్థిగా పోటీ చేస్తే 46వేల ఓట్ల మెజారిటీ లభించింది. అంతకు ముందు ఆయనకు నాలుగైదువేల మెజారిటీ కూడా రాలేదు. ఈ ఊపుతో ఆయన గాలితో కలిసి కొత్త పార్టీ ఏర్పాటుకు సన్నాహాలు చేస్తున్నారు. ఉన్న ఆస్తిని దేశానికి అర్పించిన వారిని ఆ కాలంలో రాజకీయాల్లో హీరోలుగా చూశారు, ఇప్పుడు దేశాన్ని దోచుకున్న వారికి హీరోవర్షిప్ వచ్చేస్తోంది.
తండ్రి లాంటి మామ కుర్చీ లాగేసిన వారిలోనే కథనాయకుడిని చూశారు కొంత కాలం. అబుసలేం, దావుద్ ఇబ్రహీంలను హీరోలుగా కొలిచేవారున్నారు.రాజకీయాల్లో ఆసక్తి లేక కానీ దావుద్ వస్తే ఓటర్లు వద్దంటారా?

ఎందుకలా అంటే ఔను వాళ్లు దొంగలు ఆ విషయాన్ని వారెప్పుడూ దాచుకోలేదు. కానీ రాజకీయ నటులు అలా కాదు కదా? నానా పటేకర్‌లు రాజనీకాంత్‌లా ఫోజు కొడతారు. దాంతో ఎవరు ఎవరో గుర్తించడం కష్టం. నిరంతరం నటనలో జీవించే నాయకులను అంచనా వేయడం అంత ఈజీ కాదని చెప్పడమే ఉద్దేశం.
ఆ హీరోగారు సినిమాలో పేదలకు అండగా, విలన్ల పాలిట సింహస్వప్నంగా ఉండే వారు. తాను ముఠామేస్ర్తి అయినా విలన్ ముఖ్యమంత్రిగా ఉన్న చితగ్గొట్టిన చరిత్ర అతనిది. నువ్వు ఏలాల్సింది చిత్రసీమను కాదన్నా రాజకీయ సీమను అని అభిమానులు అతన్ని అన్నా నువ్వు రాజకీయాల్లోకి వచ్చేయ్ అన్నా వచ్చేయ్ అని దీక్షలు జరిపారు. ఒకరు ఏకంగా ఆత్మహత్య చేసుకున్నారు. రాజకీయాల్లో విలన్లను చీల్చి చెండతాడు అని అభిమానులు కలలు కంటుండగానే ఆయన రాజకీయాల్లోకి రావడం విలన్లతో చేట్టాపట్టాలేసుకుని తిరగడం అయిపోయింది. విలన్లతో చేతులు కలిపిన హీరోల ట్విస్ట్‌ను మనం ఏ సినిమాలోనైనా ఊహించామా? మన సినిమాల్లో కథలుండవని అనుకుంటాం కానీ రాజకీయాల్లో సినిమాల కన్నా ఎక్కువ మలుపులుంటున్నాయి. నీ మిత్రుడెవరో చెప్పు నీవెలాంటి వాడివో చెబుతాను అంటారు.

గతంలో జ్యోతిలక్ష్మి, జయమాలిని, సిల్క్‌స్మిత అని వాంప్‌లు ప్రత్యేకంగా ఉండేవారు. సినిమాల్లో ఏదో ఒక పాటలో వీళ్లు తళుక్కున మెరిసి ప్రేక్షకులను మైమరిపించే వాళ్లు. సినిమాల బడ్జెట్ పెరిగి వినోదం తగ్గిన తరువాత బడ్జెట్ కోతలో భాగంగా వాంప్‌ల పాత్రలను తొలగించి ఆ బాధ్యతను హీరోయిన్లకే అప్పగించారు. ఇప్పుడు డ్రెస్స్‌ను చూసి ఎవరు హీరోయినో, ఎవరు వాంపో చెప్పలేం. అలానే రాజకీయ నాయకుల మాటలను బట్టి వారిని అంచనా వేయలేం.

1969లో బుద్ధిమంతుడే హీరో. హీరోయిన్ విజయనిర్మల బుద్ధిమంతుడు అనే హీరో అక్కినేనిని ప్రేమిస్తుంది. అదే 2006 సంవత్సరానికి వచ్చేసరికి ఇలియానా లాంటి అందగత్తె పోకిరీనే హీరోగా ఇష్టపడి ప్రేమించింది. సినిమాల్లో హీరోయినే్ల కాదు రాజకీయాల్లో సైతం పోకిరీలనే ఇష్టపడుతున్నారు. అంటే ఇప్పుడు ఎన్నికల్లో విజయం సాధించాలంటే నాయకులు పోకిరీ అవతారం ఎత్తాలి. దట్టంగా వేసుకున్న మేకప్ తొలగిస్తే చాలు అసలు రూపం అదే పోకిరీ రూపం బయట పడుతుంది.

ఇక రాంగోపాల్ వర్మ ఈ టీవీ సుమన్ తోనే పోటీ పడాలి .. వివాదాల ప్రచారంతో సినిమా పప్పులు ఉడకవు

2011-12-13T09:58:00.004+05:30

చానల్స్‌లో వివాదాల ద్వారా సినిమాను సక్సెస్ చేయించుకోవాలని ప్రయత్నిస్తే ఏమవుతుంది. బెజవాడ సినిమా అవుతుంది. ఇప్పుడు చానల్స్‌లో ప్రచారాన్ని నమ్మి సినిమా చూసేవారెవరూ లేరు. సినిమా బాగుందని చూసిన వారు చెబితే కొంత వరకు నమ్ముతున్నారేమో కానీ మీడియాను నమ్మి సినిమాకు వెళ్లే రోజులు పోయాయి.

రాంగోపాల్‌వర్మ వర్మ మాత్రం ఇంకా పాత టెక్నిక్‌లనే నమ్ముకున్నారు. శివ నాటికి ఇప్పటికి కాలం చాలా మారిపోయింది. ఆయన దాన్ని గుర్తించారో లేదో? గుర్తించక పోవడమే మంచిది. ఇదే దూకుడుతో ఇదే తరహాలో మరో ఐదారు సినిమాలు తీస్తే చాలు. అంతకు మించి మనం ఆయన నుంచి కోరుకునేది ఏమీ లేదు. వర్మ సినిమాలు మరో రెండు మూడు విడుదలయ్యాక ఆయనకు ఈటీవి సుమన్ తప్ప మరెవరూ సాటిరారు. వారిద్దరి మధ్యనే రసవత్తరమైన పోటీ ఉంటుంది. బెజవాడ సినిమా విడుదల సందర్భంగా దాదాపు అన్ని తెలుగు చానల్స్‌లోనూ రాంగోపాల్ వర్మ హడావుడి కనిపించింది.

పేయిడ్ ఇంటర్వ్యూలో, లేక చానల్స్ వాళ్లు పే చేసి ఇప్పించుకునే ఇంటర్వ్యూలో, సాధారణంగా సినిమా వాళ్లను చేసే ఇంటర్వ్యూలో ఏది ఏమిటో ఈ మధ్య తెలియడం లేదు. ఏ ఇంటర్వ్యూ అయితేనేం కానీ బెజవాడ సినిమా విడుదల సందర్భంగా అన్ని చానల్స్‌లోనూ రాంగోపాల్ వర్మ తెగ మాట్లాడేశారు. నా ఇష్టం వచ్చినట్టు నా కోసం నేను సినిమా తీస్తాను మీకు నచ్చినా నచ్చక పోయినా నాకు సంబంధం లేదు, ఇష్టం ఉంటే చూడండి లేకపోతే లేదు. రాంగోపాల్‌వర్మ ఎన్ని చానల్స్‌లో మాట్లాడినా మొత్తంగా ఆయన మాటల సారాంశం ఇది. పైగా టీవి చానల్‌లో ప్రశ్న అడిగిన వారితో అమర్యాదకరంగా మీకు అర్థం కావడం లేదు అంటూ తీసిపారేస్తూ మాట్లాడుతుంటారు. సినిమా గురించి చానల్స్‌లో తెగ హడావుడి చేశారు. ఆయన మాట్లాడింది సరిపోదన్నట్టు తెలుగు చానల్స్ ఆ సినిమా ప్రచారం తమ బాధ్యత అన్నట్టుగా లెక్కలేనన్ని ప్రత్యేక కథనాలు ప్రసారం చేశాయి. తీరా సినిమా విడుదలయ్యాక అది అట్టర్ ఫ్ల్లాపైంది. ఇంటర్వ్యూల్లో వివాదాస్పదంగా మాట్లాడడం ద్వారా సినిమాపై ఆసక్తి కలిగించడానికి ఆయన చేసిన ప్రయత్నం కూడా ఫలించలేదు. గతంలో రక్తచరిత్రను ఇదే విధంగా టీవిల ద్వారా సంచలనం చేశారు. సినిమా విడుదలైన తరువాత ఏమాత్రం బాగాలేదనే టాక్ వచ్చేసరికి వర్మకు సన్నిహితుడైన ఒక ఎమ్మెల్యే ద్వారా టీవిలో సంచలన ప్రకటన చేయించారు. ఈ సినిమా ఎన్టీఆర్‌ను అవమానించే విధంగా ఉందని సినిమాను బ్యాన్ చేయాలని చానల్ చర్చలో టిడిపి ఎమ్మెల్యే ఒకరు డిమాండ్ చేశారు. ఆయన వర్మ మిత్రుడు. ఆ డిమాండ్ కూడా ప్రచారంలో భాగం. ఎన్టీఆర్ అభిమానులైన నాయకులు రోడ్డుమీదకు వచ్చి కొంత హడావుడి చేయడం ద్వారా సినిమాకు కొద్దిగా ఊపిరి పోశారు.

ఇదే తరహాలో బెజవాడను మొదటి నుండి వివాదం చేయడానికి ప్రయత్నించారు. బెజవాడ రౌడీ అని తొలుత పేరు ప్రకటించడం, విజయవాడ నాయకులు అభ్యంతరాలు వ్యక్తం చేయడం, విజయవాడలో వర్మ, ఆయన మిత్రుడు లగడపాటి రాజ్‌గోపాల్ బైక్‌పై షికార్లు, చివరకు నేను ఎవరికీ భయపడను కానీ మిత్రుడి కోరిక మేరకు సినిమా పేరు మార్చినట్టు వర్మ ప్రకటించారు. ఇన్ని నాటకాలు ఆడినా, చానల్స్ ప్రచారంతో అదరగొట్టినా సినిమా అట్టర్ ఫ్ల్లాప్ కావడం విశేషం. మరోవైపు సుమన్ రెండు మూడు వారాలకో సినిమాను నిర్మించేస్తూ ఈటీవి ప్రేక్షకులపైకి వదిలేస్తున్నారు. సినిమాలను కుటీర పరిశ్రమ స్థాయికి తీసుకు వచ్చిన ఘనత సుమన్ బాబుదే. అట్టర్ ఫ్లాప్ సినిమాలు నిర్మిస్తూ థియేటర్‌లో విడుదల చేస్తున్న వర్మ ధైర్యాన్ని, రెండు మూడు వారాలకో సినిమా టీవిలో విడుదల చేస్తున్న సుమన్ కృషిని అభినందించాల్సింది. వివాదాల ద్వారా టీవిల ద్వారా సినిమా సక్సెస్ అవుతుందనే నమ్మకం అంత పెద్ద దర్శకుడికి ఉండడం విచిత్రమే. అన్ని తెలుగు చానల్స్‌లో పవన్ కళ్యాణ్‌తో చిట్‌చాట్ అంటూ సుమ ఇంటర్వ్యూ చేసిన కార్యక్రమం వచ్చింది.

15 నుంచి 30 నిమిషాల తేడాతో అన్ని తెలుగు చానల్స్‌లో ఒక దాని తరువాత ఒకదానిలో ఈ కార్యక్రమం వచ్చింది. పంజా సినిమా విడుదల సందర్భంగా ఇది పేయిడ్ ఇంటర్వ్యూనేమో! ప్రకటనను, ప్రత్యేక కార్యక్రమాన్ని ఒకే విధంగా చూపిస్తే ఎలా? ఆ మధ్య హాలివుడ్ నటుడు ఢిల్లీ వస్తే అభిమానులు తెగ హడావుడి చేశారట! ఇంగ్లీష్ సినిమాలు చూసే వాళ్లు మన దేశంలో బాగానే ఉండవచ్చు కానీ అభిమానం అంటూ అలా వెంటపడేంత సీన్ ఉంటుందా? ఆ నటుడు వచ్చి వెళ్లిన తరువాత వారంతా పేయిడ్ అభిమానులని, హాలీవుడ్ హీరోను సంతృప్తి పరిచేందుకు అలా చేశారని జాతీయ చానల్స్‌లో కథనాలు ప్రసారమయ్యాయి.

సోషల్ సైట్స్ హద్దులు మీరి అభ్యంతరకరమైన రాతలు, ఫోటోల మార్ఫింగ్‌పై కేంద్ర మంత్రి సిబాల్ నిరసన వ్యక్తం చేశారు. స్వీయనియంత్రణ లేదా ఆంక్షలు అవసరం అనే అభిప్రాయం వ్యక్తం చేశారు. దీనిపై ఇంగ్లీష్ చానల్స్ కన్నా మన తెలుగు చానల్స్‌లోనే సుదీర్ఘమైన చర్చ జరిగింది. ఆంక్షలు విధిస్తారా? అంటూ మంత్రిపై మండిపడ్డవారే ఎక్కువ. సోషల్ సైట్స్‌లో ఇప్పటికే కొంత వరకు స్వీయనియంత్రణ ఉంది. ఎవరైనా అభ్యంతరకరమైన రాతలు, ఫోటోలు పెడితే ఫిర్యాదు చేయవచ్చు. పెద్ద సంఖ్యలో బోగస్ అకౌంట్స్ ఉంటాయి వాటిపై ఫిర్యాదు చేస్తే వెంటనే తొలగిస్తారు. ఆలోచనలకు స్వేచ్ఛ అవసరం, ఆలోచనలను అడ్డుకోవలసిన అవసరం లేదు కానీ సున్నితమైన అంశాలపై ఉద్రిక్తతలను రెచ్చగొట్టే చర్యలను అడ్డుకోవడానికి సోషల్ సైట్స్ స్వీయనియంత్రణ పాటించాల్సిందే. ఏదో ఒక మారు మూల దేశంలో ఒక మతాన్ని కించపరిచే విధంగా కార్టూన్ వేశారని హైదరాబాద్‌లో సైతం మతకలహాలు చెలరేగాయి. సున్నితమైన అంశాలపై రెచ్చగొట్టే రాతలు, ఫోటోలతో ఎవరైనా ఇష్టానుసారం వ్యవహరించడానికి అవకాశం ఉండకూడదు. రోడ్డుపై ప్రమాదాలు జరగకుండా ఉండేందుకు ట్రాఫిక్ రూల్స్ పాటించాలి అంటే ఒక పౌరుడిగా ఎక్కడికైనా ప్రయాణించే నా హక్కును కాలరాస్తారా? అని నిలదీస్తే ఎలా? సోషల్ సైట్స్‌లో వెర్రితలలు వేసే వ్యవహారాలను అడ్డుకోవడానికి స్వీయనియంత్రణ అవసరం. అదే సమయంలో ప్రజలకు తమ భావాలను స్వేచ్ఛగా వెల్లడించే హక్కు ఉండాలి.

విశాఖలో రియల్ ఎస్టేట్ గొడవలపై టీవి5 గురువారం ఒక ప్రత్యేక కథనాన్ని ప్రసారం చేస్తూ విశాఖకు సీమ సంస్కృతి అంటూ పేర్కొన్నారు. చానల్ వాళ్ల దృష్టిలో సీమ సంస్కృతి అంటే ఏమిటో? అస్థిత్వ పోరాటాలు సాగుతున్న ఈ కాలంలో ఒక ప్రాంతం గురించి మాట్లాడేప్పుడు చానల్స్ బాధ్యతాయుతంగా వ్యవహరించాలి.